Chin Parliament (Hluttaw) cu an lim luklak cang i a muisam a hung lang. Hakha khualipi i a ummi Chin Parliament Building nih hin Chinmi zeitlukdah kan si timi langhter (define) khawh. MP le acozah party lawng si lo in nihin Chinmi hi hmailei tthangthar mino nih kan tuanbia zeitindah an hun chim te lai? Khuatlung mileng nih teh Chinram le miphun hi zeitin an kan ruah ve lai?
Miphun le ram kong rorelnak, ceihnak hmun a simi Chin Parliament Building nih Chinmi nunphung, muisam le kutzung a langhter khawh ding hi a biapi ah chiah a herh ngaingai. Cu bantuk a ruat lo i bantuk caah rianttuan aa tim lomi Chin MP le Cozah a si ahcun hmailei ah thim ti ding a si lo. Aruang? Kan nunphung tthanchonak a tuah lo. Chinmi/ Mino hna kutzung thiamnak, pupa kutzung thiamnak (Creative mind) zei ah a rel lo i hunchoter ding a ruat lo. Thil thar (Innovation) chuah khawhnak a ruat kho lomi an si. Mah pawl hmanh an ruah lo ahcun miphun dawtnak a um kho lo, miphun dang uarnak le mah pumpak minlanghnak le a zawn lo ah Power abuse tuah a si.
Nihin minung nih zeidah kan roh ta hna lai? A deumi maw kan roh ta hna lai? Miphun dang uar tuk maw? Myanmanization maw? Americanization dah? Nationalism maw? Nihin minung, biaknak le ram hruaitu (power ngeitu) hna nih hin a ralaimi minung hna nih zeitindah hun kan theite hna seh ti kan duh? Nihin kan tuahmi hi hmailai ah kan lungput le sining cuai a thlaitu si te lai.
Chin Parliament An Sak Liomi:
USA i Capitol Hill style in an sak. Mah hi an sak hlan ahhin USA bantuk in kan sak lai tiah an rak chim cang. Ruahnak cheutu zong an ngei hnga lo maw? Asiloah USA rumro cu maw an uar hnga? tiah ka rak ruat. A ruang cu Copy phun khat a si. Pahnihnak ah Vawleicung Parliament tampi hi an nunphung, biaknak, asiloah an miphun sinak he aa pehtlaimi kha an miphun kong ceihnak i hmanmi Inn (parliament) caah aa tlaak bikin an suai-sam in an sak cio. (Foto: Pu Thla Hre/ Facebook/private)
Chinmi bantuk miphun fa a simi hna le Parliament inn zeimaw zat kan hun langhter lai.
1. Sami Parliament of Norway:
1. Sami Parliament of Norway:
Norway ah Sami cu Myanmar i Chinmi bantuk an si ve. Asinain Norway nih anmah tein rorelnak nawl an pek hna, i Parliament an ngei. An Parliament hi Sami pawl an tuanbia an inn sak ning he aa naihbik in an sak. Pupa kutzung an zohchih. Sami pawl hi Economic le Defense lawng ah Norway nih a uk hna.
2. Australia Parliament House:
Britist/ England in a peemmi lawngte an si i European deuh an si ko nain Parliament of Australia, Canberra i a ummi hi Europe ram Building muisam a keng lo. 1988 ah Queen Elizabeth II nih onnak a rak tuah piak hna.
3. Parliament of New Zealand:
New Zealand zong English siangpahrang aa hrawmmi, mirang tampi an pemnak a si nain Copy an tuah lo. An ram le miphun an sining he aa tlaak bik in an suaisam i an sakmi a si.
4. Parliament of Kachin:
Kachin hi Chin he unau kan si tiah ruah a si. Kachin hi Pathian nih a cawisan tuk ve hna. Kanmah bantuk in Myanmar ah nunphung dang te a ngeimi a si. Parliament an sak i an ramri Tuluk zong an Copy lo, anmah nunphung le kutzung he aa naihbikmi in an sak. Mah hi an lungput hi nihin an unau Chinmi nih kan tluk hna lo timi hmailei ah thangthar an i fiang tuk te lai. (Foto: Salai Benezer Bawi)
5. Parliament of PNG:
Papua New Guinea an Parliament hna hi zoh tikah an miphun, nunphung le sining he i tlaak in an suaisam ning hmuh khawh a si.
Tampi a um rih. Europe nunphung aa naihniammi an tam caah an innsak ning zong aa lo len hna lai. Asinain nunphung a dang bakmi miphun a hleiin miphun fa pawl nih an nunphung, biaknak, tuanbia le sining kha an Parliament, politics le zatlang ah langhter an i zuam peng. Politician, MP, ram rian ttuanmi hna nih an miphun nunphung, kut-zung, khuaruahnak le biaknak an cawisan lo, an tthanchoter lo a si ahcun cu bantuk cu ram le miphun a dawmi hna nih hrial an hau.
Like / Share
Kahin Vawleicung Parliament Inn dawh pawl zoh khawh si.
Comments
Post a Comment