Suu Kyi Cozah Le Myanmar Daihnak

Myanmar State Counsellor Pi Suu Kyi he pehtlai in theimi tlawmte a cuaithlainak ka rak ttialmi tete a um. Ramkhel rian ttuanmi pawl an sawisel (ေဝဖန္) hna tikah "mi ttuan cia sawisel cu a fawite, ttuan ve cio u," a titu, anmah lila chung zong ah an um tawn. Europe le nitlak ram pawl ah cu bantuk cu ka thei rih lo, rammi le miphun ca i a ttuanmi hna hi zei thei lo mi nu/pa siseh, press, oppositions party le an ttuanmi a theipitu hna nih hmuhning le ruahnak a phunphun he cuai an thlai hna, an sawisel ko hna. Cucu Demoracy a muru a si. Remdaihnak a um khawhnak ding caah a si. (ေဝဖန္) hi Sawisel in ka hman thai lai.


Nihin tiang (kan va duh tuk caah a rau tuk in kan theih zong a si kho.) Myanmar ah remdaihnak a um kho rih lo. Democracy taktak kan si rih lo nain phungning thimnak in a chuakmi mipi cozah 75% nih hruaimi ram a si pinah mipi le cozah pehtlaihnak/izumhnak (transperency) a biapitning a chimreltu Suu Kyi hruaimi cozah a si tikah nihin i kan tonmi dirhmun in cun sawisel lo awk a ttha lo. Myanmar chungtel Chinmi dirhmun in sawisel lo awk a ttha lo.

Thailand i Tlangcungmi pawl biaruahnak tuah an timhmi kong ah NLD cozah nih theihpinak min an thu duh lo timi kha Facebook ah nan rel cio lai (a ttialtu ka philh) ka zumh. Cozah pakhat nih a nawl cu a si, Ralkap uknak chan ah khan cun hal a rak hau lem lo.

Relchih: Lungkar mai tenh in Suu Kyi

Asinain zeiruangah dah State Counsellor nih a ram chung um tlangcungmi hna tonnak tuah dingmi cu a duh lo? Cun Media/press hrial khawh chung in a hrialmi hmuh khawh a si i zeiruangahdah a si hnga? Panglong ah siseh, Union Level Peace Conferences zong ah Ralkap cozah bantuk in NLD cozah nihhin Myanmar i mi tamdeuh a simi Kawlmi hna zawn lawng a ruat ko lo maw? Hi biahalnak hi nan hmuhning cio van chim kho ulaw ka duh ngai.

July thawk ah Kachin Baptist Convention cu an ram ah a rak ton hna. Kachin ah cozah ralkap nih an kah lengmang rih nain State Counsellor dirhmun in va ton hna hi Kachin caah a sawsawh a si lai ka zumh lo. Zeihmanh tuah kho lo cun a um lai lo. Daihnak kan ser hmasa lawng ah ram a tthangcho lai, a ttha lai ti cu a chim lengmang. Hi bantuk tampi a tuah khawh ahcun a tthadeuh lai tiah zumhnak ka ngei.

A hnubik Mandalay peng Myay Taing Kan khuate a tlawng lio zong ah khuami nih Electric, Sii-inn, sianginn tibantuk an hal. Khuami he tonnak i a rak chimmi cu "Mipi nih nan theihthiam awk ah ka duhmi cu remdaihnak kan ser lio a si. Daihnak um lo ahcun ram a sersiam kho lo." ti a si.


A dikmi si ko. Kan pom khawh cio ko. Asinain cuka i a chimmi tampi lakah pakhat cu Cozah kong poah cu Cozah chuahmi thawngca/tv lawng nan ngaih lai tiah ruahnak a pek hna. A chim duhnak cu cozah media a si lomi paoh zumhtlak an si lo ti khi a si ko. Cucu atu Hakha i Chin State Cozah zong nih an i tlaih. A dik ngai fawn. Cozah thawngca/tv hi rel le ngaih ding a herh tuk ve. Asinain cucu thawngpang le thil sining kan theihmi cuaithlainak ah hman ding a si. Media zeitluk in a biapit ti cu chim kan hau ti men lai lo, Chin online news Site vialte!!!!!

Relchih: Mi vanchia Suu Kyi

Myanmar ram huap cozah siseh, ram tthen cozah zong nih innka khar khumh silo in rianttuan piakmi rammi he pehtlaihnak (communications) tthadeuh in ngei kho hna seh, remdaihnak biapi ah an chiahmi kong hna hi ngamhtlak tein chimrel le i ruahnak tuah kho hna sehlaw thil tthadeuh a si kho ding ah ka ruah. 

Atu cu daihnak ser an duhmi miphun/ramtthen pawl le mipi kha zeirel lo bantuk, an duhnak biapi ah chiah piak lo in Kawl miphun kha hmaisuang ah chiah bu in i chawnhbiak a si ruangah a par an phan kho rih lo. Tlangcung mi pawl le rammi duhnak ngaihpiak le ruahpiak an i tim lo. Mah hi ruangah izumhnak a um khawh rih lomi hi a si, nihin tiang zong Suu Kyi ka zumh khawh rih lo hi a si. 

A cozah belte, mipi thimmi an si bantuk in Ralkap nih an rak tuah khawh lomi le an tuah lomi mipi caah tampi an tuahmi hmuh khawh a si. Asinain rampi remdaihnak kong ah an tuahmi a tlawmtuk, an fum tuk. Mipi nih an dirpi tha an pek peng khawhnak ding ah fakdeuh in ram daihnak kong hi an i zuam rih a herh rih. 

Cu bantuk an tuahnak ah ralkap an lawhnak pakhat cu sawisel hi a huat, an ttih. An mipi le remdaihnak tuahpi an duhmi hna Tlangcungmi sinseh zumhtlak a simi pehtlaihnak an ser khawh a herh. Sawisel an ttih awk a si lo. Ramkomh bu miphun vialte nih an duhmi le an authawng hi ngaihpiak le ruah piak i zuamdeuh sehlaw a khulrang deuh hnga. 

Photo: Newsok