Mit Ngeih Zong Ah Hmuh Lo Khawh A Si. Hna Ngeih Ve Ko Zong Ah Theih Lo Khawh A Si. - Dr. Sang Awr
PAKHATNAK:
#Saudi_Arabia prince Mohammed bin Salman cu an ram hruaitu min lang a hun si i nitlak ram hruaitu pawl he tonnak a ngei, TV ah interview aa tuah ter hna. Cu tikah reformist a si lai tiah an zumh ngai. PR. a thiam i leicung mi rum le chawlet mi lian tam ngai he zong an itong. A pale bantuk si lo in an ram ah thennak a chuahpi lai tiah tha an pek. A mithmai panh i thil hruk aih zong ah amah le hmunhma (nitlak ram a phak ah dress/suit hna aa hruk) zoh in a thiam. An zumh ngai.
A taktak ah Saudi Arabia cu thih-dan pek a tambiknak le nu zei a rel lobikmi ram a si rih ko. Rammi nih zei nawlngeihnak hmanh an ngei lo. Dictatorship taktak a hmang rihmi a si hlei ah Mohammed bin Salman hi a zual bak mi a si tiah rammi nih an chim. Power thlah a siang lo i, tlaih peng khawh nakding ah zei paoh tuah a ngamhmi a si, an ti. Jemen buainak zong Saudi Arabia in aa thawkmi a si i a ram innpa cihmih aa zuam cuahmah mi a si.
Ziah nitlak rampawl nih mah ti an uar ne hnga?
Phaisa, phaisa, phaisa. Hi tluk rammi covo a buartu uktu chia hi USA nih a komh ngaingai. Arab an si nain Iran-Deal i USA a chuahmi kha a lawmhpi. US mirum chawlet pawl nih Saudi Arabia he chawlehnak tuah khawh ding a si ahcun an mit an i chinh, an hna an i cheh.
PAHNIHNAK:
#KACHIN kong ah UN le nitlak ram pawl an dai. Rohingya ti cang ah cun Kawlram tayacawi nih a hiar tuk hna. Sanction tuah ding lawngte an aupi. A taktak tiah cun Kawl ralkap nih Rohingya hi an buaipi lo. Kachin le tlangcungmi pawl hi an buaipimi a si. Cihmih an duhmi an si. Rohingya pawl umnak Rakhaine i Gas, Zinan tibantuk a mitthi tukmi pawl an buaiter hna i caan ttha la in Kachin an denmi a si. UN nih Kachin ralzam, miphun cihmihnak an tonmi a chimrelmi le Rohingya kong cuai thlai ahcun cuailung le Laimi sa cuai bantuk a si lai. International nih an hlawk lo ding an buaipi huam lo.
PATHUMNAK:
#LAIMI caah rungrul bantuk a simi duhsah tein a kan hlo te dingmi Nah-Ta-Lah hi khuate kip ah bawmhnak a pek. Hydro, Ti le sianginn pin a dangdang a bawmh. Nah-ta-lah i a ttuanmi Laimi nih a ttha tuk tiah an ruah, Tender a latu zong nih a ttha tuk hi tluk Lairam caah an ttuan hi an ti. Nah-ta-lah nih phaisa in a rian ttuannak hi Paracet (luhfahsi) din bantuk cikhat ca lawng a si, dam thainak a si lo, kan miphun tei le uk khawhnak ding ah kum tampi simanking (longterm) caah an tuahmi a si. Kawl ngakchia an phan, laiholh an thiam lai, laitlang ah an upat tiang Lainu an tthit i fa an ngeih tiang le Laiholh a thiam tukmi Kawlpa nih Chin State Hluttaw le uknak department dangdang ah an khat dih te lai dingmi khi mit kan ngei ve ko nain phaisa nih a kan phenh. Kachin cu hriamnam in an miphun le ram an hloh hna, Laimi cu kan lungput hi an hloh. Hna kan ngei ve ko nain cikhat ca bawmhnak phaisa nih a kan huh.
PALINAK:
#RAM_LENG Chinmi hi kan umnak ram pawl hi an uknak a ttha, a zalennak lawngte ah khuasami kan si hna. Nitin pawcawmnak ah khuaruahhar vansang in um cu a tlawmte, nain uknak le nitin upadi kong ah kan hnangam. Dinfelnak a umnak an si. Hi vialte hi dinnak, fimnak le dawtnak in an rak sermi ram an si. Cucaah hi ram ah luphum tiang te chinfapar tiang kan um sawk lai tiin chuahkehnak ram theih duh lo, hmuh duh lo in um ding a si lo.
Online in heh tiah i al caan a si lo. Ram le miphun kong theih duh tak, hngalh duh taktak ahcun, cun kan umnak ram bantuk a tthami uknak le dinfelnak hmuh duh taktak ahcun kan tuah khawhmi a um ko. Ram chung thil sining hi va hmuh taktak ve, va ton taktak ve lo ahcun zeitindah a langtlang in nan chimrel khawh lai, nan ttuan khawh lai?
Nan umnak ram ah thil Second-hand pawl an ttha tuk i cawk ding an si ko nain kan ram kong ah second-hand a simi bia le hla hi ibuaipi ding si lo. Mah nih first hand in va hmuh ton khawhnak le thlenremh nak caan ttha a um.
Asinain kan pu Dr. Sang Awr bia ttheo hi ro a ling. Nan paw nih hla an hmuh ter kho hna lo. Phaisa nih nan mit a huh. Nan hna zong a chehter.
Ca sau nan rel huam lo i cuvial.
Comments
Post a Comment