Ram hruaitu hna an i ton tikah a biapi bik cu himnak (Security) a si. A ralaimi June 12. i North Korea dictator Kim Jong-un le USA president Donald Trump an i ton tikah an himnak ding pakhatnak ah an chiah caah Singapore hi an pahnih lungtling in an thim.
USA le North Korea i chawnhbiak an thawk khawh hi China president Xi Jinping thawng in tampi aa tel. North Korea nih Rocket a hneksak lengmang lio ah Vawleipi nih phihnak fak chinchin in an tuah i China lawnglawng North Korea ah chawlehnak a rak tuah. Cucu China nih hiti na um peng ahcun phihnak kan tuah ve lai tiah an i ton voi hnih ah khan USA le South Korea he i chawnhbiak a hnek chih tiah theih a si.
Kim le Trump tonnak ah China aa tel lai lo nain a phi chuak le a cangmi thil kong ah theih an duh ve. Kim cu Xi Jinping sinah a nauta tuk ti a langhnak cu Kim nih voi hnih a rak tlawnmi kha a si i a hnubik an i ton kha USA he i chawnh biak tikah zeimaw zeimaw ti bia funh le ruahnak i cheuh dawh an si tiah an purhdah.
Zeiruangahdah Singapore theng an i thim?
Pakhatnak cu China nih Singapore hi a uar ngai caah a si. Tuluk holh hi Singapore i a palinak official-holh a si lawng si lo in an khuapi i khua a sami 75% hrawng hi Tuluk an si. Singapore le China cu an i hlat ngai nain Singapore nih China he aa khat in caan a hman, i aruang bik cu chawleh ah a ttuantti taktakmi an si caah a si ko. Xi Jinping nih 2015 ah khan Taiwan president hlun, Ma Ying-jeou he i tonnak ding ah Singapore hi a rak hman bal ve i Trump aa tthumhnak ding Shangri-La Hotel cu a rak hman cang.
Pahnihnak ah North Korea nih Singapore a uar ngaingai ve. Kim nih an ram he ttha a simi ram ah tonnak a duh, i Singapore ah North Korea Embassy a um caah a si. 1975 kum ah khan Singapore le North Korea ram hruaitu hna chawnhbiaknak an rak ngei bal ve fawn. - A dang pakhat cu North Korea an vanlawng hi hla a zuang kho ding a si lo caah a naihbiknak Singapore hi an i thimnak a si. Singapore company pawl nih hin North Korea hi upadi he kalh in siseh, upadi ning zong in an bawmh lengmang ti a si.
Pathumnak cu USA zong nih Singapore cu a duhmi a si. Kum tampi pehtlaihnak ttha a ngeimi an si i 1966 kum in ramhruaitu hna biaruahnak an rak ngeitti kho cang. USA nih Singapore cu chawlehnak hawikom ttha ah a chiah i Asia an chawlehnak ah a lianbik zung zong Singapore ah an chiah. USA nih a ralkap, raltuknak vanlawng-tilawng tampi zong Singapore ah a chiah pinah USA bawi tampi nih an tlawnnak a si. - Cun atu i China nih minung serchom tikulh ah hriamnam le ralkap a ponmi kong ah USA nih tutan tonnak hi caan ttha la in a ralkap Asia ah hun chap a duh tiah a ruatmi um a si.
Palinak cu Singapore hi Trump le Kim caah a him taktak caah a si. Siangapore cu Autority-democracy (Democracy tling an si lo.) ram an si i party pakhat lawng nih a umnak a si. An ram hruaitu hna runvennak ah a thiam taktak le hmuhton a ngei tukmi zong an si fawn. Vawleicung zik-nawh le eihmuar a tlawmbik ram ah aa telmi a si tiah Transparency International nih an chimmi a si i an khuachung zong a thianghlim. Singapore hi nitlak ram pawl le nichuah lei pehtlaihnak ah an hman bikmi zong a si fawn.
Trump le Kim a au hnawhmi mibu an um lai lo. Cucu ram hruaitu hna nih an uar tukmi a si. Siangapore nih a bupi in lamzawh i au le buai a kham. Au khawhnak hmun cu Hong Lim-park timi hmunbi te lawng a si i zeihuaha an tuah kho lai lo.
Mah cu ruang ah cun Kim le Trump nih a ralaimi June 12. ah tonnak ngeih an i timh hi a si.
 |
Trump Nih Kim A Thah Ahcun Zeidah Cang Kho? |
Comments
Post a Comment