Nau Chuakka Minsak Ding Ah An Khapmi Min Cheukhat

Hawi tampi ka ngei i nupi an ngei, an tthi ngawt cang hna nain Kawi ka ttuan ballo. Pakhat cu kan umnak aa khah hna lo caah a si kho men. Nain naite ah Tuluk miphun ka hawipa nih zung ah minthu ding kan si i ka Kawi na ttuan kho lai maw, tiah a ka halmi cu lunglawm te in ka cohlan. Mah cu vaalttul (လူပ်ိဴႀကီး) ka si hlante a si caah thil ttha ngai ah ka ruah :D Mah cu ka von chimnak zong cu, fa kan ngeih ahcun pakhat paoh min nai sak te hna lai, tiah an nu nih a ka ti caah a si. 

Cu he pehtlai in nau chuakka caah min pek ding vawleicung ram pakhat cio nih an khapmi tlawmpal ka theihmi ka von ttial. 

Kan FACEBOOK ah i kan min cio cang cu, a mak tuk hna. Duhmi paoh i ttial a si. Asinain Laimi hi min a sunhsak tukmi miphun kan sinak ah kan minsak hi an mak ko. Ramdang i khua kan sak hnu ko hin kan minsak pawl hi a phur kho lo ding zong kan tam kho men. Laimi minsak pawl cu ka von chim ti lai lo, min i sak a ngah lomi pawl tu ka hon chim cang lai.

Naite ah khan France i chungkhar pakhat nih an fa min ah Nutella ti kan pek an ti i Chocolate phunkhat a si tikah cozah nih an duh lo. Ahohmanh nih company min asiloah thil min pawl hi i min ah i sak a ngah lo, an ti. Chungkhar dang pakhat nih Magane Renaud tiah an fanu min pek an duh tuk nain Mawttaw min Renualt Megane he aa lawh caah an cohlang hna lo. 

Cu he pehtlai in Sky News ramkip i an khap mi min cheukhat a chuahpi. 


New Zealand cozah nih 2013 ah Majesty, Queen Victoria, Lucifer le Mafia No Fear timi pinah 4Real le V8 timi itel in min tampi i sak a ngah lo tiah phung an chuah. 

Norway ah cun Bjorn timi Vom min cu a luancia kum 2 hrawng khan nau chuakka min ah pek a ngah ti lo. Zeicah tiah saram serhsat phunkhat ah ruah a si caah a si, upadeuh tampi nih Bjorn cu an i sak ciomi a rak si. Cun a dang pamhnak biafang pawl an ngah lo, i Norway ummi nih hika hin nan rel khawh. 

Supermann, timi min hi Venezuela ah i sak khawh a si lo. 

Denmark i nuva hna nih an fa cu ANUS tiah min pek an duh tuk i a si khawh chung an i zuam nain cozah nih an duh lo tuk ti a si. Cu tikah min a siloah biafang 7000 leng cu fale min caah i thim khawh ding mi an chuahpi. Cu hna lakah Monkey aa tel lo.

Saddam Hussein timi hi Brasil ah i sak lo ding tiah nawl an chuah ve. Cu bantuk cun Mexico ah Robobcop timi min a ngah ve lo. 

Portugal nih Tom hi i sak ti lo ding in nawl a chuah i a ruang tu cu hngalh a si lo. 

Linda timi min cu Saudi Arabia ah i sak khawh a si lo. An biaknak le siangpahrang chungkhar he pehtlai in an khammi min pawl cu Independent nih a ttial. 

Tuluk nih @ hi minung min ah i sak lo ding tiah a kham ve. 

Germany nih Osama bin Ladin min sak a ngah lo tiah 2002 thawk in an rak kham ve. Cu lio ah Turkey mipeem hna chungkhar nih an fapa te cu al-Qaida hruaitu min an rak sak hnik i an ceih hnu ah an sianh hna lo. 

Kan ram asiloah kan miphun chung ah teh zei min pawl dah kan khap awk a si ve hnga? Khap a hau lo kan ti hnga thla. 

Ka hawile he minsak ding kan ceih pah in kan hmuhmi theihtlaih tete kan hrawmh hnami a si. 

Foto: NTBscanpix