Guardiola nih Barcelona FC a hruai chung ah hrai 14 a rak thlir, i Bayern Munchen a hruai chung ah Bundesliga hrai hnih a thlir manh lai.
Zaanglek thawngpang ka rak ttial ciami rel ahcun Premier League hi Spain le Germany nakin a limhaang a zor caah a tthawngmi League ah ser tthan an duhnak tete ka tial bal. Cu ve bantuk in phaisa a ngeimi mirum pawl sinah Club an zuar, manager ttha ttha cawk an i zuam i bawlungchuih thiam an lemsawi thluahmah hna. Cu tikah manager minthang pawl zong nih phaisa a tamnak England lei an hoih dih ve.
Tu zarh i Sky Sport nih Sir Alex Ferguson cu interview an tuah lio ah Pep Guardiola kong an hal ngai i Pep kong a leh hna nak zawnte ka von char hna lai.
Manchester United kum 25 leng chung teinak tampi he a rak hruaitu Sir Alex Ferguson nih Pep Guardiola i Manchester City a hruai dingmi cu a zoh lai aa ngaih tuk kong thup lo tein a chim. Mah cu lawng si loin City chuihtu (Players ) nih Training ah fakpi in an i zuam a herh lai tiah tihin a chim:
– Pep Guardiola nih Training har taktakmi aa ratpi te lai. Training an tuah tin an i biatak ding a ngen lai caah a chuihtu hna chung in fakpi in Training ka herh lo a titu cu City ah sau an hmun lai lo, tiah sau ngai an tuahmi interview ah a chim.
A rum tukmi Manchester City nih leicung i manager thiambik timi pa rian an pek tikah hin City ttanhtu hna siseh, a ngeitu le Pep a uartu hna nih Premier League tei colh ding an i ruahchan cio te lai. Cu bantuk in Premier League i club lian simi hna nih City zuam cawh ding ah thazaang an chuah a herh lai tiah Ferguson nih a chim fawn.
– Keimah, Manchester United i ka rak um lio zong kha José Mourinho cu Chelsea i a hong phak tikah kum hnih peh in hrai a rak thlirpi hna, i cucu ka rak cohlan hrimhrim awk zuamcawhnak a rak si. Mah cucu club lian i na um ahcun na tuah awk a herhmi a si. Atu ah cun Arsenal, Liverpool le a dang club pawl nih City zuamcawhnak le tthanchonak cu an lehrulh hna ding hrimhrim a si ve, tiah piang ko in Ferguson nih a chim.
– Manchester City nih hin Pep Guardiola an lak khawh cu an i fuh taktak, nain Pep caah thil fawi cu a si te lai lo. Mah cucu England i a phanmi ramdang manager poah nih an chim cio lai tiah ka zumh. Arsene Wenger zong nih Arsenal a tlaih hnu tlawmpal ah a rak chim bal ve, i José Mourinho zong nih cutin a rak chim ve, tiah Guardiola nih fawite in Premier League a tei khawh lo ding kong a chim chung.
Leicester City nih tu kum Premier League a hon hninh bantuk in England Premier League a tei kho ding club an tampi tiah Ferguson nih a ralaimi Bawlung Season zong hi City theng nih a tei lai ti a zum lo.
– Pep cu mi hlawhtling a si ko lai, nain Barcelona i a rak tuah bantuk in a tuah tthan kho lai lo. A ruang cu mah lio ah khan cun Barcelona cu hawi he idang tiang in a rak thiam, tiah Guardiola nakin bawlung tuanbia ah a hlawhtlingmi pa nih a chim.
– (England i) Club lianlian timi hna hi ruahchannak an ngei i hmuitinh sangbik an ngei cio hna. Cun Premier League tei khawh nakding caah City bantuk in an i biatak tuk cio hna. Premier League kan tei hrimhrim lai timi (aa-mah-khaan) a um kho lo, tiah Sir Alex nih a ruah.
Sir Alex Ferguson nih Sky Sport interview chung ah a rak hruai balmi club min le a kong chim bak lo in a ralaimi Season zong ah Arsenal, Liverpool, Chelsea le Tottenham pinah tutan i Premier League tei ding ah a fiang bikmi Leicester City cu Manchester City he pakhatnak an i cuh rih lai tiah a chim.
– Premier League hi cu a nuam kho taktak. Aho nihdah Leicester nih premier league a tei lai lo tiah a chim, tiah biahalnak zong a tuah.
SkySport Tv ah interview tling in zoh khawh a si.
Foto: Eurosport.co.uk
Comments
Post a Comment