Tu kum USA President thimnak cu thla hnih hrawng te lawng ai duh cang. Mah hi caan te ah Democratic in aa zuammi Hillary Clinton a damlonak thawngpang nih a party cu an thin a domhter hna.
Hillary Clinton (k. 68) cu tu thla chung lawng ah a tluk dengnak voi thum hmuh khawh a si. A hnubik cu 9/11 kong he pehtlai in a chuah lio ah a si. A vanlawng cung zong ah a tlu deung i bia a chimmi a dih hlan ah hruaichom in a rak ngol.
Cu ti a si ah vawleicung i a harbik, a buaibik le rian tambik a simi USA President ttuan ding ah a si kho lai maw, ti biahalnak a chuak colh cang.
US President thimnak tuanbia theih tawk ah Hillary Clinton lawng hi si lo in, an ngandamnak kong hi an rak lih ttheo tawn. Tahchunnak ah John F. Kennedy, kum 43 a si ah US President i kum nobik a rak simi cu Addison timi zawtnak a rak ngei, nain a chungkhat pawl nih siibawi pahnih hmang in "a dam tuk ko," tiah media sinah an rak chim. 1992 i Democratic party aiawh in President cuh ding Bill Clinton he a rak i zuammi Paul Tsongas kha Cancer a rak ngei, nain a rak thuh.
Relchap: SUA 2016 President Candidates Kong Tawi
Franklin D. Roosevelt zong Polio in a rak zaw i president a si hlan in theih pah a rak si nain a hmanthlak pawl ah lengke in namnak a tlawm, hmanthlaktu nih a taitang an thlak ahcun an Film an rak chuh hna ti ah Time nih a ttialmi rel khawh a si. Woodrow Wilson zong mi ngandam lo a rak si i a nupi Edith nih President a rak ttuandeuh ti khawh a si. 1893 i President a rak simi Da Grover Cleveland zong kha Cancer a rak ngei, i a rak thuh khawh.
Zei a si hmanhah, atu ning in Hillary a damlonak a zual i kan hmuhmi nakin a zualdeuh a si ahcun, phundang in chim ahcun an thuhmi a zawtnak pawl a puan sual ahcun President thimnak cu amah le a party caah a poi tuk ding a si.
Hillary Clinton cu a remlotu pawl nih "Lihchim" an puh bik. Email kong ah biapi in zumh lo a si.
President aa cuh ding le a ttuan lomi nih an zawtnak an thuh tawn ko, nain a taktak tiah cun an thuh awk a si lo. An zawtnak nih hin biakhiahnak an tuah tikah a dawnh khawh hna, i an ruah loning in ruahkhiahnak a chuak kho.
Cucaah Hillary Clinton nih a lung in a duh tuk ko zong ah ttavel a hlonh i President zuamnak in aa ngol ah a tthabik lai, tiah keimah pumpak in ka ruah.
A zawtnak ruangah President cuh hi ngol sehlaw zeidah a cang hnga? Trump caah a ttha tuk lai tiah a ruatmi an tampi kho men.
Joe Biden nih a chaan khawh.
Republican le Democratic party nih hin hi bantuk caan i President cuh ding kong ah phung an ngeih veve. Hillary ai ngol a si ahcun tulio i Vicepresident a ttuanmi Joe Biden nih a chawn ding hi a si khobik. Asinain an party nih a dang thimnak nawl an ngei, i Bernie Sanders (an party aiawh zuamnak final i Hillary nih a teimi) zong hi an thim ve khawh ko. Atu ah Hillary nih ai thimmi Vicepresident khi Auto in a kai kho lo.
Republican zong an i khat, a thar in party conference an auh lai, a siloah an party i nawlngeitu/hruaitu nih mi thar thimnak nawl an ngei ve tiah CNBC nih a ttial.
Relchap: Ahodah nihdah Trump hi mahtluk in a kaiter?
Acung i ka chim bantuk in Trump ttanhtu an i lawm ngai kho men. Trump zong nih "a dam zawk ding ka duh" tiah bianem a chim. A ngaingai tiah Emails kong ah Hillary hi ka tei lai tiah Trump nih ai ruahchan ngai i Joe Biden hna nih Hillary a chawn ding cu a duh tuk lai ka zum lo.
Cc: NTB/NRK/Bloomberg