Bawlung Biathli: Barcelona In Chuah A Duhmi Um

Tu zing ah Barcelona nih Liverpool cu Coutinho kong ah biakhiahnak a rannak in tuah dingah an nawl hna. Barcelona nih La Liga thawk ni ah Real Betis cu 2-0 in an rak tei hna. Asinain Goal 2. lawng nih a langhtermi cu Barcelona nih La Liga le Europe ah teinak an hmuh khawhnak ding ahcun a thiammi dang cawk chap an herh timi a si. Cawk an duh mi hna cu Coutinho le Jean Michael Seri an si. Asinain Sky Sports nih a ttialning ah Coutinho nih Barcelona i kal a duh ko zong ah Liverpool nih Barcelona cu an khirh hna lai.


Barcelona alaikal Andres Iniesta (kum33) nih Barcelona in chuah ding a voikhatnak bik kam a pau. "Atu lawng hi Barcelona kaltak ding bia ka chim a si." tiah Barcelona he La Liga voi riat le Champions League voi li a teitu Iniesta nih The Telegraph ah a chim. Amah hi Spain he World Cup le Europe Cup teitu a si. 2010 ah amah sutmi in World Cup an rak tei. Real Madrid a ttih hna kong le Barcelona atu an dirhmun kong i a thinphannak a chim chih.

Coutinho an cawk le cawk lo nih Iniesta dirhmun hi tampi chim te dawh a si!

United ah a kir zau lai tiah ruahmi Zlatan. 

Ni kum i Manchester United a bawmtu Zlatan Ibrahimovics cu a khup aa khawn hnu in United he an rak i tthen. Sihmanhsehlaw, a lung dong lo. Aa zuamnak le a lungtthawnnak ruangah atu hi a hong dam i a rauh hlan ah bawlung chuih kho cang lai. ESPN i aa ttialning ah United he hnatlaknak an ngei zau lai ti a si. Ziah a tar cangmi Zlatan cu United nih an duh rih? Lukaku nih goal a sut-piak cuahmah hna nain "Experience" tampi a ngei cangmi Zlatan hi Champions League ah an i tel hnu cun an herh rih. Cu lawng si lo in United angki ah Zlatan min aa ttial ahcun ni kum bantuk in tampi a man lai tiah an ruah caah a si.


Manchester City nih Samir Nasri cu Turkey Club Antalyaspor ah man dengte in an pawn. Gourdiola nih a uar lem lo caah ni kum kha Sevilla a rak hlanh hna. Cu bantuk cun Liverpool nih an hnukham Mamadou Sakho an an pawn len ve nain an manh lo.

Chelsea nih Tottenham cu 2-1 in a tei hnu in Conte cu an fak ngaingai. Cu lawng si lo in mi thar cawk piak chap an timh. Alex Oxlade-Chamberlain cawk an duhnak a sau cang. Arsenal cu Champions League an chuihti lo pinah Season an thawk a ciangkuang lo. Chamberlain nih a thar in min a thut rih lo caah arsenal cu an thin an i domh ko tiah Sky Sports nih a ttial.

The Sun ttialning ah AC Milan le Chelsea nih Dortmund hmaikal Pierre-Emerick Aubameyang cawk ding ah redi an si. Aubameyang nih Dortmund ah um ka duh ti lo tiah a chimmi aa leet rih lo caah zuar te dawh in a um.