A Ṭhadeuhmi Pehtlaihnak le Nangmah

May 14, 2013 (09:27): Tu zing hi tu kum may thla chung ah avoi khatnak zingka ka hmuh a si, suimilam 6 ah ka tho. Cu hlan cu ka thawh tlai peng. Tu zing ka thawhka in thaithawh ka ei, lakphakti ka din pah in Facebook ka kau i ka hmuh hmasabik cu News Feed chung i status le comment pawl an si, tlawmpal ka rel. Mi cheukhat cu duhnak kong ah lungrawk bia a simi an ttial. Acheu nih cun zuun ngaihnak an tar. Pathian bia le a dangdang ttial khi cu um rih ko seh minung le minung kar ah i dawtnak, i pehtlaihnak le rianttuantti khawhnak ding caah dawntu a simi tampi ka hmuh.

Nu le Pa (nungak tlangval) iphiat le ithen khawh le cangka in mi va duh colh le duhnak ngeih colh khi a herh lemmi a si lo. A biapimi cu a dih cangmi kong hi na cohlan khawh a herh. Duhdawtmi he iphiat le tthen paoh khi a fak dih lo, nain a fakmi pakhat te kha a faktuk sual kho. Cu tikah duhdawtmi he itthen ruangah faktuk in na lung a kuai a si ahcun a thiangbik le a tthabik in khuaruat law, na lungthli tum a tlin lo hmanh ah duhdawhnak timi tonnak caan tal ka rak ngei tiin hnemh khawh i zuam.

Cun zeitindah mi ka duh in ka dawt khawh tthan hna lai timi he hmailei ah na kar hlang. Asinain duhdawtnak timi hngalh nih a sawh duhmi cu na duh caan paoh ah ipehtlaihnak pakhat in a dang pakhat ah i tthial kha a si lem lo. Asinain dawtnak caah hmunhma pek nai timhmi nih a sawh duhmi cu dawtnak hi a sung na pe lo, tinak a si ko hnga. Nungak tlangval i pehtlaihnak kan iruah lo ningpi in a dih a cat tawn kho ko, asinain duhdawtnak hi huatnak ding a ruang le dawtnak a um lo ti zumh ding a ruang um lo.

Nangmah le nangmah kha zeitikhmanh ah mi ka duhdaw kho ti hna lai lo tiah ai ruat hlah. Mah cu na ruahmi nih tthawnnak an pe hlei lai lo. Voi khat na rak ton balmi duhdawtnak zuun le nehnaang ah an taptertu a si deuh. Cu nakin a zual deuhmi cu na caah a dih rih lo, tinak a si. Cucaah duhdawtnak he caan thar dang pe rih, a rat tikah dawn hlah law amah tein rianttuanter ko.

Dawtnak nih na thinlung innka a hun kingh tikah kau pin on piak law, a thar in a tluangmi duhdawtnak he ipehtlaihnak ser khawh tthan i zuam. Lungkuainak pinlei ah nunnak a um peng rih ko, i ruahchannak zong a um zungzal rih ko.

Bayern FC i a chuihmi Ribery cu a nupi a duhdawt tuk caah Islam ah a lutmi a si. Islam phung ning in a si khawh chung in zu a hrial. Bayern nih pakhatnak an lak tikah Germany phung ning tein beer i tawih le itheh a si tikah "kei cu nan ka toih hrim lai lo." a rak ti cia ko hna nain Bayern hnukham Boateng nih ai lawmh tuk ah a philh i a hei tawih. "Zeitik hmanhah Boateng hi ka chawn ti lai lo." tiah media ah a chim. Mah cucu anmah Bayern FC caah a tthami a si lo. An chuihtti mi an i chawnh lo le pehtlaihnak an ngeih lo ahcun an ttangtti kho lai lo.

Cu bantuk in a simi cu, Laimi hi ramkhel rian kan ttuannak ah siseh, khrihfabu, nunphung le zatlangbu ti bantuk rianttuannak ah pumpak kong hi faktuk in kan thlir cawi tawn. Meeting kan tuah zong ah ceih dingmi kong ah si lo in pumpak irem lo le pehtlaihnak a tthat lomi ruangah ceih duhmi ceih kho lo in kan meeting a thi lengmang. Kan bu caah rian kan ttuan kho lo. Kan khua caah kan ttuan kho lo i kan ram le miphun caah kan ttuan duh ning in kan ttuan kho ti lo.


A leng ah aa rem komi hna zong meeting ceihhmai nakah ihmuh thiam lo ruang i a leng ah ai hua thaimi kan tam. Pumpak rak irem lo ruang ah mah hi bu hi ttha kho lai lo ti ruahnak ngeih a tam, i zumh lo a tam. I zumhnak a um lo tikah i pehtlaihnak a chiatter, a fek kho lo. Kan rem hna lo mi minung ruang ah bu rian kan sawtphelh, a zeipaoh kan doh huam. Bu pakhat nih a ttuan awk a simi ttuan lo in bu chung minung i ngiar in kum kan liamter. Kan ruahmi cu mah nu/pa he hin cun zeitin hmanhah rian kan ttuantti kho lai lo, ti a si kho men.

Nungak tlangval pehtlaihnak lawng a si lo, kan zatlangnun, khrihfabu le miphun ningpi in kan i hawikomhnak le pehtlaihnak hi a tthadeuhmi chuak ai kon tiin a thiangmi le picalmi khuaruahnak he caan thar pe rih hna usih. Pumpak in rak irem lonak a um zong ah kan tuah ballo mi thil tthadeuh tuah khawh nak ding ah ttuantti ding kan si ahcun ruahchannak le thinlung thar he hmai kal tti hna usih.

Zeitik hmanhah kan pawngkam, zatlangnun, khrihfabu le miphun kong ah thil tthadeuh a chuah khawh ding lam le sul a um tikah sawtphelh lo in mah cu a tlin khawhnak ding ah lungthin thar he hmaipanh in pehtlaihnak ngei kho hna usih. Hlan i hmuh thiam lonak le irem lonak kha hmuh ton pakhat le fimchimtu pakhat ah ilak khawh izuam sih law a ttha deuh i hawikomhnak le pehtlaihnak ser hna usih.

J.F Kennedy nih "Na ral cu ngaithiam, asinain an min vai cinken" a ti. Nizan ah, cu hlan ah nan rak i rem men hna lai lo. Atu zong ah nan duhnak ai khat hnga lo, asinain bu le miphun cu nangmah duhning in a si awk a si lem lo caah zapi duhnak ihrawm ko law, cu hlan kan palhnak kha philh lo in palh ti lo ding tu in i zuam hna usih. Palhnak le sualnak kha biaceih awk ah ichinchiah si lo in, palh ti lo nak ding caah a si awk deuh a si.



I zumhnak a um kho lo ti le mi zeihmanh zumh an tlak lo ti ruahnak kha na lung ah chia hlah law na hawi, na miphun le nangmah velchum a um mi vialte hi ruahchannak a pe khotu na si ko lai. Pehtlaihnak ngei lo in minung hi kan um kho lo. Pehtlaihnak cu pakhat le pakhat i zumhnak thawng in a fek kho in a ttha kho deuhmi a si.

A tthadeuhmi pehtlaihnak hi hawikom kar, kan zatlangnun, kan miphun le vawleipi ah a um khawh ding ser kan i zuam. Asinain nangmah pakhat na bau ahcun kan tlamtlinh lai lo. Nangmah pakhat nih mi dang nun zong na thlen khawh, ttha lei in. Cu bantuk in kan khrihfabu, kan zatlangnun, kan pawngkam le miphun kar ah a tthami pehtlaihnak cu nangmah nai tel ve lawng ah kan ser khawh lai.

#NOTE: May 14. 2013 i ka rak ttialmi ka rel tthan i rel cio hna seh ti ka duh caah ka postmi si.