Yaya Toure Kong Ah Guardiola Le Agent An I Si

Pep Guardiola nih Manchester City cu teinak lam a zawhpi cuahmah hna i Vawleicung Manager thiambik a si ko tiah mi tampi nih an hon cohlan cuahmah. 

Tu zan EFL (League Cup) ah Swansea he an itong lai. 

Mah cu hlan ah cun Guardiola cu Barcelona lio in a rak rem lem lomi Ya Ya Toure kong ah mi he aa si. Pep hi a lungput a ttha lo tiah Yaya Agent nih a chim. 

Pep Guardiola nih City a tlaih ahcun thil tampi ai thleng lai i bawlung chuihtu pawl nih Club thar an i kawl a herh lai tiah bia a rak chuak. Cu bantuk in Pep nih City a tlaih hlan in mi thar a cawk i a duh lomi a zuar hna. 

A hleiin a tuartu cu England goalbawh Joe Hart le Ya Ya Toure an si. 

Yaya Toure cu Pep nih a ralaimi Champions League caah thimmi 23 lakah a telh lo caah Yaya Agent a thinhung ngaingai. 

- Champions League hi City nih a tei lo a si ahcun Pep nih Yaya ka hnon kha ka palh ko tiah a chim ngam lai ti ruahchannak ka ngei, tiah Agent Dimitri Seluk nih a chim.  

Mah bia cu Pep hna chung ah a vai chol len rua, let lo in a um kho lo, "Ngaihthiam a hal a hau. A ka hal lo a si ahcun Toure hi bawlung ka chuihter lai lo," tiah Guardiola nih BBC hmang in a chim. A taktak ah Pep a ngiartu hi Agent a si ko nain Toure tiang in Pep nih a hon hnursuan tthan ruang ah Yaya hi a rak rem hrim lo hlah maw tiah ruah awk in a um. 

Pep nih Yaya a chuihter lo ruang ah lungtlin lonak a um ahcun Toure nih Club hi ttha tein a chimh i a duhnak a langhter ding a si, tiah a nolh. 

Asinain Agent, Dimitre nih a thar in a hon leh tthan.


- Guardiola nih ral(tuk) a duh a si ahcun, a ngah lai. Amah hi teirul cham timi a uar takmi a si caah a kong ka chimmi ruangah Yaya cu dan a tat tiah Daily Mail ah a chim. 

- Pep nih bawlungchuih thiam ciocio ah amah a ttihtu le a duh ning in thil a tuah tu lawng hi a duh hna. City i a phakka ah a tuah hmasami cu City i an ttihzahmi Hart le Toure thlaak kha a si ko, tiah a chap.

Guardiola hi Manchester City nih pakhatnak an i zuam lio ah Pellegrini kehleng phelh in rian a rak i cuh tiin bawlung vawlei ah cun an sawisel ngaimi a si i Dimitre nih a hon thar chuah: 

- Zeidah ngaihthiam ka hal lai? Guardiola nih Pellegrini sinah ngaihthiam a hal ahcun ka hal ve lai. Patling pakhat a simi hohmanh nih an tuah lo ding a tuah. Rianttuantti hi iupat awk a si. A biapi tukmi sining a si, i a hleiin England ah a biapi. Cun Hart zong ngaihthiam a hal hmasa a herh.

An bia a dih rih lo. 

Cc: Mail, independent,BBc