Christmas nan hmang nuam hna lai tiah zumhnak ka ngei. Kum thar zong lungtthawnnak le ruahchannak lianpi he kar nan hlang cio hna lai tiah ruahchannak ka ngei.
2013 chung ah kan tonmi a phunphun a um ko lai. Kan i chirmi zong a um lai i kan lung a tlingmi zong a um ko lai. Cu vialte cu khirh in kan remh, kan tuah nolh kho ti lai lo. Sihmanhselaw, damte in kum thar 2014 chung ah kan lut cio hna i 2013 kum nakin thil ttha tamdeuh tuah le lungfim tein zei thil paoh tuahnak caan ttha kan hmuhmi a si tiin thazang la in kar hlang tthan hna u silaw tiah ka bia ka von dom.
Christmas le kum thar rian le sianginn khar a si tikah hmunkip um u le nau, hawikom le sahlawh hna he iton caan a si ve caah kai manh kho lo ngai. Facebook zong ka rak i din duak, le international laimi thawngpang le boruak zong Forum ah carel lo cun theih a si ti lo. Kai manh deuh i ka rel lai ka ti ah a tam tuk hoi le thim awk thei lo in delete lawngte a si hoi. New Year Wish te zong kan i tuah kho ti hna lo, kai manh lo tuk tikah hohmanh mawhchiat awk nan ttha lo. Nan vantha :)
2012 kum tlin lai le dih zarh hrawng kha Caan a dir lai, a dong lai ti phun rumro cio kha a rak si. Sihmanhselaw 2014 zong dam le lawmte in kan phak tthan caah Pathian min thangtha ko seh. 2013 thawk January ah khan 2013 chung leicung ah a cang ding (international relation) tiah zumhmi tete an rak ttialmi khomh in ka rak ttialmi The Chinland Post website ah ka rak tar bal. Cu ka rak ttialmi ah biapi in ka rak sawhmi cu Asia nichuahlei kong hi a rak si.
Japan le Tuluk nih tikulh an i cuh lai i ral tiang an tho te men lai, tiah ka rak ttial. Cun thlanglei Asia i ram fa tete khi Tuluk nih ralkap thazang hmang in a ertau hna lai i hmun tampi lak a duh lai caah an buai lai. Cun USA nih Arab/middle east lei cu a za ngai cang tiin Asia leiah hmun a lak lai, timi ka rak ttial. Zakhat ah zakhat cu Asia buainak hi a lang rih lo nain Tuluk nih vanlawng zuannak ramri khamnak a tuah cang pinah atu tikulh an i cuhmi kong ah hlan tuanbia tiang in an phawh cang i USA ttheo cu a hei i thlak hoi, timi thawngpang cu international news rel pahmi nih nan rak theih ko lai.
2014 chung ah an peh rih lai tiah ka ruah. 2013 i a cangmi kha cu a thawknak lawng a si rih i duhsah in an buai rih lai. Culio ah Russia nih atu hi Cold War dih hnu i a cimmi Soviet Union cu a thar in ser tthan ai zuam cuahmah. Europe nichuah lei a ummi ram vialte le India he ifonh in sipuazi tuah tti ding in Russia president nih a sawm hna i lungtlinnak zong December chung ah khan an rak ngei kho hna. Cu nih ai tinhmi cu soviet Union ser tthan kha a si ko, tiah mi tampi nih purhdahnak an ngeih.
Cuti a si ahcun European Union caah thawngchia a si i USA caah aipuang a si lai. Atu lebang cu EU ah Europe nichuah lei ram pawl itel le tel lo ding kong ah an buai taktak. EU hi ramrum pawl lawng telnak a si ti phun zong a um ttheo i ram sifak cu telh a duh lomitete zong an rak um. Atu zong Soviet Union in a rak chuakmi ram tete EU ah tel ding kong ah an buai khun i EU nih a rian a tlolh a ti phahmi an um.
Ruah lopi in 2013 a cangmi philh awk a ttha lo ding cu NSA (USA cozah nih mi a ngiat hna nak) kong i Snowden nih Guardian hmang in a phuanmi hi a si. Cu kong cu laiholh in an ttialmi a um len i ka blog zong ah ka rak ttial pah. USA nih leicung ram hruaitu hna le sipuaizi tuahtu/company lianlian an biathli tampi a duhduh in a rak ngaih le a rak tlaih piakmi hna kha a phuan. USA a leirawitu a si tiah tlaih an timh nain a zaam manh i Russia ah atu hi a um ko. Cu thil cu EU le South America nih an huat tuk caah fakpi in USA cungah bia an chim. A hnu cun USA zong mithmai chiahnak a ngei lo phah. Atu hi USA tadinca lian pipi nih Snowden cu USA ah kirnak nawl pek ding le tlaih lo ding in an hal piak cuahmah. Snowden nih 2013 chung ah thlennak lianpi a chuahpi.
Union of Myanmar zong a ralaimi 2015 cozah thimnak caah fakpi in cawlcangh an thawk ve lai. Phunghrampi kong ah nikum hrawng rak buai ngai a si nain tu kum chung ah fakdeuh in NLD le Tlangcungmi pawl nih an nor rih ko lai. Cozah le tlangcung ramkheltu hna kar zeibantuk tiang a phak lai ti hngalh a si rih lo i phunghrampi kong ah tlangcungmi an buaituk a si ahcun an itinhmi hi caan saudeuh cu a rau rih te lai. Mah tein iuknak, ramkomhbu cozah tibantuk pawl hi tlangcungmi caah phunghrampi nakin a let in a rak biapi deuh. Phunghram ti tikah President i cuhnak kong kha biapi in NLD nih cun a chiah i tlangcungmi hna chung zong in ramdang ah saupi i thup in rammi sinak an lak hnu ah Kawlram ah cozah/president icuh te hna duh ruang i thlen ding timi nak in kan khelmi te hi a biapi ko ti duhnak si.
Lairam ah nikum nakin ramdang in a tlungmi an tamdeuh kum a si rih ko lai. Hi caan ahhin mino sianginn kailio mi hna nih tlunsawh lo in khuati le thil sining tthadeuh in ngiat le hmailei ah zeidah kan tuah khawh lai timi ngiat awk a si hnga. Upadeuh an tlun zong ah kan ram ah zeibantuk dah kan tuah khawh, kan ngeih khawh lai timi tete hi ruah chih cu a hau ve hnga. Ramchung sining cu ka tlung ve lo le ka thei lo.
2014 in a ralaimi kum pawl ah kan umnak a simi ram pawl, Europe ram hna le USA, Aussie le a dangdang ramrum pawl ah rian a har chin lengmang lai. Phaisa a har chin lengmang lai i a tthangcho hnik cuahmahmi kan ram ah nan umnak le sianginn nan kai nak ram in va kir i rianttuan le tthanchonak tuah zong in thlennak a um fawite cang. Lairam le kawlram ah kawlmi lak zong ah langte in rianttuan kho tampi chuah a herh khun kum a ra chin lengmang tinak a si.
Pathian nih nan sianginn kainak le nan rianttuannak cio ah lam in hruai ko hnaseh.
Comments
Post a Comment