AIDS/HIV cu USA i gay pawl sin ah an rak hmuh i a voikhatnak bik an rak chim le an rak theih hi cu 1981 ah a rak si. Mah cun vawleipi nih kan theih i UN le WHO nih biatak tein hlathlainak le i runvennak kong an rak buaipi. Sihmanhsehlaw 2008 i Nature ah HIV hi kum 100 a upa cang lai ee, tiah an rak ttialmi Aftenposten nih a rak ttial chin. Tu kum october thawkka ah khan HIV hi kum 100 deng a upa cang tiah fek tein Science Magazine nih a ttial i khawika indah a rak i thawk i zeitindah vawlei a cul timi zong an ttial chih.
Cu kong cu Laimi chung in sii-lei (medicine) cawng le kaimi zong nih an ttial lo, aho zong nih ttial awk ah an ruat ti rua lo. Asinain theihtlei bantuk in ka von ttial lai i tulio social media ah a kong ceih a tong bikmi Ju Peng kong hi ka ttial chih lai. Mi kong ceih huam ah cun ruat lo in, aa pehtlaihnak a um caah a si.
Ju Peng (19): Khualtlawnnak ah Sex le phaisa thlen ka duh.
.jpg)
Peng nih vawleicung khua tam khawh chung in tlawn khawhnak ding ah Sex le phaisa thlen a duh, tiah International Business Times nih a ttial. Ju nih thawng a zamh ning ah, "Cikhat tlangval" ding "zoh a dawhmi, kum 30 hrawng, 1.75cm cung a sangmi le a rummi a si hau," tiah a ttial.
Vawleipi cu phaisa liam bak lo in hel a timh. Ju nih amah a sawmtu pa, le khua khat hnu khua khat aa tthialnak ah a liampiak khotu a duh hna. - "An umnak khua phak khawhnak ding a man liam pinah ka um chung ka dihheu vialte a liam lai, mi ttha an si ve a herh," a ti. "Keimah lei in ka pek khawhmi hna cu zan/zanlei pakhat chung vialte aa dawhmi lengno pakhat i zitmuainak a si lai."
Ju nih mah ti a chimmi cu Mirror nih a chimning ah atu hi nichuah Tuluk lei ah cun pa nih an sawm cang i a va tlawng cang hna. "Mah hi cu Hitchhiking (ram vah?) pakhat bantuk a si, ningzah awk a si lo," a ti. Khawika ram/khua paoh in sawm khawh a si, a tlunkalnak na liam i a um chung dihheu na liam ahcun,..
Kum 19 nute i thawngzamhnak cu amah lei in ningzah awk a si lo, nain a sawiseltu hna nih "tawzuar a sinak zapi theih in a thanhmi a si," an ti ve. - "A man a lak hnu cun, zeitindah kan kawh lai timi cu kan hngalh ko. Theih a nuam lo tukmi a si," tiah Weibo a hmangmi pakhat nih a chim ti a si.
Tuluk ram ah tawzuar 20million an um.
An ram cozah nih phungning in a onhmi a si lo, nain 1976 i Mao a thih hnu in nawlngeitu hna nih an kut cu tawzuartu pawl sinah an sawh caah an ram ah hi bantuk i zuarnak cu a karh a rak rang taktak. Tawzuar million 20 an um i an ram GDP i 10% cu tawzuarnak siipuazi in a lutmi a si. Russia nu tampi an rak lut tuk i Tuluk cozah hruaitu cu zeitindah kan tuah lai, tiah an rak hal tikah: thli thiang dawp kan duh ahcun fikfa pakhat hnih cu a luh ve awk a si ko, tiin an rak leh hna (sorry honih a chim timi ka philh.). Mah ti cun nihin ah aa zuarmi million 20 leng an um cang.
HIV/AIDS Chuahning
1981 ah San Francisco, USA i register an rak tuah hmasabik mi HIV-virus cu 2005 hnu cun Asia nichuah lei ah HIV cu a karh bik ti a si. Zeitinda a karh ti zoh hlan ah kum 100 deng a upa cangmi virus kong an ttial ning cu tihin a si:
Leicung minthang university a simi Oxford (UK) le University of Lueven in Belgium nih hlaithlainak saupi an tuah hnu ah an fehter mi cu HIV/AIDS hi Kongo i Khinshasa in a rak i thawk timi a si. Mah hi a thar cu a si lo, HIV cu Kongo in ai thawk timi 2008 i Nature nih a ttialmi ah a um cang, nain Science Journal nih cun 1920 hrawng khan biatak tuk in an rak i chawnh cangmi zawtnak a si, titu a fehter. Asinain zei virus dah a si timi an rak hngal lo i mah ti cun mi tampi an rak thi.
Chimpanzee timi zawng phun pawl hi Kongo ah ramvai pawl nih an rak thah tuk hna i mah hi sa an einak in a chuakmi zawtnak a si tiah an fehter. An sa can lio i Chimpanzee thisen in an hma maw siloah a hring in an din caah maw an rak i chawnh. Mah cucu khua chung an luh tikah an i luhpi i mi dang kha an rak chawnh chin hna.
A Karhning
1900 hrawng cun mah hi zawtnak in a zawmi an rak karh tuk cang. A hlei in upa pawl sinah a rak lang. HIV zawtnak a hlaihlaitu hna nih an chimbik mi cu Sex tuahnak in i chawnh a fawibik timi a si i cu lio Kongo zong ah cun ralring lo in SEX tuahnak in an rak i chawnh caah upa sinah HIV cu a rak karhnak a si. A hlei in aa zuarmi nu/pa sin in a rak karh tiah Science Journal ah hlathlaitu hna nih an ttial.
- Khinshasa hrawng ah a karhning a rak rang tuk. Colony chan a rak si rih i mah lio chan i siizung-ca pawl kan zoh tthan tikah sex tuahnak in i chawnhmi zawtnak a si timi kan hmuh khawh, tiah BBC ah prof. Oliver P. nih a chim.
Ralpi pakhatnak hrawng a rak si i Kongo le Africa ah i zuarnak (sex-industry) a rak karh tuk ve caah i chawnhning a rak rang tuk. Culio ah siichunhnak tthim te hna rak i hrawm a si rih caah tthim zong in tampi an rak i chawnh, an ti. Cucaah sii-khaan i a thianghlim lomi tthim nih hi zawtnak karhnak ding a rak bawmh. Tlanglawng lam le mawttaw a hun karh tikah pa pawl kha khua dang le hmun dangdang ah an rak vak, rian an rak kawl i mah ti cun zawtnak cu an rak i phurh hna.
Ralpi a dih hnu 1920 in 1950 karlak hi fakbik le rangbik in an rak i chawnh i vawleipi a rak cul saling a si. Mah caah 2008 i HIV kum 100 a si cang tiah a rak chimtu hna nih fekte in an rak i tlaih khawhmi cu 1950 hrawng in virus chawnh a rak i thawk ti kha a si. Kongo in thlanglei Africa ram pawl ah tlanglawng lam ser ah aa thawhmi hna sinin le lam a pem caah a chuak vakmi pa pawl sinin a karh i nitlaklei America ah a kalmi hna nih Haiti tiang an rak phakpi.
Kongo in Europe zong ah a rak phan ve. HIV hi million 75 leng nih an neih cang i million 36 leng an thi cang, tiah AFP nih a ttial i aa chawnhmi an karh chin lengmang ko rih. A hlei in a tthangcho liomi Asia ram pawl ah Sex-industry a tam caah le ngandamnak i cawnpiaknak a tlawm rih caah a karh khun ti a si.
Europe nitlak - laifang le North-America ah hin hi virus i chawnh in a ngeimi 2.5million an um cang i zatceo hrawng cu USA ah an um. A zawmi tamdeuh cu thlopbul an tong i 51% cu sii-ai ttha tein an pek hna. Asinain South-Sahara ah cun 37% lawng hi thlop an si i Nigeria ah cun 80% hi thlop lo bak in an um.
UN nih ni kum i a chim ningah HIV in a thimi hi 1.7million in 1.5million ah a ttum ti a si. Ni kum ah khan Africa ah HIV in a thimi 1.1million an rak si. Cuti vawleipi huap in a zor an ti lio ah cun Asia-ram pawl ah a karh thluahmah ko, ti a si.
Biatlangkawm
Ju Peng cu Weibo a hmangtu Tuluk pawl lila zong nih fakpi in an sawi, an mawhchiat. "HIV dur" a titu zong an rak um ve. Vawleicung ah HIV chawnh a tam cemnak a si cangmi Asia i khuakip ah kal in khua khat pa pakhat peng he sex tuah aa timmi a si tikah i ralring in condom hmanh khi va hmang peng hna sehlaw HIV a si lohmanh ah Sex tuahnak in a chuakmi zawtnak cu aa tlunpi ngenge te, ti khi a si kho men (atu zong ngei cang sehlaw?). A kong va ruah kha ka rian a si lo.
Dawtmi careltu, tu chan ah cun siizung kip ah tthim hman ciami hman nolh a um tuk ti lo (a um ti lo.). Tthim in kan i chawnh ti hi cu a tlawm tuk cang lai, ti a fiang. Mi tampi i chawnhnak hi Sex tuahnak in a si. Aa duhdaw i aa theimi hmanh i ralring a herh i theih lomi he cun ralring in condom hman hrim awk a si. A si khawh chung in i zuar lo hi a ttha. Aa zuarmi cu phungning in a si lo tikah pa nih a duh le a hrem, a duh ning in a tuahpi khawh tiang le a hnu ah nunnak hmanh a dih tiang a tongmi an tampi.
Kawlram/Lairam zong ah HIV a karh tuk ti a si. Atu ram thlennawn lio vaivuanh lio a si caah a fawinak in phaisa hmuh duh ah aa zuarmi an karh lai, pa zong an um lai ti cu a fiang. Kham a har lai, nain kan miphun nih theih awk a simi ngandamnak kong le ralrin awk cu kan mipi sinah ahopaoh nih phakter awk kan rian a si.
Chh: Wikipedia, Aftenposten, foto: Mirror/Weibo/DB
Comments
Post a Comment