Dortmund le Liverpool UEFA Cup an chuih hlan te ah nihin bawlung thawngpang ka van tenh ta.
Premier League i a chuih balmi hna lak i a thiam lo bik mi (player) thimnak ti zong cu a um i a tuahtu hi The Sun a si. West Bromwich-player a rak simi Robert Earnshaw cu puai 65 a chuih i puai ruk te lawng teinak a rak hmuh caah Premier League a chuihmi hna lakah a thiam lobik a si. Atang hi a PL tuanbia ah a thiam lobik 11 an si, tling deuh in The Sun ah na zoh khawh.
Liverpool hmaikal a ke chuak lo ngaimi Benteke cu Atletico Madrid nih cawk ding in timh cia an si kong media kip nih an ttial. Klopp nih a hun hruai hna tikah chuih caan tampi ka ngei lai tiah a rak i ruah nain hman lomi ah a cang i Liverpool in tthial a duh cang. Express ttialning ah Atletico nih Pund 37million in an duh. Amah hi Serie A zong ah duhtu a ngei.
Real Madrid nih nih Manchester United i a duhmi cu hodah a si hnga? Zidane nih a ralaimi kum cu Luka Modric, Toni Kroos le Pogba nih alai tlaih ding a duh nain a si khawh ti lo caah United i Ander Herrera hi aa tlaak lai a timi Express nih a tial.
Manchester United nih hin Real Madrid ah David Beckham, Ruud van Nistelrooy, Gabriel Heinze le Cristiano Ronaldo an zuar bal cang hna i tutan Champions League an chuih khawh lo ding a fian ngai caah Herrera nih Real ah kal cu a duh zong a duh lai i United nih an sian ko hnga.
Arsenal hmaikal Alexis Sanchez cu PSG nih an duhmi lakah aa tel. Zlatan nih a kaltak hna ding a si tikah hmaikal ttha pakhat cu cawk hrim an herh caah phaisa a ngeimi PSG nih leicung hmaikal vialte an sawh dih cang. Cu lakah Neymar hi an duh nain a man tamtuk caah le Manager nih a mitthlam in a suaisam ning ah Cavani hi a par ah chiah i Alexis le DiMaria nih a hnu in bawlung chanh ding ah a ttha lai ti a si.
Arsenal ah aa nuam ngaingai i PSG nih lak khawh ding a har an theih nain Pund 60million cu Arsenal cabuai ah chiah colh an ngamh. Cuti a si ahcun Arsenal nih phaisa mitthit khawh a si ve. Nain Wenger nih a sian lonak a langhter.
A donghnak ah Manchester United nih an captain Michael Carrick airawl kho ding minung kawl hram an i thawk. Kum 31 a si cang mi Carrick cu tthaal hin cun aa dinh ding a fiang ngai i Arsenal nih man lo in i lak dawh in a um. Bastian Schweinsteiger nih le atu le tu aa khawng i a dam hnu zong ah United ah um ti lo in Turkey club ah a kal te lai tiah ruah a si, cun a tar zong tar cang.
Leicester i a chuihmi N'Golo Kante hi Carrick chawngtu ding ah cun an duh ngaingai. Kante hi tu kum ah a lang taktak, cun France ca i a chuih zong ah a ttha ngaingai.
Manager Claudio Ranieri nih cun Club lian pawl nih cawk an duh a si ahcun kan ruah piak ko lai, a ti i Kante hi Pund 25million hrawng in cun zuar sian dawh a si.
Dortmund nih Liverpool an teinak zoh ka tlolh deng hih, za rih seh. Mangtha hna uh.
Comments
Post a Comment