 |
| Goal sutmi an lawmtu Suarez, Turan le Messi. Thong a tla kho ding cu Turan hi a si. |
Barcelona nih 2015 ah Atletico Madrid in an rak cawk i kum nga "Conract" an ngei nain ruah ning bantuk a si lo caah chuih caan tlawmte lawng an pek mi Arda Turan cu an ram Turkey club Istanbul Basaksehir an hlanh hna. Turkey a phak in minchiat le mualpho in a caan a rak thawk.
Nihin i media kip ah Arda Turan (31) cu kum 12 tiang thong a tla kho ding sualnak a tuah tiah AFP thawngca nih an ram cozah thawngpang ttialmi chirhchan in an hun ttial.
A ruang cu Turan hi Nightclub a kalnak ah hlasak thiam Berkay Sahin timi pa a nungak nu a tuaitam ruangah i nam le vuak tiang an phan. A hnar a kiah ruangah siizung a phanmi Sahin cu Turan nih Pistol i put in a va kal hnawh i "mah pistol hin ka kap law ka ngaithiam." tiah ngaih thiam a va hal.
Cucaah Turan sual an puhnak cu nu tuaitam, phung he kalh in meithal i ken le Sahin cung i a tuahsermi tiin phun thum a si caah a fak ngaingai lai ti a si.
Hlasak thiam Sahin zong cozah lei sihni hna nih kum hnih thong thlak ding in an hal.
Arda Turan cu kan hnu cawn nilini ah palek nih bia an hal i an thlah tthan chung. Sahin hi ka tuai lo, a ti. Cun siizung i meithal a puakmi kha bawngbi zal in chuah a timh pah ah ruah lopi in a puakmi, puah hrammi a si lo tiah a chim.
Turan cu 2018 thawk ah Barcelona nih Basaksehir an hlanh hna, i avoi khatnak a chuih ah Refree cung a lungtlin lo caah a nam i an rak buai ngai. Cun 2017 ah Sport-journalist pakhat cu ram aiawh i bawlung chuih an i thawh pah ah vanlawng cung ah a nam caah an rak kirter i an ram caah a chuih lo.
Amah hi Turkey ah minthangbik bawlungchuih thiam a si. An ram caah puai 100 a chuih manh.
An president Recep Tayyip Erdogan nih a uar tuk i zapi theih in a ttanh kong a chim lengmang pinah Turan nupi a tthit ni zong ah amah pumpak bak in an puai a rak zawh.
Turkey i nawl a ngeibik mi pa nih a uar tuk mi Turan hi a chanh lai maw? Recep Tayyip Erdogan kong rel chih.
 |
Turkey Ah Full Power A Ngeimi President Erdogan |
Comments
Post a Comment