Tutan Ukraine buainak nih mi lung a hlauh ngai ko. Asinain caan pek in ka rak ttial kho lo i atu cu a daihlei a si pah cang. Laimi catial tete an tam chin lengmang ve le Facebook a ngeimi nih cun nan rak rel pah cang lai i an blog-pawl zong ah rel khawh an si rih.
Thil pakhat kong, buainak pakhat khat kong a siloah thil phun hnih kar buainak kong kan chim duh le an kong kan ceih duh a si ahcun mah cu thil sining cu fiang tein theih hmasa a herh. A buainak a ruang le aa telmi hna an tuanbia theih hmasa lo in an kong ceih piak le sualphawt hna awk a si lo. Cu bantuk cu khuaruat khomi hna nih an tuah awk a si lo.
Cu kong he pehtlai in a tang ahhin dawk-cat ngai in ka ttialmi a um i a reltu paoh nan lung a tling lai ti cu ka zum lo. Mah hi buainak a hrawm thawk in dawi i chim le ttialmi a si lo caah cabia tawi in a tlinh lai lo. Nain a rel huam nih von rel ve te ulaw ka ttial duhmi muisam cu a lang kho men ko.
Quebec asilo ah Northern Mexico nih independent kan si tiah anmah tein hon dir hna seh, uk i tim hna sehlaw a zuang hmasa bik ding cu USA an si i Russia cu naa thlak awk a si lo, kanmah hmun a si, an ti ve ding khi a fiang tukmi a si.
Cu bantuk cu Tuluk zong nih tutan Ukraine buainak ah "Ukraine ram kan theihpi, ramri a ngeihnak kan upat," an ti ve. A ngaite tiah Russia a thil tuahmi hi a zeipoi lo. Aruang cu nichuahlei Asia ram tampi khi Tutluk chung ah khum aa zuam vemi a si i atu zong a phunphun in lam a kawl i aa zuam. Ram fate pakhat, mi ram ah aa benhmi nih independent sinak chim in cozah ser itim seh law a zuang hmasa sing cu Tuluk a si. Chinland zong ah Tuluk a zuang hmasa ko hnga. Cucu vawleicung "Geopolitic" a umtu ning cu a si.
Cucaah tutan i Ukraine kong ah Russia dirhmun hi nitlak ram pawl nih faktuk in an dir-onh le an sawisel colhmi hi khuaruahhar pah cu a si. Putin nih Syria kong ah USA a khamh bantuk in Putin hi a ngaite tiah cun mah tluk hin an ti rih awk a si lo, tiah ka ruah rih. Ukraine kong buainak bik a simi Crimea hi Russia kut ah rak pekmi a si i Russian millions in an um. Crimea ram hrawn rili hmun khi 2047? tiang Russia nih a ralkap chiahnak nawl a ngahmi a si. Crimea cu kanmah Chinmi bantuk ram ngeitu tlawmte an um ve nak a si i Ukraine nakin Russia tangah um kan duh deuh a timi an tampi ve. Cun Russia holh zong an hman biknak a si. Cucaah Putin dirhmun hi fawi tuk in sawisel awk a si rua lo.
Tu zarh chung ah Crimea aiawhtu upa hna cu Russia khualipi ah an kal i lawm taktak in an rak don hna. Cun, Crimea cu Russia ah i fonh kan duh tiah an chim. Ukraine he i fonh an duh ti lo, a siloah anmah tein independent in um i Russia he a zeipaoh ah i pehtlaih an duhdeuh timi an langhter. Ukraine cozah thar nih mah cucu an cohlang kho lo i phunghram ning in thil an tuah lo, an ti ve hna.
Putin nih hlan Soviet Union a rak i tthen hlan bantuk ah kir ding in aa zuam, ti ah purhdah a si i a zuam zong aa zuam timi a langhnak tete a um pah lengmang. A ttih zong an ttih tuk. Cucaah a rannak in NATO an rak sok i NATO zong nih Cold War ah Russia in a chuakmi ram pawl member ah ilak cu a rak i lep. Asinain tutan kong ah NATO timi min in an i thlakmi hi Russia nih a huat tukmi a si, i EU le USA min in cun "OK" a si. Amah zong nih khua tampi a ruah piak tthan hna.
Chim duhmi cu Cold War zong a si lo. Rampi pakhat a simi nih a ram innpa le hlanchan i a rak i fonhmi an sinak zoh in a herh ning in fimhlawm a timhmi hna kha a si ko. Cucu ram innpa a simi rampipa paoh nih an i timhmi a si fawn.
Chinram nih independent khel in kanmah tein kan iuk lai ti seh law, Civil war a chuak lai i a tlangtla hmasa ding cu Tuluk, India le Japan tibantuk an si lai i Russia le USA cu i thlak hlah an ti men lai. Cu lio ah UK nih ka rak pen balmi an si, tiin aa thlak ve lai. Cucu a rian a si.
Khatlei in Putin an ti tukmi hi a ttha tuk lo tiah ka ruahnak cu Ukraine cozah aa thlen ning hi thisen luan hnu ah a si pinah an president cu Russia ah a zaam. Atu cozah chung zong ah Ukraine rammi nih an duh lomi mi hrawkhrol an timi hna an tampi tthiam ko i Crimea lawng si loin anmah Ukraine miphun hrim ah an i tthen. Cucaah cozah thar an kai lio i Russia nih Crimea a luh hnawhmi hi khat lei cun a ttha tiah ruah khawh a si, aruang cu Russia ralkap lut hna hlah seh law anmah Ukraine rammi "civil war" hmanh a chuak kho i thisen tampi a luang hnga. Cucu Putin nih a kham khawh tiah ruah khawh a si.
Cun thisen aa nehmi US political party nih cozah an tlaih lio si sehlaw atu nakin an zual lai i thisen hmanh maw a luan caang. A ngaite tiah cun ralhrang kong ah Russia he an i bawmh hna lo ahcun a fawi lomi a si pinah US leiba billion in a champiak tu hi Russia a si.
Crimea kong ah Russia hi sipuazi le a dangdang phit in an rengh cuahmah mi hi a ttha tuk lo, a thla in a kum tal an zoh rih awk a si. Russia hi vawlei dang ah a ummi a si lo caah fawi telak in nitlak ram pawl nih an lehrulh peng awk a si ti lo. An ttih tuk awk zong a si hlei lo.
Comments
Post a Comment