Europe Um Mino le Cacawng Sin Ruahnak Hrawmh Duhmi

Chin Student Union in Norway 2015 i an i tonnak, zatceo nak tlawm an si, tu kum an i tong than lai. foto: Armstrong Lian

A hrut nih fim chim tiah 2012 i ka rak ttialmi cabia hi nihin zong ah pehtlai in a biapi ngai rih tiah ka ruah caah siaherhnak he kan hrawmh ve hna. Nan ruahnak zong kan hrawmh cio u tiah sawm hmasa kan duh hna.

- Jotun cu Inn siithuh (Tinbawsi/maling) chuahtu an si i a min zong a si. Norway zongah tampi kan hman. Atu hi Kawlram ah dawr lianlian Norway nih a on cuahmah i a ralaimi thla 18. chung ah hmun 10 ah dawr 10 a on rih lai, tiah Aftenposten nih a ttial (2012 ah a rak si i nai kawlram ka tlun zong ah dawr 2 ka va hmuh).

Hi bantuk Ram chia/uknak chia (aa kharkhumhmi ram) pawl an van i on tik paoh ah a lut hmasacem pawl hi USA, Europe chung i ram lian (UK, France le Germany tbk.) pawl khawh in Denmark le Sweden hnu ah Norway hi an va lut ve tawn. Telenor hna on saduh an that i zeidek an lawh te lai (atu ah cun Hakha zong ah Telenor a ngah cang tiah The Chinland Post Daily News ah an tial).

Norway nih Kawlram ah thiltampi a hrambunh a duh cuahmah nain Ram chung dirhmun in phunghram te hna a feh lo tuk rih caah le rianttuantu ding ah ram chung minung hman tlak an tlawm kong zong an chim. Asinain tu hnu kum 5 chung ah Kawlram ah Sehzung zong sak ding an i tim i Kr 110m leng dih te lai, tiah an ruah.

Tuluk nih a luancia kum 15 hrawng khan hmunhma tampi a rak i lak cang nain Kawlram nih Nitlak ram hna le ram dangdang in hung luh le a hrambunh chawlehnak tuah kha a onh cuahmah ko. - Cozah thar cu 2016 thawk in an kai cang lai i 2010-2015 kar nakin a let in rian a tam te lai. Company a karh lai.

Norway fanau hna caah Norway kan umnak a chan:
Kum 50 deng innka kharkhumh uknak in Kawlram a um i a van i on cu Kawlram a tlawngmi an tam ko. Vanlawng ttumkai a tam i hotel man zong khuadawm an tawng. Tourist lei hrim in phaisa tampi a hui khawh cuahmah.


Norway cu Kawlram ah an hon theih khun cang. Norway um Laimi thawng zong in a si kho, atu biatak ngaiin Kawlram ah a va ipaih ca zong ah a si kho ko, TV/Video te hna ah "Made in Norway" ti an chim tete a hong tam ngai.

Norway ah Chinmi hi ttha tein khua kan sak kum 10 a si cang. Atu ah mino tampi sianginn kan kai. Mah hihi kan sian lo kan ram kan chuahtak nak a ruangbik a si awk a si ko. fimcawnnak lawnglawng nih kan ram le miphun a sersiam ding khi a si. Cucaah sianginn kai tha pek a herh taktak mi a si. Amah belte sianginn kai ti tik ah Vgs. ahhin nu le pa siseh mino zong nih kan i palh tawnmi cu Yrke- le Studia-spesialisering (samfunn/real-fag) kong hi a si. Philh lo ding cu a pahnih in sianginn kai a si ko i pawcawmnak, le tthanchonak kan itinhmi pakhat kha a lam kip in phak khawh a si ko timi tu hi kan ruah chih peng a hau lai.

Vawleicung hi minung kan tam deuhdeuh bantuk in rian a har deuhdeuh cang. Hmailei ah thinphang tuk in um hlah ning, rian kawl fawideuh seh ti kan duh ahcun Bachelor degree pakhat tal cu kan lak a herh cang, a hlei in Norway ah. Mah cu a si lo le Yrke-skole kaimi nih Lærling ttha tein le felte in tuah, fagbrev lak i a herhmi Kurs paoh kai in a hnu ah mah ttuanmi le kaimi rian ah Expert si khawh i zuam khawhnak lam a um tthiam caah fel a hau. Atu kan pale le kan nule i an ttuanmi a tam u hmanh hi Paper (awn-nak ca) tello in cun kan hmu kho te lai lo.

Cawnnak tha pek a herh tuk lio ah ruahnak cheutu le lam hmuhsaktu kan ngei hna lo. Cucaah kum 10 chung ah cacawng ko nain lam hman ah a tla kho lomi kan tampi. Atu cu kan ule M.A a dihmi zong an um cang pinah BA/Bsc a dih cuahmah zong an um hna tikah atu i sianginn kai cuahmah mi hna caah bawmtu an hung si cang lai.

A hleiin Chin Student Union in Norway tiah Cozah theihpimi siangngakchia bu kan ngei cang i mah hna hi Khrihfabu le Area Community hna zong nih fanaule caah sawmpiak hna uh. A sung hrimhrim lai lo. An i tonnak zong ah telpi hna ulaw, chawva zong in ttanpi, tha pe hna usih. Cucu nu le pa nan saduhthah a rak si i a caan a phan cang.

A cung i Kawlram ah hmantlak an tlawm, timi zawn ah khan Administration lei ah a si bik. Hihi atu sianginn Videregående kai lio hna nih fakpi in nan ruahchih awk ah thil ttha tuk a si lai tiah ka ruah. Siibawi, Civil engineering le Technology lei tampi kan um cun a ttha chinchin. Norway le Europe ram hna ah nan duhmi rian nan hmuh te lo zong ah M.A / B.A degree pakhat khat in Kawlram le Chinram ah rian nan ttuan kho, ram sernak ah itel khawh nan si lai.

Sianginn kai i Degree lak cu zeibantuk paoh a sungmi a um lo.
Theih hlei le thiam hlei ruangah a si lo. Kan zapi kan ti khawh tawk kan i bawmh a herh tiah ka ruah bia tu a si ko.