Hmasabik thawng an theihka ah ahopaoh nih ruahmi cu terrorist an si lai, timi a si. 11.september 2001 hnu in cun terrorist min hi a lar ngai caah kan ruah colh ciomi a si. Cu hlei ah passport a firmi an um i pahnih cu an kai ve timi ruang ah an ttih khun. A pahnihnak cu pyanpee-suai (Jijacking) a si lai tiah an ruah. Pyanpee-suai timi cu phaisa/ thil pakhat khat a duhmi hna nih an tuahmi a si. A pathumnak cu Tuluk asiloah North Korea nih rocket in a kah lai, timi hi a si. A palinak cu vanlawng mawngtu zuu an ri a siloah an i hngilh i rili ah an tla. Hi kong he pehtlai in tling ngain biahalpangpa nih a tial ve.
Tu chan i technology a tthat tuk tikah vanlawng tthami tampi ah internet/skynet an ti i a um dih ngawt. Cucaah Pyanpee-suai hi cu zumh a har ngai, minung pakhat hnih nih khi tia le khi ngaw vanlawng pyanpee-suai khawh a si lai lo i mi an tam tuk caah internet hmang manh lo in an um lai lo, tiah ruah khawh a si. Cun vanlawng a ttum nak ding hrimhrim theih lo phung a si lo.
Terrorist nih bom i puah i a puak lai, ti zumh a harnak cu vanlawng a tlau i compuiter in vanlawng zohtu (radar) nih a thlaunak hmun rili hrawng ah zei neh le naang hmanh a um lo, um lo khawh a si lomi a si. Terror nih vanlawng cip cikcek in puah khawhnak ding bom an i luhpi kho lai lo pinah suimilam 2 chung lawng ah thil an tuah kho lai lo.
North-Korea le Tuluk nih zeiruang ahdah an kah lai? A si kho lomi theory pakhat a si. Aruang cu North Korea nih a ram in a kah a si ahcun Tuluk, Japan le Thailand tibantuk nih a rocket an tlaih khawh lai i a kah le kah lo cu theih a si lai. Cu bantuk in Tuluk zong nih a kah ahcun an theih ko lai. Atu lio cu Tuluk nih Asia ram fa tete a ngiar hna lio a si i USA nih khika hrawng ah a ralkap a chiah fawn hna caah Rocket phun cu an radar nih a tlaih khawh ding a si.
Malaysia vanlawng a tlaumi kong ah theory a phunphun an chuah. Asinain tu chan ah mah bantuk a si ahcun theih lo khawh lo chan pakhat a si cang caah amah le thil sining in tein khua a ruatmi hna nih cun an zum kho lo. Atang i video hi kum 20 a simi american siangngakchia pa nih a chuahpimi theory cu NTSB i an hotu nih a pompi kong a chimmi Norway holh a dih ah mirang holh in ngaih khawh a si.
Amah tu cu khawika ah a tlak timi cu theih khawh a si lo i zeitindah a tlau timi cu a si kho bik tiah ruahmi theory USA i siangngakchia pa nih a chimmi hi a si, ti a si. Hi bantuk lei ah leicung i min ngeibik a simi National Transportation Safety Board (NTSB) i an hruaitu zong nih a zumhpi ngaingai.
A vanlawng kha remh a haumi a um an rak ti nain remh lo in an zuantermi a si caah tutan ah a rawk lai tiah a ruah. Mah vanlawng phun hi leicung ah a himbik an timi phun a si i thil pakhat khat a rawh tikah Autopilot in a zuang, a Seh cu a thi fawn lo nain zeidang communication le a dang electric riantuannak vialte kha an thi. Cun oxygen zong electric a thih caah an ngei lai lo, i a um ciami kha an dawp lai, mi an tam caah an lungmit colh kho, a ti rih. Cu hnu ah Autopilot in datsi/diesel a dih tiang kha a zuang lai (Mah vanlawng kha suimilam 8 chung a nguhmi sii an rawnmi a si.). Cucaah Mah cu Sii/diesel dih tiang a zuan khawhnak ding hmun hrawng ah kawl a hau, i Rili ah a tla lai tiah a ruah bik.
A tlau an tinak hmun in diesel a dih tiang a zuan khawhnak ding hmun hrawng ah ruahnak vial kha rin i cu kulh chung ah kawl awk a si, tiah a ruah. [A tawinak in ttialmi a si i theory chuahtu tumblr hi mi tam tuk nih an len manh; http://mh370lost.tumblr.com/post/79214607814/what-happened-to-mh370
Atang hi NATS nih Europe chung vanlawng chawhleh ning a hmuhsakmi a si: Ref:NATS.earo
Europe 24 from NATS on Vimeo.
theihter sawh si ko, a si bik lai tinak cu a si lo.
Comments
Post a Comment