Kawlram/Myanmar hi mipi cozah tling a si rih lo nain thlennak a bawmtu si lai tiah ramkip nih a lamkip in an bawmh i Kawlram ralkap sin ah hriamnam ttha zong an zuar khawh cang. Asinain Ralkap nih ram chung daihnak tuah lo i Civil War an pehzulh rih caah minung covo a dirpitu le nitlak lei ram pawl nih Kawl ralkap sinah hriamnam ttha zuar cu thil ttha a si lo. Cucaah Israel nih hriamnam in Kawl ralkap a cawmmi hna hi cu a ngol hrimhrim awk a si tiah ruah a si.
Sihmanhsehlaw, a ngol duh lo. 2017 chung ah Israel nih hriamnam a zuar khawhnak bik ram cu India, Vietnam le Myanmar an si. Kawl ralkap nih Rohingya pawl cihmih aa zuam, hriamnam thazang hmang in a dawi hna i Israel nih hriamnam hmanning Kawl ralkap an cawnpiak hna hi cu a poi tukmi a si. Kachin, Karen, Chin le a dang tlangcungmi caah cun thil ttha a si lo. Kahin Israel nih Kawl ralkap training an pek hna lio hmanthlak.
Rohingya thawngpang ruangah Kawlram i hriamnam le Tank an zuarmi cu ramkipfonh bu le UN nih an caak, an mawhchiat nain a ngol duh lo. UN nih miphun ci-hmihnak (ethnic cleansing) an tuah tiah Report a pek hnu in US le EU zong nih an mawhchiat ve. Asinain bia sawsawh a si caah zeihmanh ah a rel lo i Kawlram ralkap caah dawr a hon peng rihko.
Kawlram nih Tank 100 leng an cawk cang. Ramri palek caah hriamnam le Israel tilawng fami (Boat) tete zong ramri runvennak caah an cawk, i Rohingya kham le donak caah a si tiah purhdah an si. Israel mipi tampi le Human Rights bu hna nih Kawlram i hriamnam an zuarmi cu an duh lo i biatak tein an do cuahmah.
Kachin kahnak zong ah Israel sin in cawkmi meithal an hmang lai lo tiah chim khawh a si lo. Myanmar nih 2017 i ralkap Budget caah a hmanmi zong hika hin kan rak ttial cang, i tlangcungmi thahnak lawnglawng ah an hman timi cu thlalang bantuk in a fiang ko.
Israel nih 2017 chung i hriamnam a zuarmi hi $9.2 billion a phan i record a si. A zuarmi chung in 58% cu Asia le Pacific ah an manhmi a si i India lawng nih $2 billion man a laak tiah tiah haaretz.com nih a tang hmanthlak ninghin a cuanter hna.
2012 in 2017 tiang Israel hriamnam zuarmi man USdollar in a si.
Israel nih hriamnam a zuarnak hmun le ram pawl cu a tanglei bantuk hin an si.
Israel cu hriamnam tthattha a ser khomi ram an si, a ser zong an ser. USA nih a sermi lak i a tthacem hriamnam le vanlawng tibantuk zong a caw hmasa cem lengmang an si. Hrimnam ser le zuar hi an ram phaisa hmuhnak caah a biapi khunmi ah a hon i chuah. An technology zong an sang i thil thar an chuahmi tete zong a um lengmang. Vawleicung hriamnam a zuarbik ram 10 lakah aa tel ve cang.
A ser le a zuarmi hriamnam (ralkap hriamnam) phun pawl
Israel tuanbia cu Bible ah fiangte in kan rel khawhmi a si. An hruaitu hna an biapitning zong aa tel. Vawleicung ah a biapimi an si caah an kong le Vawlei sining theih cu ahcun an tuahmi kip hi cawithlai le Bible zohtti lengmang ahcun a ttha ngaimi a si.
April 2018 kha Israel kum 70 Birthday a rak si. Ralpi a dih hnu ah UK le US nih Israel ramri ser piak in UN theihpi nak he an dirhmun Israel thar a rak si. 2006 april ah ka rak tlawng i sau ngai ka caam.
Relchih: Israel Thawngpang le Vawlei
Cc: Haaretz, Financial Time, Nrk
Comments
Post a Comment