Ka hawipa nih Richard Stoneman ttialmi "The book of Alexander the Great, A life of the Conqueror" timi cauk laksawng ah a ka tthenh, tlawmpal ka rel i 2014 ah Greece ram i an hmuhmi thlaan pakhat kong ka rak ttialmi ka lung a chuak tthan[a tang hmanthlak khi click law rel khawh si.]. Careltu hna nih zeitindek nan ruah ve hnga, kum hnih hnu ah a kong tlawmpal in hon zoh tthan hmanh usih.
Greece ram cu an cozah leiba nih a siifak tukmi ram ah a hon chiah tikah European Union nih biatak tein an rak zuan hnawh hna lio a si, i an ram caah a biapi tukmi hlanlio thil pakhat an hmuh caah an rak i lawm ngai, Tourist caah a ttha. Asinain an hmuhmi Thlaan hi aho thlaan dah a si hnga? Nihin tiang an hngal lo, an i al lengmang rih ti a si.
Alexander the Great maw a nu thla dah deuh dek a si hnga, asiloah anmah chan i mirum pakhat thlan cu dah a si hnga? A dang pakhat cu Alexander hawi tthabik Hephaistion caah Alexander nih a tuahtermi hna thlan cu dah a si hnga? Tuanbia thiam pawl an i al len ko.
 |
Relchih: Mah Hi Thlaan A Congtu Hi Zei/Hodah A Si Hnga? |
Hephaistion thlaan a si lai tihi bia chuak thar pakhat bantuk ah a cang. Alexander nih a hawipa philh lo nak caah thil a rak serter hna, temple/thlaan dek a si ti an thei set lo. A hawipa cu Persia ah ruah lopi in a thi i Alexander nih a hawipa a thih hlan kum khat ah Babylon ah thlaan mak tuk a rak serter cangmi hna a um i cuka ah cun a vui ti a si caah Hephaistion hrang a tuahtermi hna hi thlaan si dawh a si lo. Nain cu a sertermi hna an lim hlan ah Alex cu a rak thi. Hephaistion ca i an sermi ah Alex hi an vui hnga maw? A si kho lo tiah an ruah.
Amphipolis i an hmuhmi hi ngun lawngte in kilogram thong tamtuk in sermi a si, i a kum in a rau lai ti cu fiang tein an tuak khawh. Alexander nih a hawipa Hephaistion caah a sertermi hna a si hmanh ah amah zong a hawipa thih hnu thla tlawmte chung ah a thi ve. A fawinak in a hawipa ca a sertermi a si ahcun hi thlaan hi a lim manh lo. A ralbawi le a hawile nih mah hi thlaan ah Alex an vui ta maw timi cu ruah awk a si, zeica tiah khawika ah an vui timi hi nihin tiang theih lo ding in a hawile nih lungtlinnak an rak ngei. Alexander a thih hnu ah aho nih dah mah vialte tangka dih in Hephaistion thlan cu an ser duh lai, hodah nawlngeihnak a ngei hnga? Alexander tu an vui in a dih tiang an ser lawlaw ding hi ruahdom awk a ttha ngai, nain Alexander thlaan a si lo ti ding ah "Hephaistion" min hi an ttial tami zong a si kho fawn. Cun Amphipolis khua hi Hephaistion timi Alexander hawipa he aa pehtlaimi tuanbia a ngei lo, ti a si.
Did the Amphipolis Tomb Commemorate Hephaistion? ti a ttialtu nih cun Hephaistion min a um ko caah le a dang biafiang char awk a um lo a si ahcun Hephaistion ca i sermi cu a si ko lai tiah a ruah.
Alexander the Great hi zeitindah a thih?
A thihning cu siivai a din caah a si tiah an ruahbik. Kum 20 a si in Siangpahrang a ttuan i kum 33 a si ah vawleipi a rak uk dih deng, a thi. Raltuk ah an rak tei lo, anmah chan i hngalhmi vawlei a cheuchum cu kum 11 chung ah a rak uk. Asinain ruah lo piin Khrih chuah hlan kum 323, Babylon a thi i a ruang an hngal taktak lo.
Mi tampi nih cun a ralbawi pawl nih an thah tiah an chim. Zeica tiah nichuah lei ah a kalpi hna i an ram kir ti lo in a kalpah in a tuk i a teimi paoh a uk, a tei hlan lo a tuk fawn hna. An ram an ngai, harnak tampi an ton fawn tikah Alexander cu rak kan kirpi cang an ti i Alexander nih uknak le nawlngeihnak a za ti a hngal lo i a rak duhlo caah a si, an ti. Cucaah a ralbawi le hawile nih a dinmi hrai ah siivai an chiah i a din le a thi, tiah an zumhbik.
Cheukhat nih cun Hephaisiton zuun in a thi, an ti ve. A dawtbikmi a hawi, asiloah hawi ttha lawng si lo in a ihpi tawnmi nungak bantuk in a hmanmi zong a si kho, Hephaistion a thih hnu in a rak i phundang ti cu tuanbia ah a lang.
Asinain a dang pakhat cu tlangrai in Malaria aa ton caah damh kho lo in a thi tiah an chim ve. An ram in nichuahlei an kal ahhin nikhua aa dang, a lum a kik, ruah lakah an kal tikah a rak zaw lai ti a si. 1998 i tuanbia thiam hna nih an rak tuak tthanmi cu Typhus a si lai tiah a thih lai hrawng a umning an zohnak in an zumh.
Caan a kal i vawlei tuanbia ah minthang a simi Alexander kong cu hlat a dai lo. Nai hrawngbik i a thih ning an zumhmi cu Thihsii/siivai a din caah a si, timi hi a si bik ko. New Zealand i hlathlaitu phu Leo Schep nih an hmuh khawhmi cu Elexander hi a dinmi Wine chung ah a tthawng tukmi siivai aa tel i a thi ko tiah an chim ve.
Keinih cun ruahmi ka ngei lo, Hi thlaan hi tuanbia ah a sunglawimi cu a si lai tiah ka zumh i Greece ah tourist an kal duhnak a ruang pakhat a si te lai timi tu cu ka zumh. I hi kong hi ka lungah a um ngai caah ka relmi chung in kan hrawmh ve hna a si.
Comments
Post a Comment