2000 kum in a derthawm ngaimi le Cold War ah a mualpho luklakmi Russia cu Putin nih hruai a thawk i nihin tiang amah nih nawlngeihnak a tlai. 2000 kum i a chuakmi kha tutan an ram president thimnak ah Vote a thla khomi an tampi cang lai i an chuahka in nihin tiang a uktu hna a simi Putin an va uar zong ah an mawh hnga lo. Asinain Putin lawngte nih kum 18 ka si tiang a kan uk hi cu a dik lomi a si, tiah a ruatmi zong an um ve.
Vladimir Putin hi zeiruangahdah mah ti a lar i uartu tampi a ngeih?
Russia president a si hlan 1990-2000 kum karlak hrawng hi Russia cu Cold War ruangah harnak a rak tong. Boris Jelsin cu president (1991-1999) a rak si i an ram tthancho tthannak ding zeihmanh a rak tuah kho lo. Zu ding taktak a si i a mualpho a rak tam ngaingai. Soviet Union zong a rak tlai kho lo, i ram tamnawn a rak chuahter hna. 1999 ah Chechya cung zangfahnak ngei lo in Russia nih a rak tuk. Mah hi Prime Minister thar Vladimir Putin nawlngeihnak ruangbik ah a si tiah ruah a si.
1999 december 31. ah Boris Jeltsin cu Parliament le a ram mipi nih an uar lo tuk cang caah a rian a chuahtak kong TV in a rak thanh hna. Prime Minister thar a simi Putin cu caan karlak president (acting president) a rak si chung.
Cold War ah KGB-sungthoh a simi Putin nih a sifak tukmi ram Russia ah uknak a van tlaih tikah Boris Jeltsin bantuk si lo in lungfim tein ram a hruai. An ram i a biapimi Insititution vialte: Biaceihzung, phunghram, media tibantuk a kut ah a chiah (control) dih. An ram tthancho tthannak ding, an miphun man le an biaknak (khrifa) phung hna biatak tein upat pek le tthawnter kha ai hmaithlak. Ralkap tthawng le hriamnam tthattha ser tthan ai zuam i an ram chung ral siseh ralhrang asiloah Vawleicung ral tuk le kham aa zuam. Ramkhel kong ah amah a dodaltu paoh cu sau a nunter hna lo hmanh ah cawl kho lo ding in a doh peng hna. Mah hi ruangah ramkhel ah a dotu mah tluk hin a kham a thah hna bu ah a rammi tampi nih an uar tuknak hi a si.
a tang ah cabia aa peh!
 |
| Relchih: president Obama chan ah Putin nih Obama knockout in a thongh |
Russia phunghram ah president caan (term) hnih lawng peh khawh a si caah a caan thumnak cu a zumhbik le a chak a tlaih khawhmi Dmitrij A. Medvedev cu 2008 in president a ttuanter i amah cu Prime Minister rian a rak i pe. Asinain amah nawl lo in Medvedev nih thil biapi ah rian a rak ttuan kho lo. Zumh a tlak caah 2012 thimnak ah Putin nih Prime minister rian a pek tthan i a nih cu President (term khat i dinh hnu a si caah a ttuan kho.) a si i 2018 March 18. hi thimnak ah a lut tthan.
Vladimir Putin nakin a rummi hi Vawleicung ah an um lai lo tiah zumh a si. Russia ah cun upat le ttihzah a tong i a kuttang i a mizumh an tam tuk caah president a si ti lo zong ah Tuluk President Xi Jinping bantuk in a nunnak ca phan awk a um lo. Asinain nawlngeihnak timi (powar) hi a thisen ah a khah caah a nun chung cu Russia uk a duh peng ning a lang.
Tutan thimnak an tuah lai zarh hnih ai duh ah Russia hriamnam hniksaknak le an ngeihmi hmuhsaknak a tuah. Cun Syria zong ah ral a tho i, Ukraine i khua pakhat an rak chuhmi cu kan pe ti hna lai lo tiah piang ko in a chim. Sungthoh 400 leng Russia ah an um ti zong a chim.
Atu ah EU, UK, USA nih biatak tein Russia cung an thinhunnak an langhtermi cu England ah Agent pahnih siivai in thah an timhmi hna kong hi a si. Russia kut a si ko tiah UK nih fiangte in a chim i USA le EU siseh NATO zong nih hi kong ah Russia sual an phawt. Mah hi cu Putin nih politics aa celhmi a si tiah ruah a si. Thimnak a phak lai ah a rammi tlirhkhonhnak bantuk ah a cang.
Relchih: Russia le Putin Huatu An Tamnak A Ruang
Putin a zuamcawhtu nu Ksenia Sobtsjak hi teinak a hmuh lo dingmi a fian ngaingai ko ti a si. Nain aa zuam lai. Putin zong nih amah minthatnak ding ah hi thimnak lut ding in a hnulei in rak bawm sehlaw theih lo a si tthiam ti a si. Anmah lawng nih an theih lai caah hi vial hin si rih seh.
Comments
Post a Comment