A ralaimi thla June 12. ah USA president Trump le North Korea president Kim Jong-un cu Singapore ah tonnak an ngei lai. Mah cucu Trump nih ramdang pehtlaihnak teinak suiluchin ah a ruah cang (Foreign politics triumf.). Amah hlan president pawl nih an rak ti khawh lomi a tuah khawh tinak a si hnga.
Asinain Singapore ah kal, dictator Kim he i ton khawh in Vawleipi daihnak caah khamhnak a ser ti khawh a si rih lo.
May 16. ah North Korea nih South Korea he ton ding a leet i USA he zong i tong lo kho kan si tiah a rak chimmi Facebook page ah ka rak ttial cang. USA le South Korea cu ramri ah raltuk an cawn tti ruangah khan a si. Asinain, cu lawng cu ton ding i leet tiang a chuahnak si dawh a si lo.
North Korea le USA chawnbiaknak ah a biapi in aa telmi USA aiawhtu Suzanne DiMaggio nih a chimmi cu "Trump nih North Korea he ttha tein aa chawnh hlan ah Iran-Deal hrawh aa hnawh tukmi hi cu a palh tuk." tiah a chim. Mah nu hi New America website i an ttial ning ah kum 15 chung "Track 1,5" le "Track 2" timi USA le dictator pawl itonnak ah aa telmi a rak si. Avoi khatnak bik North Korea le USA aiawh upa pawl OSLO i an ton lio ah a biapi tawlreltu zong a rak si caah a thei ngaimi a si.
Suzanne hi Myanmar, Iran le North Korea kong i USA palai pawl tonnak ah aa rel pengmi a rak si. June 12. ah tonnak ding an fehter khawhmi cu aa lawm tuk, thil ttha a si tiah a cohlan nain USA nih har le fe in a tuahmi International Agreement pawl in Trump nih fawi tuk in a chuahmi hi North Korea lunghrin lo awk a ttha lo i zeitindah a ruah lai timi caan nih a chim te lai, a ti. Iran-deal a um khawh nakding ah kum 2015 in White House tang rianttuan mi zong a rak si tiah Washington Post nih a ttial.
Na rel cang maw?: Kim Nih Atom In A Pennak Fehter Aa Zuam
President Trump nih April 22. ah Twitter i a rak ttialmi cu tihin a si: Atom-hriam le a hmun hrawh dihding si seh hneksak ti lo ding timi kong ah kan lung a dong rih lo, tiah a ttial. Cu a ttial tlawmpal ah a lung maw aa thleng i si hnga, ca thar a ttial: North Korea he biakhiahnak ngeih khawh ding cu aa hlat tuk rih. A ttha zong si kho i a ttha lo zong a si kho. Caan tu nih a chim te lai.
Trump nih President a tlin in Twitter hi biapi in a hman. Twitter ah Tlirhkhonhnak, hronak, faknak le mah le mah i thangthatnak pawl hi biatak tein a ttialmi an si i zeimaw cu mi thangchiatnak zong aa tel. Singapore tonnak ah ka duhning in thil a kal lo ahcun biaruahnak in ka chuak colh lai, a rak ti. Amah hlan in atu ah khatlei pa tu nih a herh si ahcun hi tonnak ahhin kan ra lai lo, an hun timi nih Trump caah a biapi tukmi Vawleicung daihnak mithlam cu a hun mawt ter khawh ngai.
North Korean Deputy Secretary of State, Kim Kye-gwan nih "kam khatlei lawng lam neh in Atom hrawh an kan hneek a si ah cun USA he i chawnh ding hi kan lung ah a um lem lo." tiah a chim. USA nih khuasaktintuk-nak (Economic) bawmhnak ding men in Atom-hriam le sermi hrawhter dih ding cu kan duh hrimhrim lo caah i ton dingmi zong hi kan i ruat tthan lai, tiah a chim. - USA nih hin chawva pek le ram tthanchonak tuah piak ding in an leem hn cu mu.
Dictator in aa ukmi, innka a khar khumhmi North Korea hi mi tampi an saduhthah bantuk in molh chup cun a um ve rua lo. Kim Jong-un nih ni kum ah khan an ram cu Atom-hriam a ngei cang tiah a rak chim. Vawleipi hi Rocket hneksak asiloah i hrocer hnawh len a herh ti lo tiah a chim. Atom-hriamnam kan ngei lawnglawng ah ram pakhat, ram dang nih upatmi kan si lai timi kha an rak i dirpi pengmi a si. Atu cu ralttha tein an ral hmai ah bia an chim ngam cang. Kim Jong-un a lungthin a der lo: Ka uknak a hmun lai ti lawng a ruat.
Salai Bawi Lian Mang nih 2010 ah "CNA le Tanbo" timi cabia a rak ttial. Chinmi nih CNA kan tthawnter lo, hriamnam ttha kan ngeih lo ahcun Kawl/ ralkap nih zei ah an kan rel lai lo, ti khi a si bik. Cu bantuk cun Kim zong nih a rak ruat lai lo tiah chim khawh a si lo, Atom hriam kan ngeih lawng ah kan him lai.
Trump nih Security Policy Advisor aa thim tharmi John Bolton nih Libya model kha N. Korea he aa tlaak tiah ruahnak a chuahpi ti a si. Hi a bia le naite i USA-South Korea raltuk an cawnmi ruah ah North Korea nih zeitindah a ruah hnga?
Libya i siangpahrang bang Dictator lian tak Gaddafi cu USA nih chawlehnak, tthanchonak le na ram daite in a um khawh nakding kan in bawmh lai i Atom-hriam ser ti hlah tiah an timi cu a zumh i a rak cohlan hna. Kum tlawmpal te a rauh ah Gaddafi cu a chaak an tlaih i an thah. Saddam Hussien zong hriamnam ttha lo na ngei tiah an puh, Atom-hriam na ser tiah an ti chih i USA nih a luh hnawh caah a pennak cu a dih. North Korea uktu hna nih Libya le Iraq kong fiang tein an theih caah tuahser ttihnung a si i kan cung ah a tlung kho tiah an ruah ve.
Zei si paoh ah Korea ram hnih kong thawngpang cu ruahchannak a um ngai ko. Kim le Trump nih cabuai cung biaruah ttinak an cohlan veve. Sihmanhsehlaw, North Korea a lunghrin peng rih caah le tonnak an tuahmi a phichuak a um rih lo caah Trump nih teinak suiluchin a co ti ding cu a si kho rih lo. Zeitluk indah i chawnhbiak le remhdaihnak ser a har timi naibik North Korea bia-aam hin a fiang ko.
Comments
Post a Comment