Tu zarh chung ah Champions League semifinal avoi khatnak an chuih lai, i thaizing April 26. hi Real Madrid nih Manchester City an fuh hna lai i Arpil 27. hi Bayern Munchen nih Barcelona teitu Atletico Madrid an kal hnawh hna lai. Hi hna lakah Bayern le Real Madrid hi zumhbik an si nain thaizing i a chuih ding hi tlawmpal in von zoh hna usih.
Relchap: Semifinal ah Bayern le City iton dawh an si
A hmasabik ah Zarhteni i Real Madrid nih 3-2 in Rayo Vallecano a tei lio ah a chuih kholomi Ronaldo cu thaizing Champions League semifinal i Manchester City he an iton tikah a chuih kho lai ti a fiang cang. Benzema he 100% fit cu an si lo, nain an i tel lai. Cucu City caah thawngpang ttha a si lem lai lo.
Manchester City manager Pellegrini teirulchamnak caan:
Avoikhatnak Champions League Semifinal a kaimi Manchester City he iton cu Real Madrid a van ttha tuk tiah mi tampi nih an chim. Asinain keinih cun Manchester City an van a ttha tuk tiah ka ruah. Cun Manuel Pellegrini caah Real Madrid he iton hi lung a tur ngai ding pakhat le manager in an rak chuahmi ruat in a lungah teimaknak a hleiin a um khomi a si.
Pellegrini hi Chili, Ecuador le Argentina ah manager hlawhtling a rak si hnu ah Europe ah aa tthialmi a si i Villarreal cu teinak tampi a hmuhpi hna i Champions League Semi tiang an rak phan.
Florentino Perez, atu Real Madrid president cu Term 2nk. a hon peh i 2009 i Pellegrini rian a hmuh tikah cu kum i Treble-winner a rak simi Barcelona tei ding in a Real Madrid manager rian a rak pek. Cristiano Ronaldo, Kaka le Karim Benzema an rak cawk hna.
A poi ngai, a hlawh a rak tling lo, i club ngeitu he pehtlaihnak a rak cat. The Copa del Rey ah Alcorcon timi club fate nih 4-0 in Real M. cu a rak tei i Pellegrini cu Spain thawngca pawl nih an rak den. Mah cu zarh lila ah Madrid i thawngca lian Marca nih “hodah Real Madrid manager thar a si awk a si,” tiah a rak ttial.
Relchap: Pellegrini nih City ngeitu cung a lungfahnak a chim
Ho cu dah si hnga, Champions League final ah Barcelona a teitu Inter Milan manager Jose Mourinho hi president Perez mit ah a rak lang. Mourinho nih Real Madrid cu khuaruah har in a rak hruai khawh nain CL cu a rak teipi kho ve hna lo i nan theih cio bantuk in zei manager hmanh Perez tang ah an him lo, manager tamtuk a chuah hna.
Real Madrid nih an chuah hnu ah Malaga a hruai. Malaga ah a hlawhtling ngai i nihin ah cun Champions League Semi a phan ballomi Club a cawi hnu ah teitu sinak thazaang le ruahnak a ngei lo tiah a rak chuahtu Real Madrid he itonnak caan ttha a ngei.
Real Madrid innka in a rak chuah pah ah a rak chimmi bia cu:
- A thiambik timi an cawk hna, nain a herhnak hmun le zawnte i a thiambik timi an caw hna lo. Guitar tum thiambik 10 i ngeih i Piano thiammi ngeih lo ahcun orchestra ngeih hi san a tlai lo. Real Madrid nih cun Guitar tum thiambik timi 10 a ngeih taktak ko, nain piano tum ka fial hna tikah an tum kho lem lo.
A hman. Mah cu ka hmuhning a si, i tutan Champions League zong kan zoh tikah Real Madrid hi an tluang kho lo. Ronaldo, Benzema le Bale hi an thiam tuk, nain MSN he an i lawh lonak cu anmah zawn an i ruat tuk. Cu bantuk in a taangmi zong an si cio, Team Work an ngei lo i anmah tluk a thiammi Team Work ngeimi nih an bawh ko hna.
Manchester City hi Premier League a rak teipi cang hna i tutan ah Premier League nakin Champions League lak khawh ding fakpi in aa zuam cang lai.
Manchester City nih vawleicung i hnukham tthabik aa ngeih hna lo. Champions League hmuhton an ngeimi zong a tlawm. Asinain Sergio Agüero, Kevin de Bruyne, David Silva le Yaya Toure nih minute 90 chung ah thil tampi an tuah khawh ve. Vincent Kompany a dam tak rih lo caah chambau ngai in an chuihpi hna lai tikah Real Madrid caah lam a awngdeuh ding cu a si.
Zei a si hmanh ah Manchester City hi kei nih cun ka zumh deuh hna. Real Madrid i an chuih tik tu ahhin Real Madrid nih an tei te hna lo cun Final ah City kan hmuh te ko hna lai tiah ka zumh.
Foto: Zombio.com
Comments
Post a Comment