Mi Ram Tazacuainak Phung Sermi Kong Ah Saudi Arabia

29. September ah USA president Obama nih «Justice Against Sponsors of Terrorism Act», (JASTA) kong i Veto a hmanmi cu Senate nih an kham, an hnon piak. 

Congress nih an chuahpimi a si i hi phung an ttial lio tein White House nih USA caah thil ttha a si lo tiah ralrinnak a pek cang. Asinain Congress nih fehter hnu ah Senator nih an fehter ve. Cucu Obama nih Veto in a rak kham, nain Senate nih a ceih tthan i Obama Veto cu an lamh. 

JASTA timi cu 9/11 i a thimi chungkhar pawl nih mah Ralhrang a bawmtu tiah ruahmi Saudi Arabia tazacuai khawhnak ding caah ttialmi a si. Mah cu lawng a si lo, mah hi phung nih hin American vawlei ah ral a tumi pawl tazacuai khawhnak ding a si. 

Relchap: State of the Union le The Chosen One

Mah ti Obama Veto an hnon cu President caah ngaihchia le nungzak ngai thil a tuanbia ah ai tial ve ding a si. Sihmanhsehlaw, a dirpimi hi tuanbia (history) cawngtu hna nih an hon ruan tthan te lai tiah ka zumh. Hi kong ah keimah pumpak in cun Obama hi 100 ah 100 in ka dirpi hnga.


Vawleicung ah USA nih a herh bakmi SaudiArabia le American pehtlaihnak cu a rawk lai ti a fiang. Cu tikah Terror donak kong ah Arab ram pawl nih USA a bawmh lo ding khi a fiang fawn i US invests vialte hmanh kirter i sungh khawh an si. 

SAUDI Foreign Ministry (SFM) nih hi thawngpang an theih bak in American Congress cu a thar in khuaruat tthan ding in ruahnak le ralrin a pek colh taktak. Mah hi phung nih hin ttih a nung i a ttha lomi thil a chuahpi sual lai, (dangerous and serious consequences) ti a si. 

Relchap: President Obama Kongs

Mah hi phung nihhin Vawleicung ramkip caah dernak a chuahpi khawh i USA tel in a chialei a simi thil a chuahpi lai, tiah SFM nih a chim ti a si. 

Obama nih a rak chim lengmangmi cu mah hi Phung kan ser a si ahcun American zong hi mi ram nih tazacuai khawh kan si ve lai, aruang cu American nih mir am ah ralkap kan chiah, ral kan tu tiah ralrin a rak pek cang hna. 

Justice hi ahopaoh nih ngahmi a si lo. USA nih Iraq i ral a tuk ah a thahmi chungkhar vialte nih JUSTICE an hmu lo. Kan duh dih nain mi zeipaoh nih kan hmuh khawh lo caah «let go» a herh tawn. Tutan i Senate biachiahnak cu a poi ngaingai khomi a si. Sept. 11 ah a thimi hna chung an di a va riam sawk lai nain a ralaimi kong ruah ah a poi ngai.