Champions League Semi: Atletico vs. Bayern Cu Zoh Dawh Lai

Champions League in Barcelona a thla kho ding an um a si ahcun Atletico Madrid lawnglawng hi a rak si. An lung aa rual, an ttan aa rual i an lakah a hleiin minthang le bochanmi a lor kho ding an um lo. MSN tiah tutan bawlung kum i an ttihbik mi  hna hmaikal Messi, Suarez le Naymar a kham kho ding zong an chuihnak cio League i goal tlawmbik a thlahtu hnukham a simi Atletico Madrid lawng an rak si. Atu zong Semi Final ah leicung i a thiambik timi manager nih a hruaimi minthang club Bayern cu ttihnak ngei lo in an ton tthan hna lai. 2014 i an rak thlir khawh lomi hrai thlir ding ah a tthabik in timhtuahnak an ngei.

April 26. zan cu Champions League Semifinal avoi khatnak i Manchester City le Real Madrid an chuih cu zoh an nuam ngaingai. Voidang Real Madrid an lawh lonak cu Team-work a ttha tuk, a hleiin Ronaldo a chuih lo i Benzema a dinhter hnu in an ttha. Asinain a rak za lo, 0-0 in zumh lem lomi City nih an celhpi hna.

Amak ngaimi cu Atletico Madrid zong hi zumh deuhmi Bayern nih a fuh hmasa ve hna lai. Zoh a nuam tuk ve ding a si i tlawmpal in von cuan chung hna usih. Ca sau rel huam lomi caah tawite lawng si lai.

Relchap: Suarez nih Ronaldo a tei lai

Diego Simeone vs. Pep Guardiola:


A pakhatnak ah Champions League semifinal i Diego Simeone hruaimi Atlético Madrid le Pep Guardiola hruaimi Bayern Munchen i ton cu zoh a dawh ngaingai lai. An pahnih kong kan zoh a si ahcun vawleicung manager thiambik an timi Pep Guardiola hi mi vanttha ngai zong a rak si kho men.

Simeone le Pep hi La Liga ah an rak chuih bal veve. foto: fcbacerlona.blogspot.com

Mino te a simi Pep Guardiola hi Barcelona manager ttuan ding in 2008 a rak phak ahhin ruahnak thar he a rak phan. Cu bantuk in 2011 i La Liga in a tlau luklak cangmi Atletico Madrid manager rian a rak i tlaih ah Diego Simeone zong a rak si ve. Barcelona cu minthang cia le mi thiam tambik ngei a simi lawng an rak i dang. Guardiola a phak hlan kum 2 ah Barcelona nih Champions League an rak tei i cu minung hna le tthangthar mino tthattha kha lam thar ah hruai ding a rak si lio ah Simeone cu sipuazi a tlaak tuk caah La Liga in a tlau ding a si cangmi club ah a rak lut.

Vawleicung club lianbik lakah pakhat a simi Barcelona cu teinak tampi a hmuhpi hnu ah a simh i Bayern ah aa tthial hnu zong ah Guardiola cu a hlawhtling tthiam ko. Atu hi Bundeliga cu a tei lai tiah zumh a si pinah Barcelona an tlak hnu in Champions League cu aa ruahchan lai.

Asinain La Liga an tei ti lonak kum 19  hnu ah sipuazi a tla tukmi Atletico Madrid cu Simeone nih La Liga hrai a thlirpi hna caah a hruaimi minung pawl nih a sin in thazang an laa, lungput aa thleng i ruahchannak a rak tthang. Amahbelte Champions League Final ah Real Madrid nih Extra-time an chuih hnu ah 1-4 in an rak tei hna. Real Madrid nih tei aa harh tukmi Barcelona cu 2013-14 kum ah voi ruk chung sung lo in an rak celhpi hna. Tutan CL teitu ding ah zumhbik a rak simi Barca zong an chuah cang hna.

Tutan Season zong zoh lengmang tikah Simeone tuaktaan ning tete hi mi khuaruah a harter pah lengmang. Hnukham tthabik aa ngeih hna, hmaikal a si khawh chung in a tthami a kawl khawh peng i Club lian pawl nih an hnon cangmi Fernando Torres hi atu leisang ah a biapimi ah a hong cang, i a hnubik a chuihmi puai 9 ah goal 6 a sut khawh. Barvelona he avoi khatnak an chuih ah goal-suttu a rak si, i Redcard an rak hmuh nain Semifinal a chuih kho lai. Amah hi biapibik a si lo nain nihin ah Club lianpawl nih an i cuhmi Antoine Griezmann hi minute 90 chung ah thil tampi thleng kho a si ve.

Cu a si caah Bayern caah cun a fawi hrimhrim lai lo. Guardiola nih Barcelona i a hmanmi ruahnak le a minthangmi “Tiki-taka,” cu Bayern zong ah a hman khawh ngaingai. Hmaikal ttihnung taktak a simi Lewandowski le Thomas Müller hi Atletico hnukham he an izit lente ding cu roling a si ko lai.

Amah belte hmaikal tluk in goal a sut kho ding alaikal a simi Douglas Costa, Franck Ribery, Kingsley Coman le ttha te in a dam a si ahcun Arjen Robben hi Atletico Madrid nih an ngeih khawh lomi an si hna. Cu lawng a si lo, Quarterfinal teitu Arturo Vidal zong a um rih. Duhsah tein an chuihpi te hna lai, i Juventus an den bantuk in den an i zuam te lai i Atletico alaikal pawl nih an cheite hnga maw ti biahalnak a um. Cu tining a si ahcun Pep nih Bayern hi Final a phak pi khawh hna lai.

Zei a si hmanh ah Atletico hi a donghnak ah cun Final ah ka hmuh ko hna, Simeone nih tihal in a hal taktak a si ko ahcun ka zumh chinchin fawn hna. Cu tikah La Liga hrai hi hrial in biatak tein Champions League hrai thlir duhnak a ngeih a herh lai. A nau le lakah hleiin dinhter awk a ngei lo, thim ding a ngeih lo caah atu i a hmanmi minung 11 hi a dongh tiang a hman hna herh caah La Liga nakin Champions League hi aa thim a si ahcun teinak a hmu ko lai tiah ka zumh.

Atletico nih a tei lai nain Bayern i an chuih tikah zeidek a lawh hnga ti hi ka zumhning a si :D