“Western Civilization Processes Theihlo le Jump-Promotion-Zawtnak”
"President Bush le Dr. Lian H. Sakhong, White House an i ton lio ah Dr. Lian H. Sakhong nih “Nuclear Arsenal Code” ra ka chimh tuah ti seh law, zeitindah President Bush nih a leh hnga?"
Chin miphun hi miphun dang cheukhat hna bantuk in, civilization chan khat hnu chan khat a dot dot in a thangcho mi kan si lo i, jump-promotion in 21st century thanchonak a hrawm mi kan si ka ti ah cun ka palh lai lo tiah ka zumh. BC 1100 in 450 hrawng, vawleicung ah Empires tampi an rak dirh i, pakhat hnu pakhat a rawk lio ah, Chin miphun hna nih zeibantuk “Empire” dah kan rak ngeih/dirh? BC 2900 hrong in 450 karlak, “Greek” pawl nih fimthiamnak in Pathian an rak kawl lio ah, khuazei hmun ah kan um i, zei bantuk Biaknak dah kan rak ngei? AD 1400 hrawng in 1550 karlak “Renaissance” “Nunphung le Ca lei in thanchonak” chan a si lio ah, zei bantuk Nunphung dah kan hmang i, zei bantuk ca dah kan ngei? AD 1700 in 1800 karlak “Enlightenment” “Fimnak le hmuhchuahnak karhnak” chan lio ah zeibantuk fimnak le hmuhchuaknak dah kan rak ngei? “Enlightenment” chan nih ruahnak thar a chuah pi i, “Age of Revolutions” “Dohthlenhnak tuah chan pawl” hna ah zei bantuk dohthlenhnak dah kan rak tuah? Dohthlenhnak tuahnak thawng in “Age of Libralism” “Zalonnak chan” miphundang hna an phak lio ah khuaika kan um i, zeibantuk miphun dah kan rak si? Vawlei ralpi pakhatnak le pahnihnak hna ah zeidah kan tuah? Tlawmpal te chimh rel ding kan ngei ve rua. The “Cold War” lio ah, khuai ka lei kap in dah kan dir? “New World Order” a chuah lawng ah CNF nih dohthlenhnak a thawk ve i, nihin ni tiang kum 20 hlei chung, “Liberation, Revolution, Liberalism etc.,” hna hi kan cawn cuah mah bu in kan tuah cuahmah tiah ruat kho a si. Hi tin ka chimh tikah, ka Miphun nehsawhnak a si lo i, thil sining chimh tu a si. Zei caah tiah, “Age of Liberation” a sosa ling cing lai hrawng 1900s lawng ah A, B, C, D a cawng ka te mi Miphun kan rak si.
B.C. 700 in 1400 karlak “Roman Empire” pi an dirh bantuk in, “Burman Empire” a dirh duh tu hna he, van chiat ah 1947 ah kan i ton i biakamnak kan rak ngei. Cu lio ah cun, “Burman Empire” a dirh duk tu hna tampi hi Judson College/Rangoon College ah “Renaissance le Enlightenment Literatures” kong hna thuk pi in an rak cawn cang i, kan mah nak in an rak sang ngai cang. Cucaah, “Revolution” zong an rak tuah ngam i, “Liberalization” zong an rak kal pi. Kan nih bel te cu kan dir hmun nih a pek lo caah, “Self-determination” ti mi cafang sining, “Democracy” ti mi cafang sining le “Federalism” timi cafang sining kha kan rak i fiang lo. Kan caah a rak pi bik ah kan ruah mi cu, Kawl nih an ti mi “Saa-Wat-Nay-Yee” “Ei awk, Ithuam awk, le Umnak” kha a rak si ko.
“Roman Empire” dirh bantuk in “Burman Empire” dirh a duh mi miphun hna he “Independence” kan lak ti i, 1948 in 1958 tiang khua kan sak ti tik ah an si ning ni khat hnu ni khat aa langh chin chin. Cu caah, “Remhdaih te in” “Peacefully” in kan karlak buainak kha chimh fel rak i zuam a si. “Tawnggyi Conference” auh a rak si. Hlanlio rak i timh cia bantuk in “Burman Empire” si lo in, “Federal Union of Burma” ram serh than u sih tiah hna tlak a rak si. Cu lio hmanh ah, “Federal Union” serh a duh lo mi lei ah kan miphun chung in a tang mi kan rak um rih kha kan philh lo a tha. Asinain, cu bantuk remh daihnak in, i zuamnak vialte cu, March 2, 1962 ah a dongh. “The Fourth Burman Empire” dirh ding in, hma an la.
Kan miphun hawi, Karen, Karenni, Shan, Kachin le Mon pawl hna cu, 1948 te in “The Fourth Burman Empire” dirh an timh mi hi an rak theih tuk ve cang. Zei caah tiah, Burman pawl he Cambridge University hna ah fim thiamnak an rak cawng ti cang. I.e., Saw Ba Oo Kyi. Cu tik ah, thil an rak hmuh mi a kau i, an rak tuak tan mi a rak sang ngai. Cu lio ah kan miphun nih “Renaissance le Enlightenment” kong ah zei tluk in dah kan rak theih ve hnga?
Cu ruang ah, Karen, Karenni, Mon ti pawl hna hi, Independence ngah le cang ka in siseh, tlawm pal ah si seh, dohthlenhnak an rak tuah mi a si. Chin, Shan le Kachin pawl zong nih 1958/1962/3 hna in dohthlenhnak biatak te in an rak thawk mi a si. Cu caah, dohthlennak ti mi le “Renaissance le Enlightenment” hna nih an hrin chuak mi a si i, Dothlenhnak nih hi “Liberalization” hi a chuah pi mi a si tiah ti kho a si. Zei caah tiah, “Renaissance” 1400-1500 nih “Enlightenment” 1700-1800 a hrin chuah. “Enlightenment” 1700-1800 nih hin “Revolution” 1800-1850” hi a hrin chuah. “Revolution” 1800-1850” nih hin “Liberalism” hi a hrin chuah.
Hi bantuk “Western Civilization Chronology” nih a kan chimh mi cu, thil pipa pakhat a chuahnak caah, kum zabu in a rauh i, sinak phun khat in a that deuh mi a ser siam khonak caah, kum zabu tampi a rau ti mi a si. Cu bantuk kum zabu tampi pakhat hnu pakhat a rak pah hnu ah a hmuh chuah mi thil ah an i fiang i, an dirh kamh kho. An kil veng kho. An thancho ter kho. A sunsa zia zong an theih khun.
Kan nih miphun bel te cu, “Iron Age” BC-1300-600 karlak lio i, “Ancient Near East” pawl tluk kan si lio 1900s hrawng in, kum 50 hrawng a rauh bak ah, “Liberation Age” ah kan lut i, “Independence” cu 1948 ah kan hmuh than. Kum 40 a rauh hnu zong ah mah kut le mah ke chuak thil ri lawng te hmang in (note: Midang serh cia mi thil pakhat hmanh hmang lo in) “Cathedral” pakhat hmanh a sak kho rih lo mi miphun nih “Coldwar” 1948-1988 thlihrang he kan i ton ve. Cu “Pro-demoracy wave” nih cun, kum zabu tampi a it ko mi kha kan mit a kan au ter ve i, “Contemporary Revolution” pakhat chuah pi a rak si. Cu cu, Chin Nation Front le, Chin National Army a rak chuaknak cu a si.
“New World Order le Globalization” ti leh ah kan tla/kan i peih ve. “Human Rights, Women Rights, Animal Rights, Group Rights etc.,” tiah “Rights’ Wave” ti leh ah kan tla. Cu ti leh nih, India cheu khat cu India ah a kan hlonh. Cheu khat cu, Malaysia ah a hlonh. Cheu khat cu, Thailand ah. Ram tampi ah a kan hlonh cio. Cu a kan hlonh mi ram kip in a donghnak ah, kum 1000 tampi chung “Civilization Process” tampi pah i, an serh mi ram tha bik ah a kan phan pi. Ni hin ni ah cun, vawleicung ramthabik, ramnuambik, ram rumbik le ram him bik ram 20 reng lo ah, kan miphun tampi khua kan sa.
Hi bantuk in ramtha, ramrun, ramnuam, le ram him serh/dirh khonak caah, a cung lei in “Civilization Process” pakhat hnu pakhat har le fe i, thazang, fimnak, thlanti, thisen, nunnak, tampi pek in, an rak serh timi hi kan philh tawn. Abik in “21st Century Cyber Age” pi kha zei hmanh piang huaha lo in kan i hrawm kho ve tik ah, kan si ning kan i philh. Cu bantuk in kan si ning kan i philhnak nih cun zei dah kan miphun caah thatlonak a chuak pi ti ah cun, CNF/A nih Chin miphun pi dohthlenak a tuah mi ah si seh, Ramchung ram leng i, Chinland le Chin miphun caah rian tuan tu hna thazang dernak, lunghrinnak, i hmuhthiam lonak etc hna a chuah pi. “Iron Age” in “Liberation Age” ah “Jump Promotion” kan hmuh. “Liberation Age” in “Global Age” ah “Jump Promotion” kan ngah than tik ah, mah hngal lo ah kan i chuah tawn.
- Kan miphun nih nih nunzia mawi kan ngeih mi zong mah sining chan khat zong a zoh kho lo mi kan si tik ah, zoh a chia ngai. “Jump Promotion” in thil kan i phu lo tlak lo mi kan ton tik ah, zei dah kan cang tawn ti ah cun, “Merit” “a si ning te in a si” mi pawl an si ning he “Leveling” tuah duhnak lungput kan ngei. Burma ram ah “Gazetted Officer” a si mi cu, miza an si. Asinain, US, Canada, Aus., etc hna ah “Gazzetted Officer” a si kho men lai lo. Cu tuk ah, kan ram kan um lio i, tang 4 a awng lo mi, a pum rua a tha ngai mi pa he “Factory” ah “General Worker” an tuan ti tik ah, an hlawh aa khat. Cu bantuk in an hlawh aa khat le cang ka i, hlan lio thil sining vialte kha philh in, “Nang mah zong $$$$ cu zah, keimah zong $$$$ cu zat” ti mi lungput kan ngeih colh i, kan Miphun nunzia tha kha kan kaltak i, “Individualistic Societies” pawl le “Capitalistic Societies” pawl nun zia kan i hrom. A ruang cu zei hmanh a si lo. “Civilization Processes hna ah Jump Promotion” kan ram hmuh caah a si.
- Nupi le va karlak zong ah hi bantuk thiam thiam in a si mi a tam ngai. Burma ram kan um lio ah, kum 20 hrawng a vapa nih a rak cawmh i, inn te ah thu i, nau le zoh khenh le, inn chung rian a tuan mi nu hna kha ramtha le ram rum an phan i, an va le he an nihlawh aa khat le cang ka in, “This is US, Canada, Australia etc.,) ti mi bia fang i lak in, an va le tluk ka si ve ko cang ti mi ruahnak he khua a sa mi kan tam. A ruang cu zei hmanh a si lo. “Civilization Processes hna ah Jump Promotion” kan ram hmuh caah a si.
- A ka hringsor tu hna nih chan tampi chung, thlanti, thisen, fimthiamnak, thazang, le nunnak hna thap in serh mi le dirh mi ram le thil a si lo tik ah, zei thil poh hi zei tluk in dah a man a sung luai ti mi kan thei lo. Cu ruang ah, “Social Welfare Assistance” tam deuh ngah kho kha thawn ah kan ruat. “Tax-eviction” tam deuh tuah kho kha fim ah kan ruat. Zei thil poh ah, a mah le a si ning in pek ah ngah ding a si ti mi ruahnak ka ngeih kho ti lo i, Kawl holh in “Ah-chuang” in ngah thiam le ngak khawh kha fim thiam ah kan ruat. Miphun dang hna nih kum zabu tampi chung, kum fatin te in “Tax” an pek leng mang in an serh mi “Highway” ah Mawtaw a thar te kan duh tawk in kan khalh/mawngh kho mi hi Pathian dawtnak ah kan ruah. A ngai ngai te in ti ah cun, kha bantuk “Highway” tha taktak mi serhnak caah, kum tampi “Tax” a rak pek mi hna tampi kha kan biak mi PATHIAN a theih lo mi, a zumh lo mi, a biak lo mi an si ti kha kan philh tawn.
- “Globalization Age” ah a nung mi Minung kan si i, “Jump Promotion” kan ngah i, kan phak hmasa bik mi ram hna, Malaysia, India, etc hna ah kan caah riantuan tu “CRC, CHRO, ACR etc., etc.,” hna pawl nih zei tluk in dah, ruahnak, thazang, ngeihchiat hna “Invest” tuah i, ralzaam hna caah rian an rak tuan cang i, an tuan cuahmah ti mi ruah lo in, “Third Country” ram pakhat khat kan phak tik ah, kan lung an tling lonak vialte kha sum phomh in phomh kan hmang. CHRO ti mi a rak um hlan ah CHRO ti mi a um a tha timi ruahnak “Idea” zong a ngei kho lomi, CRC a um hlan ah, CRC serh ah a tha ko ti mi ruahnak “idea” a ngei kho lo mi, ACR a um hlan ah, ACR a um ah a tha ti mi ruahnak zong a ngei kho lo mi hna pawl, “Cyber Age” nih kan si ning a kan philh ter i, kan au kan zai sawh sawh mi hna “Civilization Processes hna ah Jump Promotion” a ngah mi ka si ko tiah kan mah le kan mah kan zo kan i langh ternak tu a si caah ningzak ngai tu ding a si.
- President Obama le National Security Team hna nih Navy Seal pawl hmang in, “Operation Code Name Geronimo” an tuah lai ah, NSC Members dah ti lo cun, midang a ho hmanh nih an theih hna lo. Navy Seal pawl zong, “Stealth Helicopter” chung an lut i, van ah an kai hnu lawng ah zei dah an “Mission” a si ti mi an chimh hna. CNF hruaitu hna nih zei bantuk timhtuahnak an ngei? CNA hruaitu Ralbawi hna nih zeibantuk timhlamhnak “Mission” an ngei ti mi hna kha, zapi zaram, “Left-turn, Right-turn, About-turn” a tuah bal lo mi “Jump Promotion” in “Third Country” a phan mi hna pawl nih theih kan duh tawn, kan sawisel tawn. President Bush le Dr. Lian H. Sakhong, White House an i ton lio ah Dr. Lian H. Sakhong nih “Nuclear Arsenal Code” ra ka chimh tuah ti seh law, zeitindah President Bush nih a leh hnga? Ka theih awk mi a si maw si lo hmanh theih hua ha lo in, kan khuang tawn mi hi cu, zan it lai ah a khuang mi Arpa bantuk kan si ko. Kan mawh lo. “Civilization Jump Promotion” ruang ah a si.
- A tu lio ah, “Chin National Flag e, Chin State Flag e, Chin Revolution Flag” ti ban tuk bia le hla a tam ngai. A tha ko. Burman Empire dirh a duh tu pawl a zulh duh mi nih, a tu lio i, Chin State Flag khi thlai ko u. “My way is the only way” a ti mi hna zong nih nan duh mi Chin National Flag kha tuah cio u law, tar ko uh. Nan fundamental right a si ruang ah zei hmanh kan ti lai lo. Flag cu “value” a ngei. Zei ram flag poh zoh u si law, a mah le a design ning in “essence and value” a ngei dih. Chin National Flag tiah kan ti mi, a tu lio CNF nih a hmang mi hi zei ruang ah dah ka upat? Hi flag ka zoh poh ah, Chin Pasal tha minung 100 reng lo nunnak he as khuahkhihmi a si. Chin Pasal tha tampi hna i, thlanti le thisen he aa khuahkhih mi a si. Chin miphun nih Chin-self-determination, Federalism le Democracy kan ngah khonak caah tiah kum 20 chung dohthlenhnak kan tuah ruang ah thong atla mi, a tuar i, a in mi hna le a dih mi chaw le va vialte he aa khuahkhih mi a si. Cu ruang ah ka upat. Ideological Flag a si lo. Imaginary Flag a si lo. Artistic Flag a si lo. Nunak le Thisen, Tuarnak le Innak vialte he aa khuahkhih mi Flag a si.
Cu caah, Pathian nih Miphun pakhat in, a dirh mi Chin miphun adawtu, Pathin pek mi Chinland a dawtu, Pathian nih a serh mi Chin miphun hna nih Pathian pek mi Chin ram te ah, miphun dang hna bantuk in Chin miphun konglam khuakha lairel khonak a duh tu an um chung poh poh le, cu bantuk duhnak a tlam atling hlan chung poh cu Chin miphun dohthlenhnak hi a ngol lai lo, a dongh lai lo, a chi hmit kho a si lai lo. CNF hruainak in tuah cuahmah mi dohthlenhnak hi Pathian nih a rem a ti lo i, a dongh ter zong ah, Chin Miphun kan te kan fa le nih dohthlenhnak hi an tuah than te ko lai i, an tuah hrim hrim ko lai.
Note: “Western Civilization Chronologies” pawl hi a tlang pi in tial mi a si. Cherhchan mi cauk cu “Marvin Perry tial mi, Western Civilization: A Brief History, 4th Edition” chung ta pawl a tlang pi in lak mi a si.
Comments
Post a Comment