Antonio Conte cu Cheslea Manager a si cang lai ti a fian ni thawk in bawlung thawngpang chawkvai ah ceih tambik cu Chelsea FC a hon si cang. Cu hlandeuh kha cu Manchester City le Pep Gaurdiola nih hmunhma an rak lak.
Chelsea hruaitu ding nih hin a ralaimi bawlung (season) ah mi zeidah aa luhpi te hna lai timi biachawk vai cu a ropui ko. A duhmi minung pawl hi England club lian pawl zong nih an duh ve hna ruangah ngaih a um khun.
April 5. chuak Gazzetta dello Sport nih a ttialmi media dang nih an ttia chin ning ah Antonio Conte nih hin Juventus hnukham Leonardo Bonucci le alaikal Paul Pogba, cun Napoli hmaikal Gonzalo Higuain, Antonio Rudiger le Radja Nainggolan hi cawk a duh hna.
Mah lawng a si lo, Plan B. caah Chelsea nih Everton ah an rak zuarmi Romelu Lukaku hi a duh.
The Guardian ttialnak ah Chelsea hmaikal Diego Costa cu a rak chuih tthing nak Atletico Madrid ah kir a duh tthan, Atletico zong nih an duh. Kum 27 lawng a si rihmi Costa hi PSG le Tuluk club pawl nih an bawh ve, nain Spain hi a lung ah umbik.
Real Madrid nih James Rodriguez cu an zuar a fiang cang. The Mirror kan zumh a si ahcun James hi Chelsea asiloah United nih Pund 60million in an cawk lai. A hnubik World Cup ah goal tambik suttu a rak si nain tutan cu mi a deuh tuk. England club pawl lawng si loin club rum a simi PSG zong hi James a man liam khotu an si ve, i an duhnak an langhter ve.
Yaya Toure cu City a chuah tak ding a hong fiang ngai cang, i a Agent chimnak ah Inter Milan ah a kal lai tiin Manchester Evening News nih a tial. Inter cu Roberto Mancini manager a ttuannak a si i Barca in a rak lakmi Yaya he ifonh tthan a duh.
Liverpool nih Real Madrid i Lucas Vazquez khi an duh, i Klopp nih caan sau ngai a ngiat cangmi a si. Man dengte in lak khawh dawh in a um.
Bia dangpi a lo nain a ralaimi EURO2016 an tuahnak ding France cu atu tein Security kong ah UEFA le cozah i bawm in an buaipi cang. Ralhrang nih tawngh khawh lo ding in le cu bantuk a chuah sual ah i runvennak cu an cawng, i an thawk cang. Ralhrang ttih ruang ah a zohtu an tlawm lai ti hi an phanmi a si.
A donghnak ah Chelsea nih cawk an duhmi Napoli hmaikal, tu kum i goal 30 a ngeimi Higuain cu zarhteni i Udinese he an chuih ah Redcard an pek hnu ah Bualupa a nam caah a ralaimi puai 4 chuih kho lo ding in an kham. Napoli cu Serie A ah Juventus a dawi liomi an si. Inter le Roma he an chuihmi a tlolh lai i a dang cu amah um lo zong ah a poi tuk hnga lo.
Arsenal goalbawh cu hi Caw-ngia ah "Beyonce na si," tiah Welcott nih a ti.
Cc: The Mirror, NTB, Guardian, Daily Star, Manchester Evenining News
Comments
Post a Comment