(March 2016 - ChinDigest): North Korea nih Atom-Bomb in hrocernak thar a tuahmi hi "uico a bomi" bantuk in a tuah taktak lo ding i hrocernak sawh a si. Nihin tiang ah Rocket a kah, atom-bomb a hneksak an ti a tam nain Internaional Law a buar lo caah a ram mipi khi tluk an tuarnak cu South Korea le "Marvel Hero" an tambiknak US nih an zoh sawh ko hna. Western nih vawleipi hi kan tlaih (Controll) ti an langhter duhnak ah N.Korea aa hrocer paoh i an hriamnam le ralkap tthabik an i chuah lengmang tawnmi tu hi ttih a nung deuhmi a si.
Atom-bomb in aa hrocernak a ruang:
Korea aa tthennak a ruang cu Communist le cu he aa ralchanmi Ideologies ruangah a si i USA bawmhnak in kum tampi hnu ah South Korea cu Democracy ram timi ah aa chuah. Communist ram North Korea uknak cu Kim te chung nih an i roh i nihin ah cun kum khua in a no tuk mi Kim Jong-un nih a hruai lio a si. A no tuk rih caah le Kim pennak a chan a sauh cang caah N.Korea rammi nih an celh lonak, ramkip fonh bu hna nih an hrial i chawleh innka an kharpiaknak ruangah a pennak thlau ding a ruah caan a tam cang. Cu a si caah amah a leirawi kho ding, uknak a chut kho ding le a zumh lomi paoh thah le hloh in caan a hmang.
Rel ve: Nobel Prize Hmumi Hna nih Vawlei Kong An Chimmi
Atu cu Kim pennak chung ah le North Korea ah a biapi tukmi caan a phanh ding a si caah a ram mipi siseh a kut tang uktu bawi hna le ralkap hna pinah an party hrimhrim a uk khotu hruaitu ttha le a tthawngmi a sinak kha langhter a duh. Cu a si caah South Korea, USA le Democracy ram pawl hna sinah ram tenau an si lonak, ram tthawng an sinak le ram dang nih tlirhkhonh khawh menmi an si lonak kha hmuhsak aa zuam.
Cu caan cu a ralaimi May 2016 ahhin North Korea nih a hmasabik le avoi khatnak Party-Congress an tuah ding hi a si.
A cung i ka chim cang bantuk in 2016 kum thawk in Kim Jong-un nih ralkap thazang a langhter pah lengmang hi a ruang a um. Kum 36 chung ah voi khat hmanh Party-Congress an rak tuah bal lo i a ruang cu hngalh a si lo nain tu kum May ahhin avoi khatnak an tuah lai. Kim te chung nih Communist party an hruai chung ah 1980 kum lawng ah khan Party-Congress an rak tuah, mah zong cu Kim Jong-un a pa Kim Jong-il nih an pabik le North Korea sertu Kim Il-Sung rian a chaan ding kong ah a rak si.
Kan theih cio bantuk in Kim Jong-il a thih ah khan Party-congress tuah lo in a fapa Kim Jong-un nih uknak a tlaih colh. Hi uknak a tlaih ahhin a rak no tuk. Congress tuah rak si sehlaw, uktu ah an thim lo kho men, a buai zong buai kho mi a rak si.
Atu i Party-congress a tuah hnikmi hi zeidang si lo in Kim Jong-un nih Congress hmang in a dirhmun fehternak le ramkhel kong i nawlngeihnak fekte in a tlaih khawhnak caah a si lai tiah North Korea kong a zohtu hna le ramkhel kong a hngalmi hna nih an purhdah.
Kim Jong-un hi a pa Jong-il politics he aa dang ngaiin ram hruai aa zuam. Cuti kan chim khawhnak cu a ram sipuazi le atom-program hi a biapibik in a chiah caah a si. Mah hi zong hi Europe, Switzerland i sianginn a rak kainak aa tthathnempi khawhmi a si ti khawh a si fawn. A pa chan i ralkap thazang hi biapibik a rak si i Kim Jong-un nih indirect in ralkap cu a tthawnter ve nain a biapi in sipuazi hi aa hmaithlak.
Tutan party-congress zong ah sipuazi kong hi fakpi in a ceihpi hna lai tiah an ruah i reform a tuah khawh lai ti zong ah ruahchan a si. Tuluk he pehtlaihnak a fehter lai maw, asiloah zeitindah a thlen te lai ti ruah awk ngai a si. Zeica tiah UN le USA nih Tuluk cu NorthKorea kong ah fakpi in an sawisel, i NK hi na thlahdorh tuk an ti. Asinain chawlehnak ah hawikom an sinak cu a tlau lo i Tuluk nih fak in a sii bal lo.
Mino a si rihmi Kim nih a rammi si hna seh, politics ah a hawikom pawl sinah amah hi hruaitu ttha le Atom-program fekte in a tlai a serchuah khomi a sinak kha hmuhsak a duh hna. Cuti a si tuah khawh a si ahcun Kim te chungkhar nih a chanchan in uknak an tlaihmi hi communist party le rammi nih an al kho hna hnga lo.
Atom-bomb puahnak dingah hmeh ding kep te khi an ngeih a si ahcun an ral a simi democracy ram pawl nih an ttih hna lai. Cucu an ruahmi a si i February chung ah rocket siseh a dang a puak khomi pawl zarh fatin nawn in an rak puah. Kim Jong-un nih USA le South-Korea hmai ah zeitluk indah a dir khawh timi cu rammi sinah langhter a si.
Russia president Putin nih a rak chim balmi cu; “mihrut lawnglawng nih ralpi pathumnak a chuahter lai,” ti hi a si i Ukraine kong ah Nuclear a hman sual lai ti phang in Journalist nih an halmi ah a rak lehmi hna a si. Cu bantuk in Kim zong nih hin amah nawlngeihnak hi a tlau lo nakding caah, a dirhmun a feh khawh nakding caah le an chungkhar politics a nun zungzalnak ding caah aa hrocer i a rammi lungton aa zuamnak lawng a si ko lai tiah ka zumh.
Photo: BBC
Note: Chin Digest nih 2016March ah an rak chuahmi a si. A thar in kahin ka tar.
Comments
Post a Comment