28. January 2014, USA an zanlei ah president Obama cu State Of The Union timi biachimnak a ngei lai. Fiangdeuh in chim ahcun atu hi ca ka ttial dih hrawng ah biachimnak cu a thawk lai. State of the Union biachimnak ahhin cun USA i politician hruaitu vialte, the House of Representatives le the U.S. Senate an tling lai. Cu pinah American ah mirum timi hna le USA a cawisangtu mifim thiam hna pinah zeidang thiamnak le thilti khawhnak a ngeimi mi vanttha pawl kha sawm chih an si lai. [atang hmanthlak khi tutan a chim ding a ttial lio a si.]
LIVE IN ZOH KHAWH SI
USA lawng ah si lo in vawleicung minung million tamtuk nih TV in an rak zoh ve lai i a bia an ngaih lai caah mah hi biachimnak hi USA president pakhat sinak dirhmun in hmailei kong, USA le vawleipi caah lam a hruaitu si khawhnak caan tthabik a si lai. Mah cucu USA president vialte nih kum 200 chung an rak hman cangmi a si. Tu zan zong mah cu caan ttha la in Obama nih 2013 chung zatlaknak i hmaimilh pah in bia a chim ve lai.
Aa pehtlaimi kong: USA President Sunghzatlak Kum, 2013
State of the Union biachimnak ah ro a lingmi tuanbia cheukhat cu zoh hlan ah tutan i Obama nih State of The Union i bia a chim dingmi hi kum dang tawnnak in mi nih an hna an tundeuh lai ee, tiah an chim. Atu lio Europe, Russia le Tuluk le Japan buainak pinah a dangdang thil biapi kan vawleicung le USA ah ai uam cuahmahmi pawl ruangah a si lai tiah ka ruah.
1) Monroe-doctrine tiah theih beh a simi cu president James Monroe nih 2. december 1823 ah USA dirhmun fehternak Congress ah a rak pekmi a si. Europe ram lian pawl nih america ah pennak le nawlngeihnak (colony) tuah ti hna hlah seh. USA zong nih Europe ram lian (UK, France, Portugi tbk.) hna nih an ukmi ram pawl he buainak tuah lo ding a si, nain America chaklei a si lo ah thlanglei ah ral a thawh a si ahcun cu bantuk thil cu ral ah kan ruah ve hna lai, a rak timi a si.
Mah cu bia cu a hnupi ah president Roosevelt, JF Kennedy le Reagen te hna nih an rak hman ve.
2) American civil war lio pi a si ko nain 1. december 1862 ah Abraham Lincoln nih sal zuatnak hrawh ding a rak chuahpi. - SAL hna luatnak peknak thawng i mi luat a simi (mirang/american) zong hi kan luat ti a fek lai (...) A daimi, phung (law) ah i tluknak nih a kan zulh lai i Pathian nih thluachuah a kan pek zungzal lai, tiah Lincoln nih a rak chim. Nihin ah sal zuatnak hrawktu President tiin philh lomi pa ah ai chuah.
3) President James K. Polk nih 5. december 1848 i State of the Union i bia a chim lio ah California ah suikhur (Goldrush) an hmuh kong a rak phuan. California le America nitlak rili tlanghrawng ah khin sui tamtuk an rak hmuh i khika lei ah mi tamtuk an rak peem ve, i nihin ah miphun i cawhnak le mirum an tamnak a si beh.
4) Ralpi 2nk. i USA ai tel hlan thla 11 ai duh 6. january 1941 ah Roosevelt nih State of the Union ah bia a rak chim ve i an ram himbawmnak kong a rak chim i zalonnak, democracy, zalongtein biachim le holhrel khawhnak, biaknak zalennak vialte kong a rak chim.
5) Bill Clinton nih 23. january 1996 ah a rak chimmi zong roling ngai a si ve. - Hmun khat te ah hmai ah kan nor tti hna lai, a dih ciami cu kir in kan do kho ti lai lo, i America hi pakhat ah ser in kan kal tti lai.
6) USA cu 11. september ah an rak phomh hna. George W. Bush president a tlaihka te a rak si i 29. january 2002 ah fak taktak in State of the Union ah cun bia a rak chim ve. North-Korea, Iran le Iraq cu "sualnak bawm" timi bia in a rak den hna, aruang cu terrorism dirpi i mi zalonnak hna nan hnawh, ti a si.
A dang a tampi lai. Cheukhat cu an mual a phonak a rak si ve. Nixon hna kha Watergate kong a chim kum khat tlin hlan ah a mual pho beh. A dang zong an rak um rih ko lai za rih ko seh.
THE CHOSEN ONE asiloah Designated Survivor
State of The Union biachim cu a biapi tuk i kan chim cang bang politician hotu hna an tling dih lai nain minung pakhat hi mah cu biachiamnak i biangaitu lakah ai tel kho lai lo. President a si loah, atu president Obama i a mizumh hna lak i pakhat te kha hmun dang ah congtu ttha taktak he a va um lai. Mah hi bia chim lio ah thil ttha lo chuak in USA hruaitu vialte an thih sual a si ahcun mah cu thim hleimi "The Chosen One" nih cu USA hruainak caah rian ngei bik a si ding a si.
American hruaitu vialte an tlin nak hmun ah mualpho thil sual a chuah a si ahcun mah an thimmi pa/nu kha president a si lai i president a chawngtu a si colh lai. Mah hi 1981 thawk khan an rak hmanmi a si i Ronald Reagen nih a mizumh Terrel Bell (education scretary) cu "thimmi" ah a rak chiah thawk.
George W. Bush nih 2006 i Union bia a chim lio ah "thimmi" a rak simi cu Jim Niccholson a si i ABC nih bia an ruahmi kha Yahoo ah an tial chihmi email check pah in ka von hmuh i mah hi ca ka von ttialnak zong cu a si.
- Mah bantuk thilsual mualphonak a can ding khi hei ruat, cu bantuk dirhmun kan ram ah a cang hnga i cu caan celngel i president ttuan dig cu a har taktak mi a si ko lai, tiah Nicholson nhi cun ABCnews ah a chim.
A dang pakhat 2011 ah "thimmi" a rak si vemi Ken Salazar nih "Mah hi cu a fawi lo taktakmi a si." a ti ve.
The chosen one cu president nih Union ah bia a chim hlan zarh tampi ai duh ah thim a si cang. An thim khawh bak in a himnak ding caah sungthoh le ralkap ttha nih an ngiat i an congh peng cang. White House i Chief of Staff nih a thimmi a si i zeihmanh hi kong chim lo ding in biakamnak a tuahter. White House chung i a ummi le i thuhnak vialte pinah president kong le a herh mi vialte kha chimh le hmuhsak an si.
1981 thawk in mah hi an rak tuahmi a si i "thimmi" ahodah a si timi hi nihin tiang phuan lomi an tam ngai. Asinain a tamdeuh cu cabinet members (president mi zumh deuh lawngte mu) chung in an si hna. Mi sasawh cu an si lai lo ti cu a fiang. Zei tik hmanh ah "foreign, defense le finance ministers cu "thimmi" an si bal lo." kong cu wikipedia ah khin hmuh khawh a si.
Mah hi a herh bak ko timi cu 11. september hnu khan a cang kho lai lo tiah ruahmi a cang kho lo mi a um lo timi nih a fehter khun ee an ti.
Thimmi a simi a tamdeuh nih ABCnews ah "thimmi" dirhmun kong an chim. An thim hna ning cu a rang taktak i rang taktak in an dih colh ve. President nih bia a chim lio vialte cu hmun dangpi ah TV in an rak zoh ve i an himnak ding cu president tluk in ven an si ve. Asinain president nih him le dai tein bia a chim dih hbak in mah cu "thimmi" an sinak cu a dih colh ve.
Ref; ABCnews, wikipedia, Yahoo.
Comments
Post a Comment