Thailand: Yingluck Shinawatra Nih A Ngamh Tuk Hna

Kan innpa ram an si lawng si loin zeitindah mi ram le miphun dang hi si ve cio tiah Thailand ah Zeidah A Cang tiin ka rak tial. [Thailand dirhmun tluk deng hi Ukraine zong an dirhmun a si i zahan kha Lehnin milem an tuahmi tiang an rak thluk i a lu an tan.] Nai zarh chung kha cu an dai ngai, a ruang cu a siangpahrang a chuah zarh a si caah a si. Thailand prime minister Yingluck cu an siangpahrang chuahni lawmhpi ah a rak kal diam i a kal kar cu cozah dotu pawl zong zei tuah awk an rak thei lo. Asinain caan ttha ah an rak i hman veve.

National Assembly kan tuah lai tiah prime minister Yingluck nih an ram cozah TV ah rak chim. Mah ti kan tuah ahcun teinak kan hmuh tthiam lai i a ttha ko lai, tiah a ruah ttheo lai. Cu a chim tlawmpal ah mipi thimmi mipi a aiawhtu hna chung in atu dotu a simi pawl nih National Assembly kan kai lai lo, an ti diam ko.

Tuan i ka chim cang bantuk khan atu cozah dotu han nih hin Thaksin unau/chung hi politics/cozah he pehtlaihnak ngei ti hna hlah seh ti an duh bikmi a si. Thaksin te chung hi ngeihchiah in an rum tuk tikah an ram mirum hawikom le sifak tampi nih an dirpi ve tthiam ko hna. Sihmansehlaw,
MP pawl tiang nih an duh lonak an langhter cuahmah cang tikah zeidah a tuah khawhmi um? 

Cozah thimnak a thar in kan tuah lai, tiah National Assembly kai a duh lomi MP an um caah Yingluck nih a chim. Democracy phung ning tein thimnak ah teitu a si caah atu bantuk mibu pakhat nih duh lo ruang i uknak pek cu a duh ve hrim lo. 

- Mah hi kong ah, hi tluk tam minung le bu tam tuk nih cozah an duh lo si kaw, Thailand mipi sinah nawlngeihnak pe in cozah thimnak a thar in kan tuah ah a tthabik lai, tiah Yingluck nih 9.dec zingah a chim. 

Yingluck nihin thimnak kan tuah zong ah teinak kan hmuh tthiam lai timi hi ai ruahchan ttheo lai. Cu a si lo hmanh ah amah mithmai le an chungkhat mithmai belnang thuh lo ding hi a duh lai caah thimnak a thar tuah i sungh sile nawlngeihnak kal tak bak ve hi ai thim fawn lai. President siloah prime minister kip nih an dirpimi a si ko lai. 

An siangpahrang chuahni phak hlan te ah 2011 i a rak autu angki-sen pawl nih atu cozah dotu lamzawh pawl an rak zuan hnawh hna i thisen a luang manh. Atu i cozah thimnak a thar in kan tuah tthan lai a ti tikah Thaksin party nih tei sual seh law atu dotu hna nih hin an duh tthiamtthiam lai lo i ramchung donak (civil war) a chuah ding hi a lam tam. 

Atu lamzawhtu hna hi an siangpahrang, buddish pawl le ralkap(siangpahrang mi zumh) nih an dirpi hna lai. Palek nih atu cozah an dirpi fawn. Cun mipi chung in angki-sin pawl nih zeiti hmanh in 2011 lio i atu cozah dotu hna nih an rak thahmi an hawile kha an philh kho hna lai lo, i teirul cham an duh rih lai.

- Cozah nih nunnak a liam ding le thisen chuah ding a duh lo, tiah a bia a peh i hi lamzawhnak nih tukdennak a chuahpi lai ding kha a phannak zong a langhter.

Election tuah tthan zong hi ttih a nung ngaingai lai. Kan chim lengmang bang Thaksin te chung huat le duh lo rumro a si tikah dotu hna nih cozah he i pehtlai hna hlah seh, ti an duh caah atu 9.dec hi miu lian taktak nih Bangkok ah Yingluck le a cozah hi ttum hna seh, nawlngeihnak chuahtak hna seh tiah kan au tthiam lai an ti. 

Careltu nih zeitin nan ruah ve? Dotu hna hi democracy phung an tlai lo tuk nan ti maw, asiloah acozah dah an palh, nan ti? Aruang cu amnesty-law chuah a duh tikah a ttapa luatnak a caah a tuahmi a si, an ti. A ttapa nih a langhlat in a von hman, a lang in Thailand a uk tiah an ruah. 

Comment?