April 15, cawngninga ni Europe chun 12:00 ah Champions League Semi Final kai ding a fiang cangmi Bayern, Atletico, Real Madrid le Manchester City cu Semifinal zei club he an iton lai timi kan theih cang lai. Real Madrid nih cun Bayern hi hrial nan duh hna lai ka zumh, i cu bantuk in Bayern zong nih Semi ah Real he iton cu nan duh theng lai lo.
Bayern München manager Pep Guardiola nih a ralaimi tthaal hin cun Manchester City a hruai cang lai ti cu kan theih. Cu a hruai dingmi City he Champions League Semifinal ah aa tong kho dirhmun ah phan. City rian a tlaih ding hi tuantuk in a fian caah Champions League an iton ahcun thil mak ngai a si lai an rak ti tawnmi a si.
– A ralaimi tthaal in City ka hruai cang lai timi cu zapi theih a si, i Semi ah aa tong kho kan si zong an theih ko. Asinain mi zeipaoh ton khawh kan si bantuk aho kan ton hna zong ah kan rian kha kan i hmaithlak ko lai. Mah cu Final kai hi a si ko, tiah Guardiola nih Spain thawngthanhca Marca ah a chim.
– CL chuih khomi club vialte hi an thim tuk cio hna. Bayern Munchen belte CL Semi a pehpeh in kum nga tiang an chuih dingmi cu thil lianngan pakhat a si. Mi nih zeitluk indah hi dirhmun i teitu si a har ti an hngal lo, tiah Pep nih a chimchap.
Manchester City tuanbia ah avoi khatnak bik Champions League Semi a phakpi hna nain City a chuahtak cang ding Manuel Pellegrini bia tampi a chim lo.
– Ka caah cun zeihmanh aa dang lo. Aa khat ko, tiah Pellegrini nih BBC ah a chim.
Bayern le Pep nih Manchester City hi Semi Final ah an ton hna a si ahcun Bayern caah a hlawknak tampi a um khomi a si. Vawleicung club lian pakhat sinak in siseh, manager minthang pakhat sinak hrim in zei club he iton paoh ah OK a si lai. Asinain City he an iton a si ahcun City rian a tlaih ding a fian hnu thla ruk chung hi Pep nih City a ngiat, mi thlennawn ding a zoh tuk cang tikah an sining tampi a hleiin a hngalh lai, i cucu club dang he itonnak in a tthadeuh hnga tiah ka ruah. City lawng a silo a dang pahnih zong hi a theih ngaimi hna an si, i a ton hna ding club paoh ttha tein a ngia zungzaltu a sinak ah Real he iton zong a poi a ti lo rengreng lai.
Champions League tuanbia ah Pep Guardiola hi khuaruah har in a hlawhtling. manager kum 7 a ttuan chung ah CL hi a tlawmbik Semifinal cu a kum sarih ning in a phan. Jose Mourinho lawng hi amah nakin voi tamdeuh Semifinal a kaimi a si, i voi 8 a phan bal. Carlo Ancelotti le Sir Alex Ferguson zong hi voi 7 cu Semi an phan bal nain annih cun kum tamtuk manager an ttuan.
– A luancia kum hna i Champions League ah teinak ka hmuhmi pawl hi manager kan si chung ah ka nolh khawh tthan ti lai ka zumh lo, tiah Guardiola nih Squawka ah a chim.
Pep nih hin Europe i club tthabik timi lawngte a hruai tikah a hlawhtlinnak hi a si pah. Cu tikah a thiam tuk ti awk hi kaa harh pah caan a um, i Mourinho nih Inter le Porto CL a rak teipimi hna kha kei cu a mak ka tideuh rih. Aruang cu a kum khatnak i Bayern a hruai ah khan CL a teipi hna lo. Amahbelte hawilei in thiamnak a siloah hawi he idannak ngeih lo ahcun hi club lian pawl cu a hruai hna lai lo, tiah ka pom ko.
 |
| Real Madrid le Atletico an iton cun a fawi tawn lo. 2014 i CL final lio a si. Foto: AP |
Spain La Liga in Club pahnih an taan caah hin Semifinal hi an tonter khawhmi hna a si, nawlngeitu nih tuah kho hna sehlaw. Asinain khengchung i hmuh khawh lo mi catlap zuh ding a si caah aa hrial kho zong an si ko. Khatlei in Real Madrid le Bayern hi Final ah itong hna seh tiin Semi ah an iton lo ding in tuahnak nawl ngeitu nih cun an tuah men hnga. Asinain a dik ning in camcawh fung(khengchung ca) nih lairel ding a si.
Ka zumhmi SemiFinal ah aa tong ding hna cu:
1. Real Madrid le Bayern Munchen.
2. Atletico Madrid le Manchester City
Comments
Post a Comment