Vawleicung i bawlung zuamnak (tournament) cu Champions League hi a si ti khawh si i, World Cup te hna nakin mi lung a ladeuh an ti tawn. Tu kum Champions League (CL) Quarter-final avoi khatnak an chuih dih cang i Semi-final a kai kho ding ah kan zumhmi cio hon i ruah hna usih.
April 5. ah Barcelona le Atletico Madrid cu 2-1 in an dih. Fernando Torres nih goal a sut hnu idinh hlan ah Red-card a co caah Atletico caah cun leicung i a thiambik timi club tei ding a rak har cang. 10-11 an chuih bu in Bual-upa nih Barcelona hi a bawmh hna hlah maw, ti awk in Suarez cu Red-card pek tlak a simi, a tlawmbik Yellow 2 tel pek dingmi a pe lo. A dih hnu Replay zoh tthan ah a lang khun. A taktak ah Barcelona cu zumhdeuh tukmi an rak si ko.
Bayern Munchen le Benfica zong zumhdeuh mi inntek nih 1-0 in an rak tei ve hna. Benfika nih Bayern ah teinak a hmu lo nain an chuihning a ttha. 1-0 cu Befica caah i tluk he aa khat nawn ko lai, i Bayern nih an fuh hna tikah a tei kho dirhmun an si rih. Last 16. ah Bayern nih Juventus a rak teining zoh in cun Benfica cu goal tampi in a tei lai tiah kan rak ruah.
Aprial 6. ah Paris St. Germain nih England in CL quarter a kai chun Manchester City cu tei lo in 2-2 in an dih. PSG nih Premier League i har ngaiin top-4 aa zuam cuahmahmi Manchester City hi an chuih hlan ah a rak nek ngai timi intervio pawl rel in a lang. City zong aa khawngmi an tam caah an rak i zum lo. Hi zawn ah Kevin De Bruyne cu City caah a biapit tuk ning a lang, i manfak bik in an rak cawkmi a phu fawn. PSG nih an fuh hna tikah City nih a tei te lai tiah nan zum dek maw?
Real Madrid nih Barcelona cu zarhte ni ah khan a rak tei tikah i zum ngaiin Wolfsburg an hei fuh hna. 2-0 bak in inntek nih an rak khirh hna tikah aa betting-mi a tamdeuh cu an sung lai. Nan i tel cio dek maw? Wolfsburg hi an ttan a ttha i Final a si ti ruahnak ngeiin an i celh tikah Team-work a ngei lomi Real cu arti an khuaiter hna lo.
Semi-final a kai ding ah ka zumhmi le kai hna seh ti ka duhmi cu a tanglei bantuk hi an si i nan zumhmi van chim cio ve u:
1. Barcelona le Atletico ahhin Atletico Madrid hi Semi kai kho seh ti ka duh ngaingai. Asinain minung 12 he lengmang a chuihmi Barcelona hi ka zumhdeuh.
2. Benfica hi a thiam ngai ko. Germany club pawl hi ram dang club nih an fuh hna tikah an sungh hi a tlawmte. Asinain inntek dirhmun zong in Bayern hi an tei hlei te hna lai lo tiah ka zumh.
3. Vawleicung club tuanbia ah teinak tambik a hmumi lakah pakhat a simi Zlatan hi Serie A, La Liga le Netherlands ah Champion a si dih, i a chuihnak club paoh ah hrai a cawi nain Champions league a tei ballo. Tutan lawng hi CL teinak caan a ngei. Manchester City zong Top-4 an i tel lo ahcun CL an chuih khawh lai lo caah CL hi fakpi in an i zuam lai. Asinain PSG hi Semi-final ah hmuh ka duh deuh hna, ka zumh fawn hna.
4. 2-0 hi Real Madrid nih 2-0 tel in an leh te hna lo ahcun leicung bawlung chuih thiam an tlinnak club an si nain a lung aa rual i a ttang tukmi Wolfsburg hi goal ngei lo ding in an kham kho hna lai lo. Wolfsburg nih kheng chung sa hi an thleet lai ka zum lo. Asinain Real Madrid hi Semi-final ah zoh ka duh rih hna.
Zeitin nang na ruah?
Fofo: freshwallpapers.in
Comments
Post a Comment