May 7. hi UK election cu a si lai, suimilam lawng in ai duh caah siaherhnak he tlawmpal ka von tial.
Nick Clegg hi ka hmuhtin te zurit a fim kami, silole a thoka a lo lengmang. A hmai panh kho phun a si lo. Ed Miliband hi a hnar ruang ah khin a biachim ah a ka neng dom, i Labour parti hruaitu ah an rak thim lio ah a upa he fak ngaiin an rak i zuam i zoh an rak chia pah. Cun bia a chim tikah aa ttap hnikmi a lo peng, i a nem ngai fawn caah internaitonal i USA president, Putin, Tuluk le Arab-lei pawl hmai ah ngakchia a lo te kho. Prime Minister cu a ttuan te lai ka rak zum cia lo, London ka um lio a si. David Cameron hi a puitling ngaiin ka hmuh, a ttuan chung zong ah international ah dirhmun a tla lo, i Scotland zong a tlaih khawh.
England i an tadinca lianbik pakhat a simi The Sun nih fiangpup in David Cameron a ttanh kong a chim. Pumpak (personality) cun David hi ka uar ngai, Conservative ti tikah hin Khrihfa ruahnak tampi a um rihmi a si caah a si pah. Asinain parti pawlisi le atu thimnak i an i timhmi tlawmpal zohmi chung ah cun Ed Miliband le a parti Labour hi ka duh deuh timi Poll-test ka tuahmi in a lang. Khatlei cun Labour party nih hin Kawlram hi a hnak-kar ah a tenh deuh khawh men tiah ka ruah chih.
David cu Oxford University chuak a si hlei ah mirum chung, England mirum tam tuk he aa hngal i aa dawmi a si. A ral a ttha. 1812 kum hnu UK prime minister ah kum nobik a rak si (a tlin lio ah hin 1997 i Tony Blair record a lonh). Prime minister a ttuan tikah hin a ruah khawhmi cu mirum a hawile nih ngunkhuai tlawmdeuh an pek khawh ding le siizung pawl private-(cozah si lo in) tampi um khawh ding lawng a ruatmi a si ve. Mah cu a si caah UK i zaran chungkhar le minung caah huat a tlai ngai lai, nain a zeilei paoh ah Ed Miliband nakin a mak deuh tthiam. Mirum nih dirpi, mah zong rum ve, sianginn ttha in dih i FirstClass si rih pinah pumpak hrim in hro a kualmi si ahcun cucu prime minister caah huham in tlin khawh a sinak a si ve. - Ed Miliband cu Jew mipeem an si. Oxford in B.A a lak ve nain Master cu London School of Economics ah a kai cang.
Ka theih tawk UK caah cun Labour le Ed i an dirpimi poltics hi ka duhdeuh hnga. Asinain zeiruang ahdah thimnak ah a rak tlaak i a tlak khawh tthan timi cu International, vawleicung hruaitu anih-nih timi hna sinah zeidah a lawh lai timi kha a si. David cu mi ninghngal zong a si men lai, nain British pawl nih cun hruaitu caah an duh ngaimi phun a si. Cu pinah kum nga chung UK i prime minister le nawlngei bik tu dirhmun in a um chung ah palhnak (pumpak, chungkhar, rian le international ah) sawi awk tlak taktak a tuahmi a um lo caah David hi uar a um nak pakhat a si.
Nihin tiang ah parti tthadeuh timi le teitu ding an fiang kho lo. Parti lianbik Labour le Conservative cu an i tluk ngaingai i todan 270 hrawng veve hi tin te dawh in zahan tiang ah cun an ruah. Asinain cozah tlaih khawh nakding ah a tlawmbik 326 kan ngeih a hau timi kha an hngalh ko. Parti dang he ttuan tti awk in zeitindah an tuah te lai, timi tuni cu an thluak a fak lai. Cun media- tampi ah le naihbik i relmi NRK ning ah tu kum chung ah thimnak an tuah tthan te kho men, an ti.
Nick Clegg tu cu tonak 326 a tei kho lo ding parti pahnih ahhin pakhat paoh ah aa fonh kho i David he ttuan tthan maw a duh, a siloah Ed he dah a duh deuh? Amah hi Joker in biapi a si kho nain zeipipa ah atu tiang cu an ruat lo.
A biapimi thil hna:
Atu thimnak ahhin a biapi tiah an ruahmi thil tampi chung ah Sipuazi le EU kong hi a si.
Sipuazi: Atu cozah nih hin an ram sipuazi an kai ter ngaimi an langhter khawh ko nain an ram chung ah sifak an tam tuk rih pinah rian a ngei lomi an tam caah an sipuazi a kaimi cu a lang kho tuk lo. Atu hi zatlangnun i a niambik timi pawl hna caah inn tampi sak an i tim i mah cu fakpi in an i elmi a si.
Conservative nih cun cozah budget tthumh i ngandamnak rianttuannak lei ah tamdeuh pek an duh. Labour tu nih cun hlawh a tlawmbik timi pawl kha chap piak i ngunkhuai zong a si khawh chung in tthumh piak aa zuam lai. I 2017 hlan ah cun Electric/Mei man kaiter lo ding a kamh hna i siizung zong ah Conservative bantuk in tamdeuh chap ai zuam lai.
EU: European Union ah an ummi hi British tam tuk nih an duh lonak an langhter. Mi pem an karh tuk i anmah British caah rian um lo tiang a si pinah criminal- zong a karh bantuk in a hung um i an duh lo. Poland mi phun lawng hmanh London ah thong 30 leng cikhat te ah an phan ti a si. Mah cucu zeitindah an tuah lai?
Hnubik ah David nih The Independent ah ca a ttialmi ah Sipuazi hi a biapibik a si, a ti i mah cu tadinca lila ah cun Ed nih "Conservative nih cun mirum le mi tthawng kha hmai ah a chiah hna nain Labour nih cun Britain hi class thleidan a tlawmnak le i khahnak ram ah kan serh lai," a ti ve.
Comments
Post a Comment