Gallup International nih Vawleicung ah zei Ram dah pekchawnhnak asiloah mi bawmhnak tambik a tuah/pemi an si ti hlathlainak a tuah. Cu kong ah biahalnak pathum a tuah.
Kan hnu thla chung ah:
1. Mihar bawmhnak (dam lo, pum tlinglo tibantuk ca pawl) na pe maw?
2. Bu pakhat khat caah zaanghlei cawi in (free in) rian na bawm maw?
3. Mising (na theih bak lomi) bawmh a herhmi na rak bawm maw?
Gallup International nih ramchung mi nih zeitluk indah pekchanhnak an tuah timi theihnak caah a cung biahalnak pathum hi a tuahmi a si. An umnak ram, zatlaang caah zeitluk indah ram mipi nih rian an ngeih kong an i theih timi khi theih an duh fawn.
An hlathlai khawhmi ah a luancia thla ah khan 1.4 billion nih mihar bawmhnak/ thil ttha a chuah khawhnak ding caah phaisa an pek/hlut, i 1 billion hrawng nih an caan hi cu bantuk thil ttha a tuahmi Bu a siloah bu pakhat khat caah an pek. 2.2 billion nih an hngalh lomi mising an bawmh.
Gallup nih ram 140 i minung 145000 biahalnak a tuah hnu i Report a pekmi ah Economy, rian lo umnak, ngandamnak le zaanghlei cawi duhnak tibantuk vialte pehtlaihnak an ngeihter. Asinain ram rumbik timi lawngte hi pehchanhnak ah a tthawngmi an rak si lo.
Myanmar hi hlawh a niambik ram pakhat ah ai tel nain tutan i tahnak ah hin teitu a si diam.
Ramkomhbu Kawlram cu Ralkap uknak ruang ah a min a rak chia, atu ah Rohingya pawl kong ah a min a chia, an sawisel ngaingai, Asianin pekchanhnak le zaanghlei cawi rian i bawmhnak kong ah Vawleicung ah a teitu ram an um lo.
– Myanmar cu Buddhist nunphung a tthawn tuknak, laksawng le kutput pek a tam pinah an pura siseh Temple ah zaanghlei cawi in rian an ttuan tiah Gallup nih report a pek.
Mah i thil thar a si lo. The World Giving Index 2015 ning in The Guardian nih November 2015 ah Myanmar cu pekchanhnak ah pakhatnak an si, tiah a rak ttial. 2016 thawk ah khan cun Independet ning ah USA, New Zealand, Canada le Europe ah UK hi an rak i chang hna i atu i Gallup International nih a thar in a thanhmi ah Myanmar pakhatnak a si tthiam caah Guardian nih aa chirhchanhmi WGI hi a hman ko ti khawh a si.
Kawlram ahcun a phunphun caah (chuahni te hna, a thi ciami chungkhat ca te hna tibantuk) Ahlu/pekchanhnak an tuah hi a tam. Cu pinah rammi nih tlangrian bantuk in asiloah khua caah, biaknak caah tibantuk caah man lo in kan ttuanmi a tam. Hi vialte ruang ah vawleicung ah pakhatnak a sinak Gallup hmang in a lang.
Pekchanhnak ah aa zuambikmi ram 10 le an hmark:
Myanmar 70
USA 61
Australia 60
New Zealand 59
Sri Lanka 57
Canada 56
Indonesia 56
United Kingdom 54
Irland 54
Uzbekistan 52
Kenya 52
Netherlands 52
Norway 50
The Week nih Kawlram kong a ttialmi te hi caan ngeimi nih rel ve te u.
Pehchanhnak ah ai zuam lobikmi ram 10:
Azerbaijan 21
Serbia 20
Hungary 20
Montenegro 20
Madagascar 20
Greece 19
Kongo 19
Palestinian areas 17
Yemen 17
China 11
Cc: Aftenposten
Photo: toursinmyanmar.com
Comments
Post a Comment