Tuluk Foreign Minister Nih Kawlram Foreign Minister A Ton

April 5-6, tiang Tuluk Foreign Minister nih Kawlram a tlawn, i Foreign Minister Aung San Suu Kyi he tonnak an ngei kho. Tuluk cu Kawlram innpa a si bantuk in le Asia ah ram lian pakhat a sinak in Kawlram cozah thar a tlawng hmasabik a si ve. NLD nih 1990 i teinak an rak hmuh lio zong ah Tuluk tthiam hi a hmasabik lawmhnak chimtu le ralkap le NLD kar bia a rak tuahtu an rak si. Avoi hnihnak an i nolh kho ti lai lo, lam dang tu in Kawlram ah azeilei paoh in hmunhma lak khawh hmasa an i zuam tthan. 

A luancia kum ah 2015 Kawlram Election ah teinak a hmu ding NLD party hruaitu Aung San Suu Kyi cu Tuluk cozah nih an rak sawm i Communist Party i an phung hrawk in cozah lutlai pakhat bantuk in an rak don, i bia an rak ruah. Cu lio ah Communisty Party nih anmah cozah media dah ti lo, Journalist dang a rak luhter hna lo caah nihin tiang cu an i tonnak i an ceihmi le an i ruahmi pakhat hmanh theih a si thai lo. 

Tuluk ram in a rak kirmi Suu Kyi cu media nih bia an hal tikah zeihmanh a rak chim ve hna lo.


Aung San Suu Kyi nih Tuluk Foreign Minister Wang Yi cu Kawlram Foreign Minister dirhmun in April 5-6 chung hi Naypyitaw ah a ton. Amah leiin zei bia hmanh a chuak rih lo, nain Wang Yi nih cun hi tonnak cu a tthalei in a chim. 

Wang Yi bia ning ah an i ruahmi kong cu Tuluk nih Kawlram i a hramsih-chawlehnak kong hi a si bik, i kap hnih lung tlinlonak cu hawikom bantuk in bia i ruahnak nih a remh khawh lai tiah Tuluk cozah nih an zumh. Cozah thar le Suu Kyi nih USD 3.6billion man a si mi Dam-project cu on piak tthan ding in Tuluk nih a halmi kong hi biapi in an ceihmi si dawh a si. Kan hnu thla ah Tuluk nih Kawlram cozah thar cu Dam kong hi on tthanding ah an rak hnek cang hna, i Thein Sein cozah he min an rak thutmi kha cozah thar sin zong ah a hmunmi a si an ti. 

Kawlram le Tuluk kar buainak cu a tlawm le tam lawng a si lai, a buai lengmang ding a si ko. Atu cozah hlan Kawlram i Tuluk nih a thawkmi Project pawl ah buainak a tam i a fawinak in Letpadaung i thir-sen cawhnak cu a pawngkammi nih fakpi in an doh, i Zinan le Gas lam kong ah Kawlram mipi nih an duh lonak an langhter. Mytsone-dam kong ko hi an buai. 

Wang Yi nih Suu Kyi he an iton hnu ah "Keimah le Foreign Minister Suu Kyi nih hnatlaknak pakhat kan ngei, i cucu hawikom kar biaruahnak in hi kan buainak daih le tthatter ding timi a si," tiah zei kong set a si timi telh lo in a chim. 

"Kawlram i Tuluk company le rianttuantu hna nih acozah phungphai, zulhphung hna le rammi upat bu in rianttuan ding in kan hruai hna lai, pawngkam sining (environmental protection) zong kan ruah lai,.... i an zatlangnun tthanchonak i a herhmi tlinh kan i zuam lai, tiah a chim chih.  

Ramkomh bu Kawlram nih chawleh(sipuazi) tthancho ding le khuasaktintuk a tthatdeuh ding kan duh i ngandamnak a tthat ding le nun a nuamhdeuh ding kan duh. Cucu cozah thar zong nih a duhmi a si caah a siifak tukmi Kawlram nih ramdang in a lutmi company, chawva le rian tampi a herh lai. Cu vialte cu phungphai ngei tein le ram ngeitu hna nih hlawknak an hmuh khawh ding in cozah nih a tlaih a herh. 

Kawlram i sui, zinan, gas, thir le a dang lei chuak mansung hna lawng si lo in tthanchonak ah kan herh taktak mi (infrastructure projects) lam, mei, ti le a dang nifatin kan herhmi pawl hi biatakdeuh in aa hmaithlak dingmi ram le company hi cozah thar nih cohlan i ruahpiak deuh a herh ngaingaimi a si cang awk a si.

Asinain Tuluk hi a rak zer tuk i Ralkap le Thein Sein cozah chan ah fek tuk in Kawlram ah nawlngeihnak le hmun an rak ngeih chung khawh cang. Tuluk cozah kuttang a ummi Guangdong Zhenrong Energy Co. nih Kawlram ah USD 3billion man rianttuannak cu cozah siin lungtlinnak a rak co.

Cozah thar le Htin Kyaw zong nih Tuluk i Kawlram ah nawl a ngeihnak hi cu an ruahning le kan i ruahchan bantuk in an kham kho taktak lai lo tiah pumpak in ka ruah. Zeica tiah cun tutan i Suu Kyi le Wang an i ton hnu i Tuluk thawngthanhca lian a simi The Global Times nih Mytsone Dam kong ah thinphan awk a um lo, an on tthan ko lai tiah a ttial, i atu cozah nih a kalpimi cu Tuluk duhnak he aa kalh, tiah Communist party nih an chuahmi People's Daily nih a ttia ve.

Kawlram tlangcungmi hna ralthawhnak ruangah Tuluk hi atu bantuk in nawl a ngeih khunnak hi a si ti ahcun kan palh tuk lai lo. Chaklei Kawlram ral thawh ruang i Tuluk ah aa dormi hna kong ah Communist cozah nih Kawlram a namneh khawh rih fawn. Kawlram nih Tuluk hi phaisa zeizah dah a bat cang hnga? NLD cozah a kaa phih khawh nak lawngte a si.

Cozah thar le Suu Kyi nih Kawlram pumpi remdaihnak aa hmaithlak i a tuah khawh zawk a si ahcun innpa a dir-onh ngammi a tthawngmi cozah a si colh ko hnga. 

Cc: Mizzima, Xinhua, Global Times, Timesunion