Sennator 30 le Congress member 171 nih USA president Donald Trump taza an cawi. Phunghrampi chung upadi a buar tiah an ruah. Mah cu Upadi nih cun Cozah rianttuan a simi paoh nih zeibantuk phun paoh in siseh ram chung le ram leng in laksawng a cohlang lai lo, cun pumpak hlawhnak a cohlang in a tuah lai lo ti a si.
Phunghrampi cung ah hohmanh an um kho lo tiah Senator Richard Blumenthal nih AP ah a chim. June 7. kha sihni an hlaanmi pawl le Washington DC i phunghrampi he pehtlai in biaceihzung a tthumi biaceih bawi pakhat he tonnak an ngei cang. President hrimhrim zong phunghram uktu a si kho lo ti a si.
USA president Trump nih thla hlawh dollar 1. lawng a laak. Cucu a uartu le a khuaruah harmi an tam ko. Lungthian tuk zong a si kho. A dang cu peh lo in, cabia tu hun peh ning:
Tazacuai an duhnak a ruang cu Donald Trump nih President a hun tlin hnu zong ah chawlehnak (sipuazi) a tuahmi a ngol duh lo. Chawlehnak an tuahmi pawl tu khan a 'chuak chung', i Trump chawlehnak hi company 550 hrawng le ram 20 nak tlawm lo he pehtlaihnak a ngeimi a si. Cucu a fapale kut ah a chiah chung. Eric Trump nih "Ka pa nih khuamawchel ah kan zung ah ra in zei kan lawh a hung zoh lengmang." tiah a chim ai.
Trump hi State dangdang i "justice authorities" a simi democratic pawl nih phunghram a buar tiah taza an cawi bal cang nain an hlawh a tling lo. Asinain tutan Congressman nih taza an hun cawinak hi cu a von i phungdang ngaingai, a ruang cu Trump nih a buar ko tiah an ruahmi phunghram biachiahnak zawnte le a tuanbia tiang an hun char caah a si: cucu Cozah rianttuan a simi nih Congress theihpinak tello in ram dang laksawng, le ram chung laksawng a cohlang lai lo ti le amah pumpak hlawknak a cohlang lai lo ti a si.
Hi Congressman 171 le Senator 30 nih an dirpimi cu ram dang pakhat khat in laksawng le hlawknak a simi thil, phaisa siseh president ngeihchiah maw a hotel maw, an cawk zong ah cucu phunghram he aa kalh ti a si. Atu i sihni pawl le baiceih bawi an iton hnu hin zeitluk tiang ah Congressman nih president hi chuahpi an duh timi ah i hngat in tazacuainak cu pehzulh ding a si tiah theih a si.
Tazacuaitu hna nih pumpak hlawknak tiah an ruahmi tahchunnak cu:
* NASA chungtel pakhat nih Australia i Doctoral Thesis a tuah liomi pa kha a bawmh caah Dollar 150 a hmuh.
* Pensen a la cangmi thli-ralkap hlun kha UK ah cachim rian ttuan aa tim asiloah a ttuan.
* Upadi ning in ruahnak pe khomi American nih Mexico meilaknak sak ding ruahnak a pek. (eihmuar a si lo nain cozah rian ttuanmi cozah hlawh a eimi nih a miark hmuh in a dang ah a ttuanmi a ngah lomi an langhtermi a si.)
Congressman nih an charmi Phunghram zawn cu Mirangca in: Article I, Section 9, Clause 8 of USA Constitution:
«No Title of Nobility shall be granved by the United States: And no Person holding any Office of Profit or Trust under them, shall, without the Consent of the Congress, accept of any present, Emolument, Office, or Title, of any kind whatever, from any King, Prince, or foreign State.»
Trump nih a tuah tiah tazacuaitu nih an ruahmi cu zeidah a si?
A chawlehnak a ngol lo caah phaisa tamtuk te an company ah a lut, cun ram dang in pumpak hlawknak a hmuh hna, an ti. Phunghram a rak ttialtu pupa hna nih an rak i buaipi tukmi cu Zinawh-eihmuar hi a rak si. A hlei in James Maddison nih a Note-book ah phunghram ttialnak aa rak telmi minung 15 nih ziknawh-eihmuar timi bia voi 54 nak tlawmlo kan rak chim. Kan iton voi li ah voikhat cu hi kong kan ceih tiah a ttial.
Trump nih phunghram a buar tiah an puhmi:
* Trump president a si hnu 2017 in China ah thil min thar tam ngai cohlan an si.
* Diplomat pawl nih USA an tlawn tikah Trump hotel an hlan i an i tthum, a ruang cu President ngeihmi hotel a si caah a si.
* President a si hnu in China le Abu Dhabi nih New York i Trump-tower ah an i tthum. NY tthiam i a ummi a inn pakhat cu Saudi-Arabia nih dot khat an cawk.
* UK cozah ngeihmi BBC nih Trump TV-program The Apprentice thlahnak nawl an cawk.
* Cu vialte lakah an zumh lobik nak cu Trump nih Tuluk Telegraphist ZTE hi phihnak in a onh tthanmi (Sanctions a dinhdorh) hi a si. Mah biakhiahnak a tuah tlawm pal ah Trump nih Indonesia i inn sak ding aa timhmi caah Tuluk nih Dollar 500 kan cawih lai a ti.
Na rel cang maw?: USA President hna lak catang sang pawl
USA president dang nih zeidah an rak tuah cio?
President Andrew Jackson cu 1830 ah Colombias Simón Bolívar timi philh lonak Medal an rak pek. Congress a rak hal hna, i Foreign Department ah an chiahter. Bejamin Harrison tu cu 1896 ah pahnih an pekmi laknak nawl Congress nih an rak pek.
Martin van Buren cu 1840 ah rangtum pahnih, chiti kuang khat, rose in an tuahmi ti lang nga, hngawng-ngerh pakhat, Persian pher, Paerls (pale lungvar) bawmkhat le vainam an rak pek. A dih lakin Foreign Department ah an chiahter.
John F. Kennedy zong 1963 ah Irland nih upat peknak ah rammi sinak an rak pek nain Justice-department ruahnak a hal hna hnu ah a rak cohlang duh lo.
President Barack Obama hi Norway nih 2009 Nobel Peace Prize an pek lio ah phunghram le upadi a thiammi hna ruahnak a hal hna hnu ah Nobel Committee cu coah a si lo i cozah tang a ummi a si lo caah lak khawh a si an ti caah a rak cohlanmi a si.
Trump nih Dollar 1. lawng thla hlawh a lak. Asinain President hlawh nakin a tamdeuhmi le a hlawk deuhmi zeibantuk miaknak dah a tuah i a cohlan?
Cc: Aftenposten, The Hill, WashingtonPost
__________
Hi blog i kan ttialmi hi a ttha tiah na ruah ahcun Share ve law na hawile LIKE sawm ve hna tiah kan in sawm.
Comments
Post a Comment