Bawlung thawngpang phunphun tiin kan ttialmi ah club pakhat le pakhat mi cawk le zuar an duhmi kong deuh a si. Atu zong tu zarh thawk ah a chuakmi biachawkvai pawl ka van khomhsuat hna.
Chelsea nih a rian in an chuahmi Jose Mourinho cu tulio vawleicung ram ah a nuam lobik, raltuknak a tamnak bik timi Syria ram manager ttuan ding in Syria nih an hal tiah The Sun nih a ttial. Syria ram bawlung lei hruaitu hna nih Mourinho agent, Jorge Mendes sinah ca an kuat. A ralaimi 2018 World Cup cu Russia ah tuah a si lai i Russia hawi ttha a simi Syria nih Russia i World Cup ah i tel khawh ding hi a duh tuk ve. Cu a si caah vawleicung i manager thiambik pakhat nih cun kan saduhthah a tlinter ko lai ti ruahchannak kan ngei, tiah an cakuat ah an ttial.
Aa pehtlai lo nain Chelsea kong biathli a tam caah an kong ceih lawlaw ko hna usih. Antonio Conte cu Chelsea, London ah a mui an hmuh lengmang kong media pawl nih an ttial tam ngai. Italy Coach hi tuni a si lo hmanh ah, thaizing ah cun Chelsea ah min a thu lai tiah ruah a si, i Journalist pawl nih an bawh ko. Italy ram aiawh a rian cu France i tuah dingi EURO2016 a dih hin a dih ve lai, tiah Italy bawlung phu nih an thanh cang. Atu i Chelsea manager a simi Guus Hiddink nih hin mino pawl biatak tein chuihter a duh hna bantuk in Conte nih manager a ttuan zong ah a si khawh ahcun Chelsea i mino tete hi hmang hna sehlaw, Chelsea caah a ttha tuk lai, tiah The Telegraph ah a chim. A chim bantuk in amah zong nih mino tamdeuh a hon hman hna i Aston Villa zong fawite in an tei hna.
Diego Costa hi Paris Saint-Germain ah kal dawh in bia aa chawk. Zlatan Ibrahimovic nih PSG ka chuah tak lai a ti hnu in amah ai rawl kho ding ah Costa hi an duh ngaingai tiah France Football nih a ttial. Kan hnu zarh chung ah khan cun Everton hmaikal Lukaku hi PSG nih an rak duh nain Everton nih zuar an sian lo pinah Real Madrid le Juventus zong nih an duh ve.
Manchester United-boss Ed Woodward nih Jose Mourinho a duhmi cu aa leet i The Sun ttialning in cun Tottenham manager Mauricio Pochettinos hi a duh. Tottenham an chuih dan siseh, Premier League i an kai ning zoh tikah Mourinho an duh mi cu an i leet hnik tak ko rua. Asinain, Mourinho le Manchester cu biakamnak minthut an ngei cia cang.
Relchap: Mourinho le United biakamnak minsen an ttial chung cang
Bastian Schweinsteiger le Michael Carrick cu United in chuah ding an i fiang ngai cang i anmah ai rawltu ah Befica i Renato Sanches khi an duh ngaingai, tiah Metro nih a tial.
Innpa City kong zong a dai lo, Pep Guardiola nih Europe i a tthawngmi club si khawh nakding ah City kong cu a zanmang tiang in a ruah ttheo lai, atu hi Arsenal orhlei hnukham Hector Bellerin a duh kong a phuan. Bellerin hi tulio mino ah a lang taktak mi a si i Barcelona, Bayern Munchen zong nih an duh mi a si tiah The Sun nih a ttial.
A donghnak ah PSG ah kir usih law, France i club lianbik a hong simi PSG nih Barcelona hmaikal Neymar cu an duh ngaingai caah Zlatan le a hawipa Maxwell hi zuar i cu an hmuhmi phaisa nih a zat lomi a herh zah paoh chap in in Neymar cawk an i duh. PSG hruaitu hna nih Cavani, Neymar le Di Maria chuih tti zoh an duh tiah bia a chuak. Neymar cu Barcelona nih Euro 90million nak tlawm lo an hauh lai ti a si.
Cc: Mirror, Mail, The Sun, VGsport, Telegraph
Comments
Post a Comment