A Sining Aa Hngal Lomi Chawlro

Chawlro nih zeicudah chawlro a si a hngalh hnga, min a ngeih hlan zong ah a rak um cang si lo maw? Fingtlang hna nih an um ve hi an hngal lai lo. Zeitluk a sangmi tlang hmanh khi a cung i a kheumi ram nih a lonh tawn. Minmei zong a hmun lo, a zaam i a ttian ko. Hi thil vialte a sertu Pathian pekmi fimnak le kan holh lila in hi vawlei cu kan ser i kanmah ta ah a rak cang.

Dap cu a tla, hawrha ah aa cang ko. Vur zong a tla i hawrha ah a cang. An sining an i hngal lo. Rili tawne nih ne a ngei lo. Ka pa, ka nu kan ti. Bawnbawk le mantaat, zeidah an hngalh? Chungkuh le chungchep timi min lo in an nun ko ttung. Hi thil vialte hi khuaruah khawhnak kan ngeihmi le kan holh cio nih a ser i man kan ngeihtermi an si. 

Tlang sang ah a parmi senri le maw chokhlei, nan i dawhnak in nan thuamh Lairam, sinain nan hngal lo. Faiceu le vaurawng dawhnak zong kan holh cio in kan hlawi ko hna, zei miphun dang holh van dah hai hnga, ka nu? Awtaw nawlcawng langak maw tam tuk? Vakok nupa tahchun hna maw Lai leng le val, na holh le ca maw hlaw lai kaw, Pathian pekmi bia le hla.