Bible timi cauk cu cahlun le cathar in tthen a si. Cahlun ah cun Juda miphun kong kha tamdeuh in a langhter. Cathar ah Khrih kong le Zultu Khrihfa pawl kong a langhter. Bible cu Khrih chuah hlan kum 200 le a chuah hnu kum 300 karlak thilcang pawl le tuanbia hna kha cauk ah ser a rak si i Hebru holh deuh in rak ttialmi a si.
Biathli in a khat:
Cauk sasawh a si lo. Miphun pakhat thawhkehnak le chanchan in an tuanbia hna le uknak pinah zumhnak le a fekmi pennak kong aa ttialnak cauk a si. Hi cauk chung i biathli hna hi fian an har i a hmanmi namber pawl nih thuhmi thil «Code» ngei sehlaw cucu nihin tiang kum 2000 hrawng chung ah ziah ahohmanh nih an hngalh khawh rih hnga lo? Hi namber vialte hi suallam an ngei hnga maw? Vawleicung ah aa thupmi thil kawlnak caah hman khawh a si in hmannak a um hnga maw?
Mah hihi ka ruahmi a si. Bible nih namber tam tuk a hman, i zeimaw caan ah cun hmuhsaknak, asiloah a cang ding kong a chimchungmi namber (code) hna an si hnga maw ti ka ruah caan a um. Tahchuannak ah Israel pawl kha Moses nih kum 40 chung ramcar ah a helpi hna, i cathar ah Jesus cu ni 40 bak rawl lo in ramcar ah a um. Cun Israel miphun 12 an si i Jesus zultu kha 12 an si ve. Hihi pehtlaihnak an ngei hnga maw, asiloah chimh a kan duhmi a um hnga maw? Ka hngal lo. Nain Bible chung i namber pawl ka von langhter hna lai.
1.
Biakam hlun chung i a biapibik a simi cu Pathian pakhat (1) lawnglawng nan biak lai timi a si, i Bible cauk ningpi i biacah lak ah a biapibik a si fawn. Mah cucu nawlbia pahra lak i a pakhatnak a si rih. Sualnak cu mi pakhat thawng in a ra i mi pakhat thawng in ngaihthiam kan si, tiah biakam thar ah a ttial.
2.
Bible chung ahhin namber 2 hi a caan ah pakhat a si i a caan ah an i tthen. Pa le nu cu pakhat an si, i Noah lawng chung ah saram pawl cu a khuahkhuah in an lut. Biakam thar ah Jesus nih zultu hna kha pahnih cio in a thlah hna. Nawlbia pahra cu lungtlap 2 in aa tial. Matthai chung kan rel ahcun lam pahnih a um.
3.
Biakam hlun ah Jonah cu ni thum chung ngapi paw ah a um. Pa, fapa le thiangthlarau tiin Matthai ah a ttial. Jesus cu ni thum hnu ah a tho tthan.
4.
Hebru ca in Pathian min cu «YHWH» ti a si i cafang pali a si. Ezekiel 1:5 ah thilnung 4 a hmuh hna, i cu thilnung timi cu Daniel cauk ah saram pali in an lang. Thawngttha pali a um. Biathlam chung ah vawlei kil 4 kong a chim. A tampi rih.
6.
Pathian nih a ni 6.nak ah minung a ser. Sahrang namber 666 aa thawknak zong a si. Namber paruk (6) cu a tling lomi tiah an sawhter.
7.
Pathian cu a ni 7.nak ah aa din, i a sermi cungah a lungtling. Cucaah namber 7 cu a tlingmi asiloah Pathian namber tiah chim a si ttheo. Naman ralbawi pa cu Jordon tiva ah voi 7 aa hnim, i Israel pawl nih Kanan ram an luh pah ah Jerico cu voi sarih an hel. 7 hi Bible ah voi tampi a hman.
10.
Biakam hlun ahhin namber 10 hi a tel lengmang. Avoi khatnak ah Israel pawl nih Egypt sal in an luat khawh nakding ah Moses nih Egypt pawl sin i a tluntermi harnak le fahnak phun hra hin a lang. I Moses sin ah Pathian nih nawlbia pahra cu Sinai tlang ah a pek.
12.
Namber 12 hi biakam hlun le a thar ah an lang. Bible chung ah a biapi takmi a si lai, a langhnak a tam. Daniel cauk cu dal 12 a um i Danial 12:12 rel ahcun phun dang ngai a si. Israel cu miphun 12 in an lang i cu miphun hleihnih a hringtu hna an pa cu Jacob a si. Biakam thar ah cun Jesus zultu 12 in a lang, i minung 5000 rawl a dangh hna ah a zultu nih rel 12, an khomh. 12 a hmannak a tampi.
40.
Kum 40 chung hi ramro car ah Israel miphun cu Pathian nih a hneksak, i a hruai hna tiah kan hmuh. Moses nih Sinai tlang i nawlbia 10 a lak kha ni 40 a rau. A dang pakhat cu buanchukcho a tlun lio ah Noah nih a sermi tilawng cu ni 40 le zan 40 hnu ah tlang ah aa din. Biakam thar ah cun Jesus hi ni 40 chung ramro ah a um i tukforhnak zong a ton. Jesus a thawh hnu ni 40 ah vancung a kir. Ninive kha Pathian nih ni 40 chung ah hrawh a rak timh.
70.
Egypt ah minung sawmsarih an kal tiah Genesis ah a ttial. Minung 70 cu Israel hruaitu ah thim an si, i Juda miphun cu kum 70 chung Babylon sal an tang. Daniel cauk ah zarh 70 tiin a ttial. Jesus nih mi kha a let 70 in an ngaihthiam hna lai tiah a kan cawn piak.
90.
Zumhnak i pa a simi Abraham nupi Sarah cu kum 90 a si ah fatir a ngei, i Isac a si. Mah cu nih biakam hlun ah kum upabik i fatir a ngeimi a siter.
99.
Abraham cu kum 99 a si ah a cuarpar amah tein aa tan. Pathian nih a fialmi a si.
300
Noah lawng sermi kha 300 cubits a si. Meter in cun a sau 156meter, a vaang 26meter le a san 15meter a si.
390
Pathian nih profet Ezekiel cu ni 390 chung na kehlei khel (a sir) in na it lai tiah a chimh, i Israel sualnak caah a intermi a si. Cu ni 390 a dih tikah ni 40 chung cu Juda mi hna sualnak caah a orhlei khel in a ihter tthan.
666
Biathlam chung ah 666 kong aa tial. Mah hi minung sinak langhternak zong ah an hman. Sahrang namber ti a si i cu sahrang cu hodah a si hnga tiah nihin tiang a kawltu an um.
969
Bible le tuanbia ah a kum saubik cu Noah pa, Metusalem a si i kum 969 a nung.
1000
Solomon nih nupi 1000 a rak ngeih. Nutak 700 le nuchun 300 an si.
2285
Moses nih nawlbia 10 a laknak tlang Sinai cu 2285meter a sangmi a si.
Note: 2010 i kan umnak State chin mino itonnak ah Bible caminpuai phit ding ah ka rak khawmhmi a si.
Comments
Post a Comment