Kan hnu zarh cu Manchester City nih tuanbia thar an ttial zarh a si pinah a hnubik puai thum an chuihmi thadam tein teinak an rak hmu zarh a si. Zarhteni ah Chelsea cu 0-3 in City nih an rak den hna i thaizing hi Premier League in a tla ding Newscastle an va fuh hna lai.
Manchester City-manager Manuel Pellegrini nih Premier League Hrai thlir ding kan i zuam lio ah manager thar kan ngei lai timi thawngpang hi hmunhma a rak ngei tuk ko, tiah a chim i Champions League Semi an phan nain Premier League ah an dermi kong cu a chim.
Zarhteni i Chelsea an tei hna khawh in Manager thar kong nih a chuihtu (players) pawl thinlung a thlenning cu tihin a chim:
- Manager thar a luh ding kong hi February in kan theih cang. Cu tikah a ralaimi bawlung kum ah mi zeidah City ah a taang lai i manager thar nih hodah a zuar lai timi biachawkvai a um colh, i cu nih a chuihtu pawl thinlung a buaiter (dernak lei). Nitin a chuakmi thawngca rel hi City a chuihtu hna caah a fawi lo, a ruang cu thawngca pawl nih hodah a taang lai hi hodah a kal lai timi an ttial tuk.
Kan theih cio bantuk in February thawk tiang ah City hi Champions League ah an rak i tel, i Capitol One-cup zong an tei pinah Premier League Table ah hmark tlawmte in pakhatnak nih a rak lonh lawng a si. Lung a tuai ngaimi thawngpang an theih cuahmah ko nain nihin ahcun Pellegrini nih City cu Champions League ah tuanbia a ttialpi hna lawng si lo in a ralaimi Bawlung kum i a rian chawngtu ding Guardiola caah Premier League top-4 chung itel khawh ding aa zuam.
A thiam ciocio zong ah lungput tthawng a ngeimi phu si hi a rak biapi tukmi a si. Bawlung chuihmi hna nih Club in zuarmi si lo hi an i zuam zungzalmi a si i an pawcawmnak a si caah hmai kum kong fiang tein theih a duhmi an si tikah manager thlen kong an rak theih in cun an lungput le khuaruahnak tampi a hrawh hna lai timi cu Expert pawl nih an rak chim ngai cio.
Atu cu an rak pialtakmi laam ah an kir tthan cang. Kan hnu Leichester le Tottenham nih an rak teimi hna zong an philh khawh cang. City fekte in a dirh tatu Pellegrini nih thachia lo tein tihin a bia a dihter:
- Mahhi phu nih a sinak le an thiamnak an langhter. A sung kan pe lai lo, i atu ning in kan kal khawh ahcun Champions League Final kan phan ko lai.
Photo: eurosport.co.uk
Comments
Post a Comment