Chin State Cozah le CACC Rian A Si Lomi

CACC nih Idol a tuahmi kong siseh Chin State Cozah nih Chin Miphun Ni a tuah hnikmi kong ah kan ruahnak i dan cio khawh a si nain a tthabik hi ruat in kawl cio usih. Kan duhmi thil a tuah cangmi ram pawl le miphun hna sining zong zoh pah hna usih law, cuai thlai pah hna usih. Nunphung le zatlang sining he aa pehtlaimi ni le puai hna hi Cozah nih an tawlrel awk a si maw? Cuti an tawlrel thawng in kan miphun hi kan i rualremdeuh hlei maw? Miphun Ni a limhang a liandeuh maw?

Chin Idol

Chin Association for Christian Communication (CACC) nih Idol Hlasak Zuamnak a tuah tthan lai ti a rak si i atu a tuah cuahmah. Nunphung le Holh kilvengtu a biapi tukmi bu pakhat a si nain atu bantuk in Idol a tuahmi hi aa dawh cah lo ngaimi a si tiah Facebook ah a ttialmi an um. CACC nih a tuahmi bantuk Idol asiloah hlasak zuamnak cu a herh i kan ngeih ding a si. Cutin a si ko nain, CACC nih a tuah ding a si lo tiah avoi khatnak an rak tuah lio ah ka rak chim cang.

CACC nih cun pumpak siseh a phu in caholh le nunphung caah rian a ttuanmi pawl khi thangtthatnak le upatnak (award) a tuah piak hna ding a sideuh. Kum khat chung cauk tthabik, Album tthabik, hla tthabik, cattialtu thar tthabik, media phu tthabik tibantuk le Film tthabik tibantuk te hna sunglawi taktak in a tuah deuh awk a si. Idol timi min hi a poimi si lo, i an tuah hnawhchan zong ka theihthiam ngai nain pumpak, company pakhat khat nih an tuah khawh nakhnga lam an sial ding ah ka duh piak deuh hna i an tuah lo ding a si tiah ka ruah.

Ralkap uknak tang ah sau tuk kan rak um cang ruangah le nihin i hruaitu tampi zong cu ukning aa ziak tukmi an tam ruang zongah a si kho men, cozah chim lo Khrifabu hngatchan in dirhmu CACC siseh, cu bantuk bu dangdang zong cozah deng bantuk, company pakhat phun dedeng, party bantuk in rian an ttuannak hi si rih dawh a si. 

Chin Miphun Ni

CNF nih "Chin National Day cu tuah peng ding in Ralkap sinah kan hal khawh cang." an rak ti. Pu Hung Ngai CM chan a rak si. Mi tampi an i lunghmuih ngai. Chin Miphun Ni cu cozah ta zong a si lo, i bu pakhat khat ta zong a si lo. Dr. Liang Hmung Sakhong nih Yangon ah a rak chim, "Laimi ta zong si lo, Zomi ta zong si lo, Cho ta zong a si lo." Kanmah le holh cio in kan va auhmi khi a va si ko, nain Chinmi vialte nih kan sunhlawih i kan duhmi ni a si ti cu a fiang. Chin Cozah siseh CNF hruainak zong in Chin Ram ah Chin Miphun Ni tuah ding a si lo. 

Cu a si caah Chin State Cozah nih khawika khua le peng hmanh ah anmah min in Chin Miphun Ni hi an tuah ding a si hnga lo. Chin State Cozah nih Chin National Day hi a upat ding a si. Sihmanhsehlaw, mipi nih thimmi cozahpi nih Chin National Day caah an caan le ruahnak dih in an ttuan awk a si lo. Khua pakhat cio a si loah, peng pakhat cio ah Chin Miphun Ni tawlreltu kawmitti ser le i ngeih ding a si, i siangngakchia bu pawl siseh khua hruaitu pawl he zong tawlrel tti dingmi a si. Cozah min in cuka khua ah kan tuah lai tiah peng kip mino lam le hlasak ah auh hna tibantuk a si awk a si hrimhrim lo. An peng le khua kawmetti nih an ti khawh chung ttha in an tuah khawh ding tu hi Cozah nih lam a onh i a bawmh ding a si.

Chin Miphun Ni (CMN) cu zalen ni a si. Ka hmet lio ah cun lam kan rak zawh i Chin Miphun Ni kan lawmh. Cu hnu ah hmun pakhat ah i ton i nuamhnak phunphun tuah a rak si. Tuchan zei a lawh ka thei lo nain biachim sau le miphun dang khual lian tibantuk upat caan in kan ni sunglawi a dih timi cu Video zoh ah hmuh khawh a si i ngaih a chia ngaingai. Mah hi Cozah nih a tuah ruangah a si i cozah nih a tuah chung cu kan zalen hlei rih lo tinak a si ko. Ngakchia, mino le siangngakchia hna nih kan miphun ni philh lonak ding caah tuah ding a si, mah le mah upat i peknak ding caah tuah ding a si lo. Cucu CMN muru he aa kalh. 

Chin Miphun Ni ah khuang zong cawi ding a si lo timi a tang ah relchih.

Chin State Cozah le CACC nih an tuah ding an rian khi keimah nih ka chimh hna lai tinak si lo, a chim kho hna ding zong ka si lo. An rian a si lo tiah ka ruahmi ka chim duhmi a si. A um len rih lai. Communist ram le ralkap ukmi ram pawl nih an tuah mi pawl hi Mipi nih thimmi cozah nih cun a si khawh chung in hrial ding a si timi cu mipi siseh thimmi hna nih hngalh ding a si cang. Hi bantuk tete hi ziknawh le eihmur donak caah a dawntu, cu bantuk a thawktu an si.

Photo: myanmar international tv