Hika Le Khika I Thil Hei Benh Duakmi Pawl

Nihin cu ka hawile pahnih inn hlan awk an zoh i zulh ding in kai thawh. Ka phone betteri a rak dih celngel i khuachung kan phak ah kan itong kho ti hna lo. A leng ah um awk a ttha lo caah Tromsø khualai bak i a lian le a dawh takmi caruk ah ka lut. Suimilam pakhat hrawng anmah hngah pah in tadinca an chiahnak cabuai cung tadinca hi ka tawngh ta dih hna. Ka rel taktak mi article le tadinca cu a tlawmte. Nain mah cu rel ahcun nihin Norway thawngpang le vawleicung thawngpang a tling. Financial Time le Morgenbladet i ka relmi ka lung ah lut bik. Atang ah khin Myley Cyrus nih Bieber ruahnak a pekmi hei zoh chih te hmanh....

Wolf of Wall Street timi movie (tang ah trailer zoh khawh.) cu minthang director Martin Scorsese nih a thlak i leicung ah minthang a simi fitlaw Leonardo DiCaprio lem a cannak a si. Nai zarh khan Norway cu piah an thawk. America le ram tampi ah cun an piah diam cang. Holhleh a hauh caah caan a a la. Mah movie hi HD in ka hawile nih an download mi ka zoh ve. A zoh nuam, a tuanbia ka duh ngai. Investors le shareholder tampi a hlen hna i USD million tamtuk a ngeimi pa kong a si. Lih le hrawkhrawl in thil a zuar, sii a tawng i phaisa a ngeih tuk tikah nuamhnak tling a tuah ve. A hnu ah cun FBI nih a tlaih. Cu pa cu Jordan Belfort timi pa a si i a rak hlen hna ruangah chungkhar ai tthen le ai thatmi zong an rak um ko lai, sunghzatlaknak lawngte a rak pek hna. Cucaah FBI nih an liamter tthan pinah amah kong cauk a chuahmi vialte cozah nih a man an tlaih dih i a rak hlenmi hna kha an pek tthan hna. Cun chawlehnak lei ruahnak a pe hna i lahkhah a hmuhmi tamdeuh cu cozah nih an lak tthiam. 

Cu he pehtlai in tu zarh ah vawlei a culmi article pakhat cu Jordan Belfort bantuk minung Wall Street ah a rak ttuanmi pa nih a ttial. "Wall Street i ka ttuan a hnubik kum ah hin US dollae 3.6 million ka rak ngei - mah cu ka thin a rak hung tuk. Aruang cu a tam in ka rak hmu lo. Kum 30 ka rak si i cawm ding fa ka ngei lo, leiba cham awk zong ka rak ngei fawn lo. Zu tama pakhat nih zu a duh tuk bantuk in keimah zong phaisa nih a rak ka suai tuk." tiah a cabia cu Sam Polk nih a domh. NYTIMES ah a ttialmi a si i minung tam tuk nih an rel colh lawng si lo in ca zong an rak leh. Cu lawng a si lo, high school siangngakchia tampi zong nih ca an leh i an upatnak an rak chim. 

A cabia a rel duhmi nih von rel te ulaw, a Wall Street in a chuah hnu ah atu a cung i Wolf of Wall Street ttialtu Jordan bantuk in mi tampi a rak hlen hnanak nan hmuh lai. A hnudeuh cun a rak i chiar i a si khawh chung in mi sifak le a rak hlenmi hna bawmh tthan ding in a lung aa thlek. Mah cucu siangngakchia nih an uar i an fak ngai. Asinain ca an lehmi ah amah bantuk in paral ttha si an duh kong le Wall Street ah rian ttuan ve te ding an duh kong an chim. Nain Sam Polh nih an palh a ti hlei hna lo. Sihmanhshelaw phaisa hi a za ti theih a si lo i ngeih ah ngeih chin duh le mak theih lo a si tawn kong a cabia ah fiang tuk in a langhter.

Edward Snowden cu 2014 Nobel Peace Prize pek awk ai tlak tiah Norway i parliament chung in MP pahnih nih a min cu Nobel Commettee an pek. Snowden nih ralkap le hriamnam thazang in i ral le entainak a kham i ram khat le ram khat kar ah i zumhnak le tthadeuh in i pehtlaihnak a chuahpi, an ti. Snowden cu atu hi Russia ah ai dor ko i zei a tuah ti hngalh a si lo nain IT lei he ai pehtlaimi company ah rian a ttuan ti a si. USA cozah nih leicung minung pumpak siseh, cozah hruaitu hna le sipuazi tuahmi company tampi kha a thlite in an ngiat hna tiah a rak phuan. Amah cu CIA caah kum tam ngai rian a ttuan i CIA nih a hmanmi NSA an zungpi ah a rak tomi a si. Amah kong hi tlawmpal cu ka rak ttial bal i a rauh hla ah lai mekazin silole ka blog ah tling deuh in a thil tuahmi a ttha maw ttha lo, zeidah a cang taktak timi ka tial te men lai. 

Hlasa min thang hna lakah UK boy band One Direction hi 2013 ah phaisa hmubik, an hla a zuar khobik an si ee tiah Independent nih a ttial. Cu ti a si ahcun Eminem, Katy Perry le Justin Timberlake te pawl an lonh diam hna tinak a si. Atu lio i an hla larbik cu "Story of my Life" timi khi a si. Mah hi One Direction pawl hi UK prime minister David Cameron nih Russia ah "UK a teitu ram hi vawlei cung ah an um hnga maw? Kan tuanbia, kan literature, kan games le kan hla vialte." tiin a chim lio ah an min a rak chim chihmi hna a si.  Kum hmasa ah cun Eminem kha pakhatnak a rak si le Katy Perry le Justin Timberlake nih an rak zulh. 

Obama le Union i bia a chimnak ding kong ka rak ttial. Bia a chim lio zong kan zinglei a si nain ka rak ngai kho. A chimmi tamdeuh cu USA ram ca deuh an si i amah hi president ai cuh ding a si ti lo caah president a sinak le ngawlngeihnak hna hi a si khawh chung in hman le amah min tthatnak lei kawl ai tim tiin Congress ka hrial lengmang cang lai i president nawlngeihnak tampi ka hman cang lai a timi nih a langhter. Rian ah nu le pa i tluknak fakpi in a aupi i american nu hna caah ngaih a nuammi bia a si lai tiah ka ruah. Cun rian a ttuanmi paoh nih suimilam pakhat ah dollar 10 tal cu an hmuh awk a si, a timi cu US um laimi caah thawngtha a si. A chim ko ahcun a dirpitu a hong um cuahmah ko lai. [Obama cu amah party democratic senator cheukhat nih Union a biachimmi ruangah an rem pah rua lo, president thimnak caah dawntu a si ti lei in YAHOO ah an chim.] 

Sifah kan do lai, a timi kha ka uar. Cun vawleicung khuacaan (Climate change) hi minung nih tuahmi a si ko tiah a dirpi i ka uar ngai. Hlathlainak lei ah phaisa tamdeuh in kan pek a hau a ti i mah cu kanmah miphun ca zong ah bia ci ttha a si awk a si ka ti. Atu ah Laimi nih hlathlainak (research) kan bau tuk i mah hi ram kip laim nih biaknaklei le vawlei lei bu min in 1% tibantuk a pe khomi le rianttuan khomi um ahcun a tha tuk hnga. Cu lak i ka uar tukmi cu US nupawl an tthancho ahcun USA a tthangcho lai, a timi bia hi a si. Lai nu an tthancho le kan cawisan hna a si ahcun Laimiphun kan tthangcho lai timi hi kan ifian awk a si cang. China nakin kan tthangchodeuh a timi tu cu ka pom kho rih lo. A ruang cu USA i Atom-officer 90 hrawng hi hrawkhrol in caminpuai a awngmi an si, tiah tu zarh ah an theih hna tiah AP nih a ttial. An rian an dinhter hna lai. Ttih a nung tuk cu mu. Cu lio ah tuluk cu khi uknak an si ko nain fir cu an duh bak lo. Airforcetimes zong nih a ttial. 

Cacawng tamnak ram le cu bantuk a tlawmmi ram cu an rak i dang tuk timi Tunisia nih an phunghram an fehtermi ah a lang ngaingai tiah ka ruah. 2011 i vawlei a hnin tu Arab Spring ah Tunisia kha an rakfak bik. An rak buai tuk i an president cu Dubai lei ah a rak zam. Ben Ali cu Than Shwe te bantuk a rak si. Senri Mekazin ah Pum Za Mang nih fiang ngai in hi kong hi 2012 chuak ah khan a rak ttial. 

Nai zarhpi ni ah khan an ram phunhram a thar an ttialmi fehternak an rak tuah i 216 chung ah 16 lawng nih an duh lo. Mah cu phunghram fehter lio ahcun nu tam tuk an i tel ve caah arab tuanbia thar pakhar ah ai chuah. Nu le pa an rak i zatdeng, tiah Morgenbladet (MD) nih a ttial. Islam an tamnak ram a si nain an phunghram pi ah zumhnak nawl an ngei, cun an ruahnak le an duhmi paoh ruah khawhnak nawl an ngei. Islam cu an ram politics ah a tla tuk tinak a si. Asinain president cu Ismlam a si mi lawng i cuh seh timi an ngei ve tthan. Mah cu a poi tuk rua lo, aruang cu Norway zong ah siangpahrang cu State Church ah member a si lai i prime minister zong a si lai, timi a um ko. Nain biaknak kong i buainak pawl cu cozah cungah nawl a chiah, caah Islam cu tampi an cawl kho lai lo, phunghram ning in. 

MD nih a ttialnak ah Tunisia cu Egypt nakin cacawng an tam deuh a ti. Egypt cu 2010 ah an president an tlaih hnu in cozah thar thimnak ah Muslim Brother nih an tei i anmah an kai hnu in amah nih phunghram an ser, anmah duhning in an ser. Nu zong parliament ah an i tel lo i Mursi bantuk uknak ttha lo ah an luh caah a thar in buainak nihin tiang an chuak. Mah hi cacawng an tlawm caah a si ko timi an ttialmi ka rel tikah Kawlram zong khi ralkap lei cawnnak lawng a cawngmi ralkap nih Parliament ah 25% an ngeih caah a si i rammi nu tampi cacawng le mifim an tlawm caah a si ko lai ti ka ruat. 

Tu zan 31. january a dih tiang hi Europe football club pawl mi cawk le i zuarh khawh a si. Germany, Spain, Italy le France club pawl cu tthal ah dah ti lo tutan ah mi cawk an herh tuk hna lo. England ah cun Arsenal, Man U, Liverpool, Chelsea le Tottenham hna hi tu zan i an mi cawk le an mi zuar nih tampi lai a rel khawh men. Premier League in a tla cang club pawl lak ah Malaysia pa Tan nih a ngeihmi Cardiff FC nih mi tambik an cawk men lai. Thaizing le a ra laimi zarh pawl ah tu kum i teitu ding cu a von i thei cuahmah cang lai. Bawlung chuih zoh a nuam chinchin cang lai. I ngaih ko hna u. 

Hla ka ngai tuk lo. Asinain Shakira hi ka uar hmasabik hlasak thiam ah ai tel. A hla tampi cu lala lalaaa ti hrawng in ka zulh pah khawh hna. 2010 World Cup i a sakmi "its Africa" hna kha cu atu tiang ka hnathlam le lei ah a tang. Nain tutan i Rihanna he an sak ttimi hla video cu aa, von zoh ve te ulaw zeitindek nan ruah cio. Fa a ngei cang fawn,... 

Jay Leno Show ah Miley Cyrus bia an ruah i Bieber hi zeitin ruahnak na cheuh lai, tiah a von hal. "Phaisa tampi na ngei. Phaisa pe hna law, buainak na ton lo ding in an kaa an kut le ke phaisa in ttem hna. Na inn te ah na duh tawk in i nuam." a ti i "Kei ka tuahmi pawl hi upadi he ai kalhmi a um lo, California ah cun ka tuahmi hi upadi he ai kalh hna lo." tiah fian fawinak in ka von leh. Youtube ah zoh hmanh.
International students he king kan i kah i an rau tuk. Ka huam ti lo, Ka catial a rel huammi careltu caah catial ka huam duh :) Happy Weekend!!!