Russia President Nih Leicung Ram Thangcho Bik Tuluk A Tlawn

Russia president Vladimir Putin nih chawlehnak leiah a tthangchobik le a ruah hlan te ah USA a lonh kho ding Tuluk ram cu 20. may ah a tlawn. Xi Jinping, Tuluk president he an i tong i rianttuan tti ding lungtlinnak an ngeihmi hmun 49 hrawng ah min an thu tti lai, tiah zumh a si. Khat lei in atu lio i Shanghai ah an tuahmi Asia runvennak (asian security) kong an ceih zarh ah a va tlawn hi a si caah chawleh kong lawng si lai lo, tiah an lunghrinh.

Russia le Tuluk hi aa naihniam ngai zong an rak si, communist chan in. Asinain a luancia kum 25 lio i Sovietunion a rak si lio ah Mikhail Gorbatsjov nih Tuluk a rak tlawn hnu in tutan i Putin nih Tuluk a tlawn hi ram hruaitu lutlai avoi khatnak an i tlawn a si. Ukraine kong ah nitlak ram pawl nih Putin cu ton an duh lo lio ah Tuluk nih cun innka a onh i aa tlawnter.


Tuluk a tlawnnak a ruangbik cu gas i zuarh kong ah a si. Russia nih Tuluk ah billion-dollar man zuar a duh i mah cu kong cu a tlawn hnawhchan bik a si. Putin nih aa ruahning ah ni khat chung ah lim dingmi cu hnatlaknak an ngeih khawh lo, ti a si. Cu an ceihmi cu Russia nih kum 30 chung Tuluk cu gas in cawm ding le energy, transport tibantuk pawl an si. An ram hnih in kum hra chung an i al cangmi gas man kong ah an lung an i tlinh kho veve rih lo, tiah AP nih a ttial.

Hi an itonnak ah Ukraine kong zong an i ruah i an pahnih ning in an chimmi cu Ukraine buainak hin a rannak in daih ding le cozah ttha te he dir tthan ding a si. Cun Russia nih Asia ah kaudeuh in rian a ttuan khawhnak ding le a gas hi Europe bantuk in Asia ah zuar ding ai timhnak zong a chim. Cun internet tthat lonak, anmah cozah pawl dotu a sinak kong pawl le Beijing nih cun party pakhat uknak a sawiseltu simi paoh kham le hrawh an i timhnak kong zong aa tel. Nai kha Russia ah cun Twitter an phih piak hna.

Asian Security kong ceihnak ahhin UN bawi Ban Ki-moon zong a um ve caah Putin he iton ding in timhnak an ngei. Amah Putin hrim zong cu Asia Security kong ceihnak ah ai tel ve lai. USA nih Japan dirpi in tikulh an i cuhmi kong ah Tuluk cu an hrocer tawn. Cu bantuk in nichuah laifang (afaghanistan, iraq tbk.) cu chuah tak in nichuah lei ah kan kal cang lai, tiah US nih an rak ti i atu cu Asia buainak ah US nih a hnatunbik lio a si fawn. Russia nih US lornak hi a duh hrim lo ko.

"Tuluk cu kan hawi ttha a si. Kaupi in rian kan ttuantti lai, i ai chawnhbiak ding ah Tuluk cu a pakhatnak a si," tiah Putin nih a tlawn hna lio ahcun a chim. US le EU nih cun tulio cu Putin ton an duh lo lio, sanction an tuah lio cu a si.

China-sea nichuah-chaklei ah Putin le Xi Jinping nih an ralkap pawl raltuk cawntti ding in an i tim. Cucu Japan ramri lei a si lai, Japan he an i ertai tuk lio ah an ram ri i Russia he ralkap thazang langhter cu an buainak a zualter khawhmi a si. Asinain Russia le Tuluk i dawtnak caah a biapi ve, 1991 i Soviet a pur hnu in politic, chawleh le ralkap lei ah an dir tti lengmang- i USA nih chilh le lonh dingmi cu kham awk ah an i zuam tti peng.

Chawleh lei ah a tthancho tukmi Tuluk hi ram kip nih komh khawh an duh i an i zuam. Cu bantuk in US zong nih a si khawh tawk in aa zuam ve nain naite ah Tuluk nih US i company pawl thilri an fir tikah US cu a thinhong ngaingai. US le Tuluk pehtlaihnak a hrawk khotu a si ti tiang ah ruahmi a si.

Note: Zanlei rawlchuan pah in von thaimi a si, thawngpang phun deng in a si caah a rel harnak a si, bultan tan in ka ttial ve.