Bawlung Biathli: Barcelona nih Ozil Cawk Khawh Lo Dingin Real Nih A Tuah, Manchester United nih Giggs Nuar Lai An Phang

January Transfer Window cu an khar deng cang, nain teinak hmu ding in club kip an thazaang tthawnter an duh cio hna caah mi cawk le thlennawn an i zuam cuahmah rih hna. 

Nihin bawlung vawlei i biasii an phaimi biathli pawl cu: 

Manchester United nih Van Gaal an chuah tikah Ryan Giggs hi manager rian an pek lo a si ahcun Giggs nih United chuah tak a timh bantuk a si caah United hruaitu cu an thin a phang ngai, tiah Daily Mirror nih a ttial. Van Gaal hi a rauh hlan te ah an thlen ding bawh a si. 

Van Gaal chawngtu ding ah chim lengmang mi min cu Jose Mourinho hi a si i amah lila nih United ah rian a sok. Van Gaal nih hin a rian chuahtak ding in United hruaitu a hal hna tiah bia a chuak nain amah kong cauk ttialtu Maarten Meijer nih a chim nakah Van Gaal nih Mourinho kianh in a rian chuahtaak a tim lo tiah Manchester Evening News ah a chim ve. Pep Guardiola cu United ah a kal lai lo timi a fiang cang. 

Manchester United nih Real Madrid i an chuihter huaha lomi James Rodriguez cawk an duh i James zong nih kal a duh ko nain tutan cu Real nih mi thar cawk an i timh ti lo caah zuar zong an i tim hna lo i si khawh dawh a si lo. James cu a thaudeuh cang tiah Spain media nih an sawi tuk. 

Everton goalbawh Tim Howard cu USA ah kir ding in lam a awng. Kum 36 a si cang i NBC chimnak ah aa tthial chom lai. 

Chelsea nih Eden Hazard an sian lonak an langhter, i cawk a duh taktak mi an um ahcun Pund million 80 in kan in pek hna lai tiah an chim i cu zong cu tthal lawng in kan sian lai an timi cu The Sun nih a ttial. Chelsea nih Pato cu tthal tiang an hlan khawh cang, tiah bia a chuak. 

Chelsea nih Bertrand Traore timi cu kum 16 lawng a si nain 18-tang ah an chuih ter caah FIFA phung a buar tiah biaceih a tong, i mah cu hnu tutan mi cawk a kham khawh hna, tiah London Evening Strandard nih a ttial. 

Mah cu a si bu cun Arsenal le Man.United ah a rak chuihmi Robin van Persie hi Chelsea nih hmaikal thar caah cawk an duh ee tiah Daily Express nih a ttial. Chelsea hi hmaikal goalsut kho an um lo i Loic Remy zong hi an hauh zah in Newcastle nih an duh ahcun an zuar lai.


Capital One Cup ah Stoke a tei hnu in (Atang ah penalty an chuihmi zoh khawh a si) Final a kai ding Livepool le Klopp nih Lewandowski cu an duh ngaingai i Real Madrid nih Bayern an hal hna zat Euro 70million leng in an ngamh a si ahcun Liverpool chunmang a tling kho. Lewandowski hi Klopp siangngakchia a rak si i an pahnih kar pehtlaihnak a fek ngai. 

Tu zan Everton nih Manchester City a tei ahcun final ah Liverpool he an i tong lai, i cucu an pahnih in an duh ngaimi a si. City hi Everton nih 1-2 in a tei cia, i tu zan City ah an chuih lai pinah nai hrawng a pehpeh nawn in Everton teinak an hmuh lo caah City nih tei te dawh cu a si. 

Football Leaks nih 2013 i Arsenal nih Mesut Ozil an rak cawk lio ah a man he tel in Real Madrid nih an duhnak biathli an rak chimmi an hon phuan. 

Arsenal nih Ozil cu Euro 44million in an rak cawk, asinain Rea Madrid nih kum ruk chung ah a man i pek ding le a karh he pek ding in an lung a tling. Mah a kar timi cu Arsenal hi 2013 thawk in kum ruk chung Champions League an chuih khawh a si ahcun Euro million 1 peng Real a pek lai timi a si.

Mah cucu ceih huam tukmi a si lo, i mi khuaruah a harter ngaimi pakhat cu Ozil hi zeitik hmanhah Barcelona ah a chuih lo ding in Real Madrid nih Barcelona hawi ttha a simi Arsenal cu biatiamnak a tuahtermi hi a si. Hmailei ah Barcelona nih Ozil cawk an duh a si ahcun an cawk ding zah in Real nih cawknak nawl a ngei lai tiah bia an fehter. 

Mah cu nih a sawh duhmi cu Ozil cawk a duhmi an um tik le Arsenal nih zuar an duh tikah Real Madrid theihter hmasabik ding ti a si ko. Ozil a man hi hmailei ah Euro 50million cung a si i Real hnatlaknak tello in an zuar ahcun Real Madrid nih 33% i lak khawh a si fawn.

Mah ti an tuahnak a ruang bik cu Real Madrid nih Barcelona ah Ozil a kal sual lai ti an phan, a kal ding an duh lo tuk caah a si ko. 

Liverpool nih Capital one Cup ah Stoke cu penalty in an tei hna i an chuihmi zoh khawh a si.