Suarez Nih Ronaldo le Zlatan A Teinak Hna Zawnte

A rauh hlan ah Europe i goal-sut khobik thim le laksawng peknak an tuah lai. An chuihnak League lawng si lo in Europe i goal tambik a ngeimi si cu bawlungchuihtu paoh i an chunmang a si.

Relchap: Real ttanhtu caah thawngpang ttha

A luancia La Liga puai-hnih an chuih ah khan Barcelona hmaikal Luis Saurez nih a si khawhnak paoh in tampi sut a rak i zuam i goal riat a ngeih caah atu tiang i Top-sccorer List ah pakhatnak a si.

Cu hlan cu Zlatan Ibrahimovic le Gonzalo Higuain hi rak zoh an si i Ronaldo zong zumh ngai a rak si ve.

Sihmanhsehlaw, Luis Suarez le a hawile nih teitu si an duhnak fiang tein an langhter. Cucu Penalty an chuihter ning in siseh amah aa zuam ning hrim in ruah khawh a si. Puai hnih chung ah goal 4x2 in a sut i atu tiang cu Europe ah goal tambik suttu a hong si.

Europe i goalsut khobik timi hna cu:


England:
Harry Kane hi zahan West Bromwich he an chuih ah goal a sut lo, nain atu tiang cu Premier League ah goal 24 in Topscorer a si. Amah a dawitu hi Sergio Aguero (23, Manchester City) le Jamie Vardy (22, Leicester) an si i a caah caam rem a rak simi cu zahan kha a si. Vardy cu FA an chuihter lo caah 4-0 in Swansea an tei lio ah anih aa tel kho lo.

Kane hi a taangmmi puai 3 chung ah goal tam a sut khawh i Topscorer a si ahcun 2000 kum hnu in avoi khatnak England mi chung in Premier League ah Topscorer an chuah a si lai. Nain atu hi City hmaikal Sergio Aguero (Argentina) a ke a hong chuak ngai i a dam ko cun amah nih lonhte dawh in a um.

Spain:
Barcelona hmaikal Luis Suarez (Uruguay) hi La Liga ah Messi le Ronaldo cu an ke ttempiak mi bang a lonh cang hna. Tutan La Liga ah goal 34 a sut khawh.

C. Ronaldo cu aa khawng i Rayo he an chuih ah aa tel kho lo. Barcelona chung in Top-scorer chuah cu an duh i Penalty an i hoih, a si khawh nak lam paoh in Suarez hi goal an ngeihter khawh.

Italy:
Napoli hmaikal Gonzalo Higuain (Argentinian) hi Serie A ah goal 30 a ngei ve i Topscorer a si lio a si. Zahan i Roma he an chuih hlan puai 4 an chuihter lo nabu in 30 a ngeih cu a tam ngaingai. Roma ah khan goal khat cu a sut lai tiah ka rak zumh nain a sut kho lo ai. Serie A ah Higuain an phan deng lo.

France:
Sweden miphun Zlatan Ibrahimovic hi Franch League 1. ah goal 32 in Topscorer a si. Amah khawh in Lyon hmaikal Alexandre khi goal 18 a ngei.

Germany:
Bayern hmaikal Robert Lewandowski (Poland) hi Germany ah goal tambik ngeitu a si i goal 27 a ngeih. Kan hnu Season nakin goal-hra a hong tamdeuh i a taangmi ahhin goal a sut rih lai tiah zumh a si. Amah a dawitu hi Dortmund hmaikal Pierre Aubameyang a si i goal 23 a ngei ve.

Foto: AP/Reuters