"Happy Sweet December" tiah ka chungle le hawikom cheukhat nih ka phone ah ca an rak ka kuatmi cu zinglei suimilam 2 ah kai tthang i ka hmuh. Mah cu kai hngilh kho ti lo. Zinglei 2 lawng a si rih i khua a dei nakding ah suimilam 7 hrawng ai duh (a ceu tak hi 8- 9am kar ah a si.) rih. Cucaah ka tho i tisa ka so, phanchok din pah in ca ka rel.
Khristmas le Laksawng hi aa tthen kho lai lo. A ruangbik cu sertu Pathian nih kan cotawk a si lomi, kan phut le kan i tlak ruangah a si lomi khamnhnak le sual ngaihthiamnak ding caah a fapa a kan pekmi Khrih chuah thla a si caah a si. Khrihfa phung (tradition) nih a kalpi cang i December a chuah bak in cun dawtmi hna caah laksawng kan zal hna. Kan si khawh tawk cio in hawikom le sahlawh cu laksawng kan i pe. Pathian nih Khrih a kan pek hmelchunnak caah hman lengmang a si rih te fawn lai.
Christmas caan hi cauk relnak caan ttha pakhat a si.
Laksawng ah cauk i pek hi Laimi nih kan hman tukmi a si lo. Laksawng i thlen te hna ah diary le note-book tin sual ah a thinhung i a zaimi kan um tawn. A si khawh ahcun leicung cauk minthang rel awk tthattha a tampi ko caah cu bantuk cauk pawl cu laksawng ah i pe hna usih law a ttha tuk hnga. Kan holh in leh le ttialmi cauk tete zong i pek khawh a si fawn. Laksawng i kan i pek tikah a rel zong kan rel deuh kho men caah mino cu mino cauk, ngakchia cu ngakchia cauk/tuanbia le upa cu anmah le sining cauk rel ttha tampi um caah cauk laksawng i pe han usih.
Obama te pafa rual Nov. 30 ni ah an innkam cauk dawr ah an rak i chawk. Cauk tampi an caw. Pre. Obama hi 2008 in cozah a tlaih tikah i manh lo ngai in a rak um caah cauk a rel kho theng lo, an ti. Cucaah tutan i a cawkmi cauk "The Kite Runner" by Khaled Hossein hna hi 2009 hrawng ah leicung a rak cul cangmi cauk a si nain atu lawng rel a thawk ve. A relmi pawl hi ngakchia/mino cauk zong an i tel, tuanbia pawl, tahchunnak ah "Jinx" by Saga Blackwood. A cawk duhmi le a cawkmi cauk chung in tlawmpal ka von langhter;
“Half Brother” by Kenneth Oppel
“Heart of a Samurai” by Margi Preus
“The Lowland” by Jhumpa Lahiri
“Red Sparrow” by Jason Matthews
“The Sports Gene: Inside the Science of Extraordinary Athletic Performance” by David Epstein
“Collision Low Crossers: A Year Inside the Turbulent World of NFL Football” by Nicholas Dawidoff
“Ballad of the Sad Cafe: And Other Stories” by Carson McCullers
“Ragtime” By E.L. Doctorow
“The Kite Runner” by Khaled Hosseini
“All That Is” by James Salter
“Wild: From Lost to Found On the Pacific Crest Trail” by Cheryl Strayed
Christmas khar chung ah chungkhat sahlawh, hawikom tlawnkai ah siseh a dangdang khualtlawn a tam kho. Vanlawng cung, bus cung le tlanglawng cung ah to sawh lo in cauk rel caan ttha ah hmang hna usih. Kan miphun nih carel i hrawt ve seh, cauk ttha i siaherh hna usih. Laksawng ttha bik kan i pek khawhmi hi cauk ttha a si ve awk a si ko cang.
December nih a phruhmi lawmhnak le thluachuah na cung um ko seh. Happy Sweet December!
Comments
Post a Comment