Ruahchannak A Kan Petu Lai Ngakchia Nute

Ka ih laite i ka facebook ah ka hmuhmi nih ka cabuai ah a ka kirter tthan. A mak ko. Lai ngakchia nute a ruang-ruh a ei taktak mi phone-phone camera in video an thlakmi te a si.

Kawi Thang Khampat tiin facebook aa tuahmi pakhat nih "ka unu fanu kum ruk" tiin cu video cu a facebook ah chiah i hika hin zoh khawh a si lai, embed lak khawh a si lo.

Kum ruk lawng a simi Lai ngakchia nute hi atu ah mah a si ahcun hmailei ah minthang, fidi pakhat a chuah khawh ding khi a fiang ngaingai. Amah tein a cawnmi a si, an ti nain a video zoh tikah a thiam le a thiam taktak khi a si. 

Atu i nichuah thlanglei Asia ah an tuahmi Sea Game ah laimi tam ngai an itel kho. Atu i ngakchia nute a min kan theih rih lomi te i a thiammi bantuk hi laimi chung ah a thiam ngaingaimi le aa zuam kho ding an um rih lai lo, tiah ka ruah. 

Bawmtu hna a ngeih a si ahcun ttha tein a cawn chap i a ngandam ahcun a rauh hlan Asia chung ah theihmi a si te lai. Atu cu Kawi Thang nih a min a ttial lo pinah a kong zeihmanh kan theihmi a um rih lo i ka ngol rih lai. 

Asinain a fiangmi cu mah ngakchia nute nih hin Laimi ruahchannak a kan pek. Hmailei ah arfi bang a dir i minthang a si te lai tiah ruahchannak le zumhnak ka ngei.

Ka it tthan lai, mangtha tuk hna ulaw.
Tromsø, Norway in