Orhlei ah Nu Nih Norway A Hruai Lai

A luancia kum 100 lio ah nu hna nih cozah thimnak ah thimfung thlaknak nawl an rak hal i Europe le America ram tam ngai ah cun nu nih thimfung an rak thlak khawh ve. Atu cu Ram tampi ah Prime Minister zong nu an hung chuak cang. Norway zong ah 2013 cozah thimnak ah prime minister thar cu nu a hung si tthan (Cu hlan ah AP in Gro nih kum saupi a rak ttuan).

Norway prime minister thar cu Erna Solberg a si cang i zeitindah cozah a ser lai timi tu cu duhsah in a fiang te lai. Aruang cu høyre-party (orhlei-party) lawng nih cozah a ser khawh lai lo caah Krf, Frp, Venstre asiloah SP he an ifonh hrimhrim a hau ding a si. Cucu prime minister a von tlaih bak in a thluak buaiter colhtu pakhat a hung si lai.

Zei a si hmanh ah Høyre nih kum 28 leng prime minister an tlaih ti lonak a si cang i tutan ah teinak an hmuh cu thimfung thlatu hna tiang in i lawmh loawk a ttha lai lo. Laimi zong thimfung thla kho tlawmte lakah tlawmte chin nih Høyre an pek len ve hna.

Jens Stoltenberg cu Erna Solberg nih prime minister a ttuan cang lai ti a hngalh hnu ah an party (AP) ah biachimnak a ngei. Cu hnu ah Erna Solberg zong teinak a hmuh hnu in bia a chim ve. Mah cu an biachimmi ruah tikah miphun pi, mipical le mifim ram hrim an rak sinak hmuh khawh a si.

An chimmi a tawinak in ka von nolh lai,

Jens Stoltenberg: Dawtmi hna, kan rak itimhmi cu kum chung parliament ah a tamdeuh mi si kha a si. Rian har si ti kan rak hngalh ko. Mah cu rian cu (kum 8 hnu i kum 4 peh tthan ding) a rak har ko. Kan itimhmi kan phan kho lo. Tu zan phichuak nih a kan deuh taktak, nain an kan tei taktak lo. Arbeidet Parti cu a lianbik party a si tthiamthiam rih.

- Norway ram le thimtu hna nih cozah thlennak hi an duh hrimhrim ti a fiang. Mah cu a phung si ko. Asinain kanmah zong hi thimnak teinak ding ah kan dernak a tampi ve, tiah a chim chih.

- Erna Solberg cu ka lawmhpi ngaingai. Kan ram le miphun caah a ttuan ding rian zong tluang te le tlamtling in a ttuan khawh lai tiah ka ruah chan. Thimnak kong biaraldonak zong ah upat a tlakmi a si, tiah lunglawm te in a chim.

Erna Solberg cu Prime Minister a si ding a hun i fian in bia chimnak a ngei ve. Party member vialte le thimfung thlatu hna sinah lawmhnak bia a chim dih hnu ah kum 8 chung cozah a tlaitu hna sinah lawmhnak bia a chim. Rian har taktak an ttuan i upat an tlak i an cungah lawmhnak bia chim lo in ka um kho lo, a ti. A hleiin Jens Stoltenberg a rian ttuannak le international chung ah a thil tuahmi cung ah lawmhnak a um, tiah a chim fawn.

Party kalpi le dirpimi i khah lo zongah ram le miphun caah an ttuanmi cu ilawmhpi le upat awk a si kha a chim.

Norway Laimi hi 2003 in a phanmi kan si i 2005-2009 karlak ah mi tambik kan rak phan hna. 2005 in atu a sungmi cozah nih tu kum tiang Norway an hruaimi kan hmuh cang. Cozah hi i thleng ve hrim seh ti a duhtu an tam. Politics hngalh pah ruang cio cu a si lai lo, nain thlennak timi hi uar cio a si ko rua.

Refugee in a rak kan latu 2005 tiang prime minister a ttuanmi hna Party KRF zong tutan ah Høyre hi parliament ah cozah ser tti dawh in an um tikah lawmh awk ngai cu a hun si. Asinain ramdangmi a rem bak lomi FRP zong parliament ah MP tam lak an itel, Høyre nih cozah fek a duh a si ah cun anmah he ikomh a hau. Zeitindah an ifonh lai timi cu duhsah in a fiang te lai.

Adonghnak ah orhlei ah nu nih a kan hruai lai ti cu a fiang. 2005-2013 kar Norway bantuk cu a si hrim ti lai lo. Hi thlennak chung ah Norway Laimi kan har deuh lai maw, kan i nuam deuh lai dah timi cu kum 4 chung ah a fiang te lai.

Note: Norway kong a si caah Norway um lo nih nan fiang tuk lai lo. Cun ka ih lai zinglei suimilam 1. ah ka tial caah a sau sawh kho men.